Teutelonome 28:1-68

  • Fakamanuiaga o te fakalogo (1-14)

  • Fakamalaiaga o te sē fakalogo (15-68)

28  “Kae kafai e fakalogo faka‵lei koe ki te leo o Ieova tou Atua mai te tausi faka‵lei ki ana fakatonuga katoa kolā e fakatonu atu ne au ki a koe i te aso nei, ka fakamaluga eiloa koe ne Ieova tou Atua ke maluga atu i nisi atufenua katoa i te lalolagi.+  A fakamanuiaga katoa konei ka oko atu ki luga i a koe kae ka uke atu,+ me ne tumau koe i te fakalogo ki te leo o Ieova tou Atua:  “Ka manuia koe i te fakai lasi, kae ka manuia foki koe i te fakai foliki.+  “Ka manuia au tama‵liki*+ mo fuataga o tou laukele mo tama a au lafu manu, ko au tamā pulumakau mo tamā mamoe.+  “Ka manuia tau kete+ mo tau pōla palu falaoa.+  “Ka manuia koe māfai ko ulu mai koe ki loto, kae ka manuia foki koe māfai ko fano koe ki tua.  “Ka fai ne Ieova ou fili kolā ka taua atu ki a koe ke taka‵vale i ou mua.+ Ka taua atu latou ki a koe mai i se feitu e tasi, kae ko latou ka ‵tele kea‵tea mai i a koe i auala kese‵kese e fitu.+  Ka fai ne Ieova te tonu ke maua ne koe a fakamanuiaga i ou fale ‵teu koloa+ mo au mea katoa e fai, kae ka fakamanuia eiloa ne ia koe i te fenua telā ka tuku atu ne Ieova tou Atua ki a koe.  Ka fai ne Ieova a koe e pelā me se fenua tapu ki a ia,+ e ‵tusa eiloa mo tena tautoga ki a koe,+ me ne tumau koe i te fakalogo ki fakatonuga a Ieova tou Atua kae sasale i ana auala. 10  Ka iloa ei ne tino katoa i te lalolagi me ko fakaigoa koe ki te igoa o Ieova,+ kae ka ma‵taku latou i a koe.+ 11  “Ka fai ne Ieova ke tokouke au tama‵liki, ke uke au manu kae ke ‵fua malosi ou laukele,+ i te fenua telā ne tauto a Ieova ki ou tupuga ke tuku atu ki a koe.+ 12  Ka ‵tala atu ne Ieova ki a koe tena fale ‵teu koloa ‵lei, ko te lagi, ke faka‵to ifo a vaiua ki ou laukele i ana taimi ‵tonu+ kae fakamanuia koe i au mea katoa e fai. Ka tuku fakakaitalafu ne koe au mea ki atufenua e uke, kae ka se manakogina ke fai ne koe se kaitalafu.+ 13  Ka fai ne Ieova koe mo fai te ulu, kae e se ko te felo; kae ka nofo koe i luga,+ kae e se i lalo, māfai e tumau koe i te fakalogo ki fakatonuga a Ieova tou Atua kolā e fakatonu atu ne au ki a koe i te aso nei ke tausi kae fai foki ne koe. 14  E se ‵tau mo koe o ‵fuli kea‵tea mai i pati katoa e fakatonu atu ne au ki a koutou i te aso nei, ki te feitu fakaatamai io me ki te feitu fakamaui,+ ke sasale atu i tua o nisi atua o tavini ki a latou.+ 15  “Kae kafai e se fakalogo koe ki te leo o Ieova tou Atua mai te se fakalogo faka‵lei ki ana fakatonuga mo tulafono katoa kolā e fakatonu atu ne au i te aso nei, ka maua eiloa ne koe a fakamalaiaga katoa konei kae uke atu:+ 16  “Ka malaia koe i te fakai lasi, kae ka malaia foki koe i te fakai foliki.+ 17  “Ka malaia tau kete+ mo tau pōla palu falaoa.+ 18  “Ka malaia au tama‵liki*+ mo fuataga o tou laukele, mo au pulumakau mo mamoe.