Teutelonome 24:1-22

  • Te avaga mo te ‵talaga o avaga (1-5)

  • Te āva ki te ola (6-9)

  • Fakaasi atu te amanaia ki tino ma‵tiva (10-18)

  • Tulafono e uiga ki te taetaega o mea ‵toe (19-22)

24  “Kafai e avaga se tagata ki se fafine kae e se fiafia tou tagata ki te fafine me ne iloa aka ne ia me ne fai ne te fafine se mea matagā, e ‵tau mo ia o tusi se pepa fakamaoni o te ‵talaga o te avaga mo te fafine tenā,+ tuku atu ki tou fafine, kae uga atu ke fano kea‵tea mai tena fale.+  Kafai ko tiaki ne ia te fale o te tagata, e mafai o fano a ia kae toe avaga mo te suā tagata.+  Kafai te tagata i te tokolua e takalialia* ki te fafine tenā kae tusi ne ia se pepa fakamaoni o te ‵talaga o te avaga mo te fafine tenā, tuku atu ki tou fafine, kae uga atu ke fano kea‵tea mai tena fale io me kafai e mate te tagata i te tokolua telā ne avaga mo ia,  a te avaga muamua a tou fafine telā ne uga kea‵tea ne ia tou fafine e se talia ke toe puke ne ia tou fafine mo fai tena avaga me ko oti ne fakalailai tou fafine, me i te mea tenā se mea fakatakalialia ki a Ieova. E se ‵tau mo koe o aumai te agasala ki loto i te fenua telā ka tuku atu ne Ieova tou Atua ki a koe e pelā me se tofi.  “Kafai se tagata ne fatoa avaga, e se ‵tau o kau a ia ki te kautau io me tuku ke fai ne ia a nisi tiute. E ‵tau o saoloto a ia mai so se mea mō se tausaga e tasi kae nofo i te fale o fakafiafia tena avaga.+  “E se ‵tau o puke ne se tino a te mea solo saito io me ko te fatu mai luga e solo ei saito mō fakaleoleo ki ei a te kaitalafu a se tino,+ me pelā eiloa me ko puke ne koe te mea e ola ei te tino mo fakaleoleo ki ei tena kaitalafu.  “Kafai ne maua aka se tagata telā ne kaisoa ne ia se tokotasi o ana taina Isalaelu, kae ne fai fakamasei ne ia kae fakatau atu ki tua,+ e ‵tau eiloa o tamate a te tagata telā ne kaisoa ne ia te suā tino.+ E ‵tau o tapale kea‵tea ne koe a te mea masei mai loto i a koutou.+  “Kafai ko isi se masaki ko te lepela,* e ‵tau eiloa o fai ne koutou a mea katoa e fai atu ne faitaulaga Levi ki a koutou.+ E ‵tau o fai ne koutou a mea katoa ne fakatonu atu ne au ki a latou.  Ke masaua a te mea ne fai ne Ieova tou Atua ki a Miliama i te otou auala o ‵mai ki tua mo Aikupito.+ 10  “Kafai ne tuku fakakaitalafu ne koe se mea ki tou tuakoi,+ e se ‵tau mo koe o ulu atu ki tena fale o puke mai se mea mai i a ia mo fakaleoleo tena kaitalafu. 11  E ‵tau mo koe o tu i tua, kae e ‵tau o aumai ki tua ne te tagata ne kaitalafu i a koe a te mea mo fakaleoleo tena kaitalafu. 12  Kafai e manako malosi te tagata tenā ki tena mea, e se ‵tau mo koe o fano o moe kae koi nofo mo koe a te mea telā ne avatu ne ia mo fakaleoleo tena kaitalafu.+ 13  E ‵tau eiloa o fakafoki ne koe ki a ia a te mea ne tuku atu ne ia mo fakaleoleo tena kaitalafu i te taimi e tō ei te mata o te la, kae ka fano a ia o moe mo tena gatu,+ kae ka fakamanuia ne ia koe; kae ka fai koe pelā me se tino amiotonu i mua o Ieova tou Atua. 14  “E se ‵tau mo koe o fakatogafiti te ‵togi o tau tino galue telā e manako malosi ki se fesoasoani kae mativa, faitalia me i a ia ko tou taina io me se tino fakaa‵tea i tou fenua, i loto i ou fakai.+ 15  E ‵tau o tuku atu ne koe tena peofuga i te aso eiloa tenā,+ kae koi tuai o tō te mata o te la, me e manako malosi a ia ki se fesoasoani kae e fakalagolago tena ola ki tena peofuga. Kafai e se fai penā, ka tagi a ia ki a Ieova e uiga mō koe kae ka agasala ei koe.+ 16  “E se ‵tau o tamate a tamana ona ko mea ne fai ne olotou tama‵liki, kae e se ‵tau o tamate a tama‵liki ona ko mea ne fai ne olotou tamana.+ E ‵tau fua o tamate se tino i te agasala ne fai ne ia.+ 17  “E se ‵tau mo koe o ‵fuli a te fakamasinoga o te tino fakaa‵tea io me ko te tamaliki e seai sena tamana,+ kae e se ‵tau mo koe o puke a te gatu o se fafine ko mate tena avaga mo fakaleoleo ki ei tena kaitalafu.+ 18  Ke masaua me i a koe ne fai pelā me se pologa i Aikupito, kae ne fakasao koe ne Ieova tou Atua mai i konā.+ Tenā te pogai e fakatonu atu ei au ki a koe ke fai te mea tenei. 19  “Kafai ko ‵kati a fuataga o au fatoaga kae ne puli i a koe se fusigā saito i te fatoaga, sa foki o puke mai te fusigā saito tenā. E ‵tau o tuku ma te tino fakaa‵tea, te tamaliki e seai sena tamana, mo te fafine ko mate tena avaga,+ ko te mea ke mafai ne Ieova tou Atua o fakamanuia koe i au mea katoa e fai.+ 20  “Kafai e pago ne koe tau lakau olive, e se ‵tau o toe pago ne koe ana kaula. A mea kolā e ‵toe i luga i ei e ‵tau o tuku ma te tino fakaa‵tea, te tamaliki e seai sena tamana, mo te fafine ko mate tena avaga.+ 21  “Kafai ko tau ne koe a vine i tau togavine, e se ‵tau mo koe o toe foki o tau a mea kolā ne ‵toe i ei. E ‵tau o tuku ma te tino fakaa‵tea, te tamaliki e seai sena tamana mo te fafine ko mate tena avaga. 22  Ke masaua me i a koe ne fai pelā me se pologa i te fenua o Aikupito. Tenā te pogai e fakatonu atu ei au ki a koe ke fai te mea tenei.

Fakamatalaga mai lalo

Io me “‵teke.”
A te pati Epelu telā ne ‵fuli ki te “lepela” e lauefa tena uiga kae e mafai o aofia i ei a masaki ‵pisi o te pa‵kili. E mafai foki o ‵pisi atu ki luga i gatu mo fale.