Teutelonome 3:1-29

  • Ko manumalo i te tupu o Pasana ko Oko (1-7)

  • Te vaevaega o te fenua i te feitu ki togala o te Iolitana (8-20)

  • Ko fai atu ki a Iosua ke mo a ma mataku (21, 22)

  • Ko se talia a Mose ke ulu ki te fenua  (23-29)

3  “Tenā ne ‵fuli ei tatou o olo aka i te auala ki Pasana. Kae ko Oko te tupu o Pasana, ne o‵mai ki tua mo ana tino katoa o taua ki a tatou i Etelei.+  Muna a Ieova ki a au, ‘Sa mataku i a ia, me ka tuku atu ne au a ia mo ana tino katoa mo tena fenua ki ou lima, kae ka fai eiloa ne koe ki a ia a te mea ne fai ne koe ki a Sekono te tupu o tino Amoli, telā ne nofo i Hesepono.’  Ne tuku mai foki ne Ieova te ‵tou Atua a te tupu o Pasana ko Oko mo ana tino katoa ki ‵tou lima, kae ne ‵ta faeloa ne tatou a latou ke oko ki te taimi ko seai ei se tino ne sao.  Tenā ne puke ei ne tatou ana fakai katoa. E seai eiloa se fakai ne seki puke ne tatou mai i a latou​—e 60 a fakai, te kogā koga kātoa o Alikopa, te malo o Oko i Pasana.+  A fakai katoa konei e puipui faka‵lei ki ‵pui ma‵luga, mataloa, mo lakau faka‵lava, fakatasi mo fakai fo‵liki e uke.  Kae ne fakaseai katoa ne tatou a mea konā,+ e pelā eiloa mo te mea ne fai ne tatou ki te tupu o Hesepono ko Sekono, i te fakaseaiga o fakai katoa, e aofia i ei a tāgata, fāfine mo tama‵liki.+  Kae ne puke ne tatou olotou lafu manu katoa mo olotou kope tāua katoa mai fakai konā ma tatou.  “I te taimi tenā ne puke ei ne tatou a fenua o tupu e tokolua o tino Amoli+ kolā ne ‵nofo i te kogā koga o te Iolitana, mai te Vanu o Alinona ke oko atu ki te Mauga o Helemoni+  (ko te mauga telā e masani o fakaigoa ne tino Saitonu ki a Siliona, kae fakaigoa ne tino Amoli ki a Senila), 10  ko fakai katoa o fenua maugā, ko Kileata kātoa, mo Pasana kātoa ke oko atu eiloa ki Saleka mo Etelei,+ ko fakai o te malo o Oko i Pasana. 11  A te tupu o Pasana ko Oko ko te ‵toe tino fakaoti eiloa mai tino Lefaima. A te mea e tuku i ei tena foitino* e faite ki fiti, kae koi tuku eiloa i Lāpa te fakai o tino Amoni. E iva kupita* te loa kae fa kupita te lauefa, e ‵tusa mo te kupita masani. 12  I te taimi tenā ne puke ei ne tatou a te fenua tenei: mai Aloela,+ telā e tu pili ki te Vanu o Alinona, mo te āfa o te koga maugā o Kileata, kae ne tuku atu ne au ana fakai ki tino Leupena mo tino Kato.+ 13  Kae ko te ‵toega o Kileata mo Pasana kātoa mai lalo i te malo o Oko ne tuku ne au ki te āfa o te matakāiga o Manase.+ A te kogā koga kātoa o Alikopa, telā e nofo mai lalo i Pasana, ne fai pelā me ko te fenua o tino Lefaima. 14  “A Iaila+ te tama tagata a Manase ne puke ne ia a kogā koga katoa o Alikopa+ ke oko atu eiloa ki te tuakoi o tino Kesula mo tino Maakata,+ kae fakaigoa ne ia a fakai fo‵liki konā o Pasana ki tena igoa, ko Havota-iaila*+ ke oko mai eiloa ki te aso nei. 15  Kae ne tuku ne au a Kileata ki a Makila.