+ 19  “Ka malaia koe māfai ko ulu mai koe ki loto, kae ka malaia foki koe māfai ko fano koe ki tua. 20  “Ka avatu ne Ieova ki a koe te malaia, te ‵numi valevale mo te fakasalaga i au mea katoa e fai ke oko ki te taimi ko oti ne fakaseai atu ei koe kae galo fakavave atu ona ko au faifaiga ma‵sei mo te tiakinaga ne koe au.+ 21  Ka fai ne Ieova ke poko koe i masaki ke oko ki te taimi ko oti ne fakaseai ei koe mai te fenua telā ka fano koe o puke mō koe.+ 22  Ka ta koe ne Ieova ki te tīpī, te fiva,+ te kiatolo, te ‵vela malosi, te pelu,+ te matagi ‵vela mo te taelagoa;+ kae ka ‵nofo tasi eiloa a mea konā mo koe ke oko ki te taimi e mate ei koe. 23  A te lagi i luga i tou ulu ka fai pelā me se kopa, kae ko te laukele i lalo o koe ka fai pelā me se fiti.+ 24  Ka faka‵to ifo ne Ieova mai te lagi a te pauta mo te ‵pefu e pelā me ne vaiua ki luga i tou fenua ke oko ki te taimi ko oti ne fakaseai atu ei koe. 25  Ka fai ne Ieova ke takavale koe i mua o ou fili.+ Ka taua atu koe ki a latou mai te feitu e tasi, kae ka tele kea‵tea koe mai i a latou i auala kese‵kese e fitu; kae ka fai ei koe e pelā me se mea fakamataku ki malo katoa o te lalolagi.+ 26  Kae ka fai otou foitino ‵mate mo fai a meakai a manu eva i te lagi mo manu o te laukele, kae ka seai se tino e fakamatakutaku atu ki a latou.+ 27  “Ka ta koe ne Ieova ki fakafoa o Aikupito, matalikia, magiso i te pa‵kili mo mea ‵pala i te pa‵kili kolā e se mafai ne koe o fai ke ‵lei. 28  Ka fai ne Ieova koe ke fakavalevale kae ‵kivi+ kae ‵numi valevale. 29  Ka fāfā valevale ou lima i te tutonu, e pelā eiloa me se tino ‵kivi e fāfā ana lima i te pouliga,+ kae ka se manuia koe i au mea e fai. Ka fakatogafiti faeloa koe ne tino kae ka kaisoa au mea, kae e seai se tino e mafai o fakasao ne ia koe.+ 30  Ka ‵sai feagaiga koe ki se fafine, kae ka pukemālō a ia ne te suā tagata. Ka faite ne koe se fale, kae ka se nofo koe i ei.+ Ka ‵toki ne koe se togavine, kae ka se fakaaoga ne koe.+ 31  Ka tamate tau pulumakau tagata i ou mua, kae ka se kai eiloa koe ki ei. Ka kaisoa tau asini i ou mua eiloa, kae ka se fakafoki atu ki a koe. Au mamoe ka avatu ki ou fili, kae ka seai se tino e mafai o fakasao ne ia. 32  Au tama tāgata mo au tama fāfine ka tuku atu ki nisi tino+ kae kilokilo atu eiloa koe ki ei, kae ka manako faeloa koe ki a latou, kae ka seai sau mea e mafai o fai ki ei. 33  A fuataga o ou laukele mo mea katoa e ‵fua mai i ei ka kai ne tino kolā e se iloa ne koe,+ kae ka fakatogafiti faeloa koe ne tino kae fakamaseigina. 34  Ka fakavalevale eiloa koe ona ko mea e lavea ne koe ki ou mata. 35  “Ka ta koe ne Ieova ki fakafoa fakalogo‵mae kae e se mafai o ‵lei ou tulivae mo ou vae, mai lalo i ou alofivae ke oko ki tou ulu. 36  Ka ‵tuli kea‵tea ne Ieova a koe mo te tupu telā ka fakasopo aka ne koe ki se atufenua telā e seki iloa aka eiloa ne koe mo ou tupuga,+ kae ka tavini atu koe i konā ki nisi atua, ko atua kolā ne faite ki lakau mo fatu.+ 37  Ka fai koe e pelā me se mea fakamataku kae se mea fai fa‵kata, kae se mea fakaitaita a tino katoa kolā ne fai ne Ieova ke afuli ne latou a koe.