Teutelonome 30:1-20

  • Ko toe ‵foki ki a Ieova (1-10)

  • A tulafono a Ieova e se tō ‵mafa (11-14)

  • Ke filifili i te ola mo te mate (15-20)

30  “Kafai ko oti ne taunu a pati katoa konei ki a koe, ko fakamanuiaga mo fakamalaiaga kolā ne tuku atu ne au i ou mua,+ kae masaua ne koe i tou mafaufau*+ i atufenua katoa kolā ne fakasalalau koe ne Ieova tou Atua ki ei,+  kae foki mai koe ki a Ieova tou Atua+ kae fakalogo ki tena leo e ‵tusa mo mea katoa e fakatonu atu ne au ki a koe i te aso nei, ko koe mo au tama tāgata, mo tou loto kātoa mo tou ola kātoa,+  tenā ka toe faka‵foki mai ei ne Ieova tou Atua ou tino kolā ne ave fakapagota+ kae fakaasi atu te alofa fakamagalo+ ki a koe kae toe fakamaopoopo mai ne ia koe mai fenua katoa kolā ne fakasalalau koe ne Ieova tou Atua ki ei.+  Kafai foki eiloa e fakasalalau atu ou tino ki kogā koga katoa o te lalolagi, ka toe fakamaopoopo mai koe ne Ieova tou Atua mai i konā kae fakafoki mai ne ia koe.+  Ka aumai koe ne Ieova tou Atua ki te fenua telā ne ‵nofo i ei ou tupuga, kae ka nofo koe i ei; kae ka fai ne ia koe ke manuia kae fakatokouke atu koe i ou tupuga.+  A Ieova tou Atua ka faka‵ma* ne ia tou loto mo loto o au tama,+ ko te mea ke alofa koe ki a Ieova tou Atua mo tou loto kātoa mo tou ola kātoa kae ka ola koe.+  Tenā ko aumai ei ne Ieova tou Atua a fakamalaiaga katoa konei ki ou fili kolā ne takalia‵lia kae fakasaua ne latou koe.+  “Ko foki ei koe o fakalogo ki te leo o Ieova kae tausi ana fakatonuga katoa kolā e fakatonu atu ne au ki a koe i te aso nei.  A Ieova tou Atua ka fai ne ia koe ke manuia malosi i au galuega katoa e fai ki ou lima,+ ka fakatokouke ne ia au tama‵liki mo au lafu manu mo fuataga i ou laukele, me ka toe fiafia a Ieova o fai ne ia koe ke manuia, e pelā eiloa mo tena fiafia ki ou tupuga.+ 10  Kae ka fakalogo koe ki te leo o Ieova tou Atua kae tausi ki ana fakatonuga mo ana tulafono fakavae kolā e tusi i te tusi tenei o te Tulafono, kae ka toe foki koe ki a Ieova tou Atua mo tou loto kātoa mo tou ola kātoa.+ 11  “A te fakatonuga tenei e fakatonu atu ne au ki a koe i te aso nei e se fai pelā me ko tō ‵mafa mō koe, io me e se mafai o oko atu koe ki ei.*+ 12  E se tuku i te lagi, ko te mea ke fai mai koe, ‘Ko oi ka fanaka ki te lagi o puke mai ne ia mō tatou, ko te mea ke mafai o fakalogo‵logo tatou ki ei kae tausi ki ei?’+ 13  Io me tuku i te suā feitu o te tai, ko te mea ke fai mai koe, ‘Ko oi ka fanatu ki te suā feitu o te tai o puke mai ne ia ki a tatou, ko te mea ke fakalogo‵logo tatou ki ei kae tausi ki ei?’ 14  Me i muna o te tulafono konā e pili atu eiloa ki a koe, i loto i tou gutu mo tou loto,+ ko te mea ke mafai o fai ne koe.+ 15  “Kiloke, ko tuku atu ne au ki ou mua i te aso nei a te ola mo te ‵lei, mo te mate mo te masei.+ 16  Kafai e fakalogo koe ki fakatonuga a Ieova tou Atua kolā e fakatonu atu ne au i te aso nei, mai i te alofa ki a Ieova tou Atua,+ kae mai i te sasale i ana auala, kae mai i te tausi ki ana fakatonuga mo ana tulafono fakavae mo ikuga o ana fakamasinoga, tenā ka ola eiloa koe+ kae ka tokouke foki ou tino, kae ka fakamanuia koe ne Ieova tou Atua i te fenua telā ka fano koe o nofo i ei.+ 17  “Kae kafai tou loto e ‵fuli kea‵tea+ kae ko se fakalogo koe kae ko faka‵segina koe kae ifo ki nisi atua o tavini atu ki mea konā,+ 18  au e fai atu ki a koe i te aso nei me ka ‵ta fakapalele eiloa koutou.+ Ka se ola leva koutou i luga i te fenua telā ka puke mō koutou i te suā feitu o te Iolitana. 19  Ko fai ne au a te lagi mo te lalolagi ke fai mo molimau ki a koutou i te aso nei me ko oti ne tuku ne au i otou mua a te ola mo te mate, te manuia mo te malaia;+ kae e ‵tau mo koe o filifili a te ola ko te mea ke ola koe,+ ko koe mo tino ne ‵tupu mai i a koe,+ 20  mai te alofa ki a Ieova tou Atua,+ mai te fakalogo ki tena leo, kae mai te ‵piki ‵mau ki a ia,+ me i a ia ko tou ola kae e auala i a ia ka nofo leva koe i te fenua telā ne tauto a Ieova ke tuku atu ki ou tupuga ko Apelaamo, Isaako mo Iakopo.”+

Fakamatalaga mai lalo

Epelu, “kae toe fakafoki mai ne koe a mea konā ki tou loto.”
Epelu, “pilitome.”
Epelu, “io me ko tō ‵mao.”