Teutelonome 25:1-19

  • Ko fakagalue te ‵kiniga o tino (1-3)

  • Ke mo a ma ‵sai te gutu o se pulumakau i te taimi e lakalaka ei saito (4)

  • Te avaga ki te avaga a tou taina (5-10)

  • Te puke atu ki koga e se ‵tau o puke ki ei i taimi e ‵fusu ei (11, 12)

  • Fua mea ‵mafa mo pōla e fua ki ei a mea kolā e ‵tonu (13-16)

  • Ko ‵tau o fakaseai a tino Amaleka (17-19)

25  “Kafai e sae aka se kinauga i te va o tāgata e tokolua, e mafai o olo atu lāua ki mua o famasino,+ kae ka fakamasino ne latou a lāua ko fai mai ei me i te tino amiotonu e seai sena ‵se kae ko te tino masei e agasala.+  Kafai e ‵tau o kini a te tino masei,+ ka fakatonu atu te famasino ke takato a ia ki lalo, kae ka ‵kini i ana mua. A te aofaki o ana ‵kini e ‵tau o fetaui mo te masei o tena mea ne fai.  E mafai o 40 ana ‵kini kae e se silia atu.+ Kafai ko silia atu ana ‵kini, ko masiasi ei tou taina i ou mua.  “E se ‵tau mo koe o ‵sai te gutu o se pulumakau tagata i te taimi e lakalaka ei ne ia saito.+  “Kafai e ‵nofo fakatasi se tautaina kae mate se tokotasi i a lāua kae seai sena tamaliki tagata, a tena avaga e se ‵tau o avaga ki se tino i tua o te kāiga. E ‵tau o fano a te taina o tena avaga ki tou fafine, kae puke ne ia mo fai tena avaga, ko avaga ei lāua mo te avaga a tena taina.+  A te toekimua telā ka fanau mai ne te fafine ka tauave ne ia te igoa o tena taina telā ko mate,+ ko te mea ke se ‵solo kea‵tea tena igoa i Isalaelu.+  “Kae kafai e se fia avaga a te tagata ki te avaga a tena taina telā ko mate, e ‵tau mo te avaga a tena taina o fano ki toeaina i mataloa o te fakai kae fai atu, ‘A te taina o taku avaga e se manako o fakatumau te igoa o tena taina i Isalaelu. E se talia ne ia ke avaga a ia mo te avaga a tena taina telā ko mate.’  E ‵tau mo toeaina o tena fakai o ‵kami mai tou tagata kae fai‵pati ki ei. Kafai e ita eiloa a ia kae fai atu, ‘Au e se manako o avaga ki te fafine tenā,’  tenā ko fanatu ei ki a ia te avaga a tena taina telā ko mate i mua eiloa o toeaina, tapale kea‵tea te taka o tou tagata mai tena vae,+ puaki atu ki ana mata kae fai atu, ‘Tenā te mea e ‵tau o fai ki te tagata telā e se manako o fakaola te gafa o tena taina.’ 10  Mai tua i konā ka lauiloa ei a te igoa o tena kāiga* i Isalaelu e pelā me ko, ‘Te kāiga o te tino ne tapale kea‵tea tena taka.’ 11  “Kafai e ‵fusu ne tāgata e tokolua kae oso mai te avaga a se tokotasi i a lāua o puipui tena avaga mai te tagata telā e ta ne ia kae ‵kapa atu tena lima kae puke atu ki koga tapu o te tagata tenā, 12  e ‵tau mo koe o ‵kati kea‵tea tena lima. E se ‵tau eiloa o alofa koe* ki a ia. 13  “E se ‵tau mo koe o tuku i loto i tau ato a fatu fua mea ‵mafa kese‵kese e lua,+ se mea tai lasi mo se mea tai foliki. 14  E se ‵tau o isi ne pōla kese‵kese e lua mō fua a mea i loto i tou fale,+ se mea tai lasi mo se mea tai foliki. 15  E ‵tau o tausi ne koe se fua mea ‵mafa telā e sao kae tonu ke fua ei a mea, mo se pōla e fua ki ei a mea telā e sao kae tonu, ko te mea ke ola leva koe i te fenua telā ka tuku atu ne Ieova tou Atua ki a koe.+ 16  Me i so se tino sē fakamaoni telā e fai ne ia a mea konei e takalialia ki ei a Ieova tou Atua.+ 17  “Ke masaua a mea ne fai ne Amaleka ki a koutou i te otou auala o olo ki tua mo Aikupito,+ 18  i te taimi ne fetaui ei a ia mo koutou i te auala kae taua atu ki tino katoa kolā ne ‵mai i ou tua i te taimi ko fi‵ta kae vāi‵vai ei koutou. Ne seki mataku a ia ki te Atua. 19  Kafai ko tuku atu ne Ieova tou Atua ke malōlō koe mai i ou fili katoa i ou tafa i te fenua telā ka tuku atu ne Ieova tou Atua ke fai mo ou tofi,+ e ‵tau o ‵solo kea‵tea ne koe a Amaleka mai lalo o te lagi.+ Ke mo a eiloa ma puli i a koe.

Fakamatalaga mai lalo

Io me “te igoa o tena kaufale.” Epelu, “tena igoa.”
Epelu, “tou mata.”