+ 38  “E uke a fuaga ka ave ne koe o ‵toki i te fatoaga, kae mu‵tana fua a mea ka tau mai ne koe,+ me ka kai katoa ne seakelise. 39  Ka ‵toki ne koe a togavine kae galue ki ei, kae ka seai ne uaina e inu ne koe mai i ei kae seai ne mea e tau ne koe mai i ei,+ me ka kai katoa ne anufe. 40  Ka maua ne koe a lakau ko olive i tou kogā fenua kātoa, kae ka se ‵mili eiloa tou foitino ki se sinu mai i ei, me ka ma‵lili fua ki lalo a olive. 41  Ka isi ne au tama tāgata mo tama fāfine, kae ka se tumau latou e pelā me ko au tama‵liki, me ka ave fakapagota latou.+ 42  Ka ‵fonu au lakau katoa mo fuataga i ou laukele i tamā manu fo‵liki. 43  A te tino fakaa‵tea i loto i a koutou ka gasolo aka faeloa o maluga atu i a koe, kae ko koe ka gasolo ifo faeloa o malalo. 44  Ka tuku fakakaitalafu atu ana mea ki a koe, kae ko koe ka se tuku fakakaitalafu atu au mea ki a ia.+ Ka fai a ia mo fai te ulu, kae ka fai koe mo fai te felo.+ 45  “A fakamalaiaga+ katoa konei ka oko atu eiloa ki luga i a koe kae ka maua ne koe kae ka uke atu foki ke oko ki te taimi e fakaseai ei koe,+ me i a koe ne seki fakalogo ki te leo o Ieova tou Atua mai te tausiga o ana fakatonuga mo tulafono fakavae kolā ne fakatonu atu ne ia ki a koe.+ 46  Kae ka tumau eiloa a mea konā i a koe mo au tama e pelā me se fakailoga mo se fakaasiga tumau,+ 47  me e seki tavini atu koe ki a Ieova tou Atua mo te fiafia mo te loto fiafia i te taimi ne uke ei au mea katoa.+ 48  Ka uga atu ne Ieova ou fili ke taua atu ki a koe, kae ka tavini+ atu koe ki a latou i te taimi e fiakai+ kae fiainu kae seai ne ou gatu kae mativa i mea katoa. Ka tuku ne ia se amoga fiti i tou ua ke oko ki te taimi ko fakaseai ei ne ia koe. 49  “Ka fai ne Ieova ke taua atu ki a koe se atufenua ‵mao,+ mai te mata o te lalolagi; ka vau a ia e pelā me se aeto,+ se atufenua telā ka se malamalama eiloa koe i tena ‵gana,+ 50  se atufenua telā e foliga fakamataku kae ka se āva eiloa ki tino ma‵tua io me alofa ki tama‵liki.+ 51  Ka ‵kai latou ki tama a au lafu manu mo fuataga o ou laukele ke oko ki te taimi ko oti ne fakaseai atu ei koe. Ka se faka‵toe ne latou ne saito, uaina ‵fou io me ne sinu, tamā pulumakau io me ne mamoe ma koe ke oko ki te taimi ka fakaseai atu ei ne latou a koe.+ 52  Ka nikoi ne latou koe ke nofo i loto i ou fakai katoa i tou fenua ke oko ki te taimi e maofa ei ou ‵pui ma‵luga kae ma‵losi kolā e talitonu katoatoa koe ki ei. E tonu, ka nikoi ne latou koe i loto i ou fakai katoa i tou fenua telā ka tuku atu ne Ieova tou Atua ki a koe.+ 53  Tenā ko kai ei ne koe au tama‵liki, ko ‵kano o au tama tāgata mo au tama fāfine+ kolā ne tuku atu ne Ieova tou Atua ki a koe, ona ko te matagā o te nikoiga mo te puapuaga ka aumai ne ou fili ki a koe. 54  “Ke oko eiloa ki te ‵toe tagata agamalu kae atafai i a koutou ka se alofa eiloa ki tena taina io me ko tena avaga fakapelepele io me ko ana tama tāgata kolā koi ‵toe mai, 55  kae ka se ave ne ia ki a latou a ‵kano o ana tama tāgata kolā ka kai ne ia, me ko seai eiloa ne ana nisi mea aka ona ko te matagā o te nikoiga mo te puapuaga ka aumai ne ou fili ki ou fakai.