+ 16  Kae ne tuku ne au ki tino Leupena mo tino Kato+ a Kileata ke oko eiloa ki te Vanu o Alinona, kae ko tena tuakoi ko te kogaloto o te vanu, ke oko atu ki Iapoka, telā ko te vanu o te tuakoi o tino Amoni; 17  mo te Alapaa, mo te Iolitana mo te tuakoi, mai Tinelete ki te Tai o te Alapaa, te Tai ‵Kona,* i te tafito o feitu mauga o Peseka i te feitu ki saegala.+ 18  “Tenā ne tuku atu ei ne au te fakatonuga tenei ki a koutou: ‘A Ieova te otou Atua ko oti ne tuku atu ne ia te fenua tenei mō koutou. A otou tāgata ‵mafi katoa ka puke olotou meatau kae olo atu ki te suā feitu, i mua o otou taina, ko tino Isalaelu.+ 19  Ko otou avaga fua, otou tama‵liki mo otou lafu manu (e iloa ‵lei ne au me uke ‵ki otou lafu manu) ka ‵nofo faeloa i fakai ne tuku atu ne au ki a koutou, 20  ke oko ki te taimi e tuku atu ei ne Ieova te malōlōga ki otou taina, e pelā mo te mea e fai ne ia ki a koutou, kae ko oti foki ne puke ne latou te fenua telā ka tuku atu ne Ieova te otou Atua ki a latou i te suā feitu o te Iolitana. Tenā ko ‵foki mai ei koutou ki otou koga kolā ne tuku atu ne au.’+ 21  “I te taimi tenā ne tuku atu ne au te fakatonuga tenei ki a Iosua:+ ‘Ko oti ne lavea ne koe ki ou mata a te mea ne fai ne Ieova tou Atua ki tupu e tokolua konei. Ka fai foki ne Ieova a te mea tenā ki malo katoa kolā ka ui atu koutou i ei.+ 22  E se ‵tau mo koutou o ma‵taku i a latou, me i a Ieova te otou Atua ka taua atu mō koutou.’+ 23  “I te taimi tenā ne fakamolemole atu ei au ki a Ieova, 24  ‘Ieova te Aliki Sili, ko oti ne kamata o fakaasi mai ne koe ki tau tavini a tou sili mo te malosi o tou lima,+ me ko oi foki la te atua i te lagi io me i te lalolagi e mafai o fai ne ia a faifaiga fakaofoofogia e pelā mo koe?+ 25  Fakamolemole talia mai ke fanatu au ki te suā feitu ke lavea ne au te fenua gali i te suā feitu o te Iolitana, te koga maugā kae gali tenei mo Lepanona.’+ 26  Kae ko Ieova koi kaitaua eiloa ki a au ona ko koutou+ kae ne seki fia fakalogo mai ki a au. Kae ne fai mai a Ieova ki a au penei, ‘Ko lava! Sa toe faipati mai ki a au e uiga ki te mea tenei. 27  Fano ki luga i te taulu o Peseka,+ kae kilo atu ki te feitu ki togala mo mātū mo saute mo saegala kae onoono atu ki te fenua tenā, me i a koe ka se fano eiloa ki te suā feitu o te Iolitana.+ 28  ‵Tofi aka a Iosua+ kae fakamalosi atu a ia, me ka mua atu a ia i tino konei o fanatu ki te suā feitu+ kae ka fai eiloa ne ia ke fai mō olotou tofi a te fenua telā ka lavea ne koe.’ 29  Ne ‵tupu katoa a mea konei i te taimi ne ‵nofo atu ei tatou i mua o te vanu o Petepeolo.+

Fakamatalaga mai lalo

Io me “pokisi mate.”
A te kupita e ‵pau mo te 44.5 sm (17.5 ini.). Onoono ki te MF E14.
Tena uiga “Fakai Fo‵liki o Iaila.”
Telā ko te Tai Mate.