Teutelonome 27:1-26

  • E ‵tau o tusi te Tulafono i luga i fatu (1-10)

  • I luga i te Mauga o Epalu mo te Mauga o Kelisima (11-14)

  • Ko toe faka‵foki atu a fakamalaiaga (15-26)

27  Tenā ne fakatonu atu ei a Mose fakatasi mo toeaina o Isalaelu ki tino: “Faka‵logo ki fakatonuga katoa kolā ka tuku atu ne au ki a koutou i te aso nei.  Kae i te aso ka olo atu ei koutou ki te suā feitu o te Iolitana ki te fenua ka tuku atu ne Ieova te otou Atua ki a koutou, faka‵tu aka ne fatu ‵lasi kae pēni* a fatu konā.+  Ko tusi ei ki luga i fatu konā a pati katoa i te Tulafono tenei māfai ko oti koe ne fanatu ki te suā feitu, ko te mea ke mafai o ulu atu koe ki te fenua telā ka tuku atu ne Ieova tou Atua ki a koe, se fenua telā e ‵tafe i ei a susu mo hani, e pelā eiloa mo te tautoga a Ieova te Atua o ou tupuga ki a koe.+  Kafai ko oti ne olo atu koutou ki te suā feitu o te Iolitana, e ‵tau o faka‵tu ne koutou a fatu konei i te Mauga o Epalu+ kae pēni a fatu konā, e pelā eiloa mo taku fakatonuga ki a koutou i te aso nei.  E ‵tau foki o faite ne koe se fatafaitaulaga ki a Ieova tou Atua i te koga tenā, se fatafaitaulaga e faite ki fatu. E se ‵tau o fakaaoga ne koe a mea faigaluega fiti ki luga i ei.+  E ‵tau o faite ne koe te fatafaitaulaga a Ieova tou Atua ki fatu kolā e kātoa ‵lei kae ofo atu a taulaga ‵sunu ki a Ieova tou Atua i luga i ei.  E ‵tau o ofo atu ne koe a taulaga ‵kai fakatasi+ kae kai ki ei i konā,+ kae ka fiafia koe i mua o Ieova tou Atua.+  Kae tusi faka‵lei i luga i fatu konā a pati katoa o te Tulafono tenei.”+  Tenā ne fai‵pati atu ei a Mose mo faitaulaga Levi ki Isalaelu kātoa, olotou muna: “Ke filemu kae faka‵logo mai e Isalaelu. I te aso nei ko fai koutou mo tino o Ieova te otou Atua.+ 10  E ‵tau mo koe o fakalogo ki te leo o Ieova tou Atua kae tausi ki ana fakatonuga+ mo ana tulafono fo‵liki, kolā e fakatonu atu ne au ki a koe i te aso nei.” 11  I te aso tenā, ne fakatonu atu a Mose ki tino, ana muna: 12  “Konei a matakāiga kolā ka ‵tu i te Mauga o Kelisima+ o fakamanuia a tino māfai ko olo atu koutou ki te suā feitu o te Iolitana: ko Simeona, Levi, Iuta, Isakala, Iosefa mo Peniamina. 13  Kae ko latou konei ka ‵tu i te Mauga o Epalu+ o fakamalaia atu: ko Leupena, Kato, Asela, Sepulona, Tanu mo Nafatali. 14  Kae ka tali atu a tino Levi ki tino Isalaelu katoa i se leo maluga:+ 15  “‘Ke malaia te tagata telā e faite ne ia se mea fakatusa+ io me se tupua fiti,+ se mea telā e fakatakalialia ki a Ieova,+ ko galuega kolā ne fai ne se tagata apo* ki ana lima, kae ne ‵funa ne ia.’ (Kae ka tali atu a tino katoa penei, ‘Amene!’*) 16  “‘Ke malaia te tino telā e manatu fatauva ki tena tamana io me ko tena mātua.’+ (Kae ka fai atu a tino katoa penei, ‘Amene!’) 17  “‘Ke malaia te tino telā e siki ne ia te tuakoi o tena tuakoi.’+ (Kae ka fai atu a tino katoa penei, ‘Amene!’) 18  “‘Ke malaia te tino telā e faka‵se ne ia te auala o te tino ‵kivi.’+ (Kae ka fai atu a tino katoa penei, ‘Amene!’) 19  “‘Ke malaia te tino telā e ‵fuli ne ia te fakamasinoga+ o te tino fakaa‵tea, te tamaliki e seai sena tamana, io me ko te fafine ko mate tena avaga.’+ (Kae ka fai atu a tino katoa penei, ‘Amene!’) 20  “‘Ke malaia te tino telā e ‵moe fakatasi mo te avaga a tena tamana, me ne fakamasiasi ne ia tena tamana,’*+ (Kae ka fai atu a tino katoa penei, ‘Amene!’) 21  “‘Ke malaia te tino telā e ‵moe fakatasi mo so se manu.’+ (Kae ka fai atu a tino katoa penei, ‘Amene!’) 22  “‘Ke malaia te tino telā e ‵moe fakatasi mo tena tuagane, ko te tama fafine a tena tamana io me ko te tama fafine a tena mātua.’+ (Kae ka fai atu a tino katoa penei, ‘Amene!’) 23  “‘Ke malaia te tino telā e ‵moe fakatasi mo te mātua o tena avaga.’+ (Kae ka fai atu a tino katoa penei, ‘Amene!’) 24  “‘Ke malaia te tino telā e ta pouli kae tamate ne ia tena tuakoi.’+ (Kae ka fai atu a tino katoa penei, ‘Amene!’) 25  “‘Ke malaia te tino telā e talia ne ia a te ‵togi fakakolekole ke tamate se tino telā e seai sena mea ‵se ne fai.’+ (Kae ka fai atu a tino katoa penei, ‘Amene!’) 26  “‘Ke malaia te tino telā e se fakatāua ne ia a pati o te Tulafono tenei mai te sē fakalogo ki ei.’+ (Kae ka fai atu a tino katoa penei, ‘Amene!’)

Fakamatalaga mai lalo

Io me “pēni ke ‵kena i te lase.”
Io me “tagata faite mea ki lakau mo fiti.”
Io me “Ke fai eiloa penā!”
Epelu, “tapale kea‵tea te gatu o tena tamana.”