+ 56  Kae ko te fafine telā e fakapelepele kae atafai i a koutou telā ne seki mafaufau eiloa ke ‵laka tena alofivae ki te laukele ona ko tena fakapelepele,+ ka se alofa eiloa a ia ki tena avaga pele io me ko tena tama tagata io me ko tena tama fafine, 57  ke oko foki eiloa ki tena fanua telā ka tō mai i te vasī o ana vae mo tena tama tagata telā ka fanau mai ne ia, ka kai ‵muni ne tou fafine a mea konā ona ko te matagā o te nikoiga mo te puapuaga ka aumai ne ou fili ki ou fakai. 58  “Kafai e se fakalogo faka‵lei koe ki pati katoa i te Tulafono tenei ko pati kolā e tusi i te tusi+ tenei kae e se mataku koe ki te igoa ‵malu kae fakaofoofogia tenei,+ telā ko Ieova+ tou Atua, 59  ka avatu ne Ieova a mala fakama‵taku ki luga i a koe mo au tama, ne mala e uke ‵ki kae kolā e se mafai o fakagata,+ mo masaki fakama‵taku kolā e se mafai o fakagata. 60  Ka toe aumai ne ia ki luga i a koe a masaki katoa o Aikupito, kolā ne mataku sāle koe ki ei, kae ka ‵piki ‵mau eiloa a masaki konā ki luga i a koe. 61  E se gata i ei, ka aumai ne Ieova ki luga i a koe a masaki katoa io me ko mala kolā e seki tusi i loto i te tusi o te Tulafono tenei, ke oko ki te taimi ko oti ne fakaseai atu ei koe. 62  E tiga eiloa ko tokouke nei koutou e pelā mo fetū o te lagi,+ kae ka mu‵tana fua te aofaki o koutou e ‵toe mai,+ me i a koe ne seki fakalogo ki te leo o Ieova tou Atua. 63  “Kae pelā mo te fiafia o Ieova o fakamanuia koutou kae fakatokouke foki koutou, ka penā foki te fiafia o Ieova o fakamasei koutou kae fakaseai atu foki koutou; kae ka ave kea‵tea koutou mai te fenua telā ko pili o puke mō koe. 64  “Ka fakasalalau ne Ieova koe ki atufenua katoa, mai te feitu e tasi o te lalolagi ki te suā feitu o te lalolagi,+ kae ka tavini atu koe i konā ki atua kolā e faite ki lakau mo fatu, kolā ne seki iloa eiloa ne koe mo ou tupuga.+ 65  Ka se maua ne koe se filemu mo atufenua+ konā io me se koga mo fakamanava ki ei ou alofivae. I lō te fai penā, ka tuku atu ne Ieova ki a koe i konā te loto manavase+ mo mata e se ‵kite faka‵lei mo te loto fanoanoa.+ 66  A tou ola ka tu i se tulaga fakamataku, kae ka mataku faeloa koe i te po mo te ao; kae ka se mautinoa i a koe me ko koe ka sao io me ikai. 67  I te tafataeao ka fai mai koe, ‘Ke na oko aka ki te afiafi!’ kae kafai ko afiafi ko fai mai koe ‘Ke na oko aka ki te tafataeao!’ ona ko te mataku e nofo mo koe i tou loto mo mea kolā ka lavea ne koe ki ou mata. 68  Kae ka toe fakafoki eiloa ne Ieova a koe ki Aikupito i vaka i te auala telā ne fai atu ne au, ‘Ka se toe lavea eiloa ne koe te koga tenei,’ kae i konā loa ka fakatau atu ei ne koutou a koutou eiloa ki otou fili e pelā me ne pologa tāgata mo pologa fāfine, kae ka seai se tino e fia ‵togi ne ia koutou.”

Fakamatalaga mai lalo

Epelu, “te fuataga o tou moegatama.”
Epelu, “te fuataga o tou moegatama.”