Teutelonome 21:1-23

  • Tino ne tamate kae e se iloa (1-9)

  • Te avaga ki fāfine ne ave fakapagota (10-14)

  • Saolotoga o te toekimua (15-17)

  • Te tama tagata loto makeke (18-21)

  • A te tagata ne fakatautau i se pou ko oti ne fakamalaia (22, 23)

21  “Kafai e maua aka se tino mate i se laukele i te fenua telā ka tuku atu ne Ieova tou Atua ki a koe kae e se iloa te tino ne tamate ne ia,  e ‵tau o olo atu otou toeaina mo famasino+ o fua te ‵mao mai te koga e maua i ei te foitino mate ki fakai kolā e ‵pili ki ei.  Tenā ko puke ei ne toeaina i te fakai telā e pili ki te foitino se tamā pulumakau mai te lafu telā e seki fakagalue aka eiloa, kae e seki toso aka eiloa i se amoga ‵mafa,  e ‵tau o ‵taki atu ne toeaina o te fakai tenā a te tamā pulumakau ki se vanu e ‵tafe ei te vai kae seki fakamalū aka eiloa te laukele i ei io me ne ‵toki ne fuaga i ei, ko ‵fati ei ne latou a te ua o te tamā pulumakau i te vanu tenā.+  “Kae ko faitaulaga, ko tino Levi, ka olo atu me ko oti ne filifili ne Ieova tou Atua a latou ke tavini atu ki a ia,+ o fakamanuia atu i te igoa o Ieova.+ Ka folafola atu ne latou a te auala e faka‵lei aka ei so se kinauga e sae aka e uiga ki amioga fakasaua.+  Tenā ko olo ei a toeaina katoa o te fakai telā e pili ki te foitino mate o ‵fulu olotou lima+ i luga i te tamā pulumakau telā ne ‵fati tena ua i te vanu,  kae e ‵tau o fai atu latou, ‘E seki fakamaligi ne omotou lima a te toto tenei, io me ne lavea ne omotou mata a toto e ma‵ligi.  Ke mo a ma ‵losi mai a te mea tenei ki ou tino Isalaelu, kolā ne faka‵sao ne koe,+ e Ieova, kae sa talia ne koe a te agasala ki te toto o se tino e seai sena ‵se ke tumau i ou tino Isalaelu.’+ Tenā ko se ‵losi atu ei ki a latou a te agasala ko te fakamaligi toto.  I te auala tenei ka tapale kea‵tea ei ne koe te agasala ki te toto o se tino e seai sena ‵se mai loto i a koutou e auala i te faiga o te mea tonu i te kilokiloga a Ieova. 10  “Kafai e fano koe o taua atu ki ou fili kae fakatakavale latou ne Ieova tou Atua ona ko koe, kae ave fakapagota ne koe latou,+ 11  kae lavea ne koe se fafine tinogali mai pagota konā kae ko fiafai koe ki tou fafine kae manako koe o puke a ia mo fai tau avaga, 12  e mafai loa o puke mai ne koe a ia ki loto i tou fale. E ‵tau la mo ia o ‵vele tena ulu, kae ‵kati ana mania, 13  kae tapale kea‵tea ana gatu pagota, kae nofo i tou fale. Ka tagi mautuutu a ia ki tena tamana mo tena mātua i se masina kātoa,+ ka oti ko mafai ei o ‵moe fakatauavaga koulua; ka fai koe mo fai tena avaga tagata kae ka fai a ia mo fai tau avaga fafine. 14  Kae kafai e se fiafia koe ki tou fafine, e ‵tau o uga ne koe ke fano+ ki so se koga e manako a ia ki ei. Kae e se ‵tau o fakatau atu ne koe a ia ki tua ke maua ne tupe io me fai fakamasei a ia, me ko oti ne fakamasiasi ne koe tou fafine. 15  “Kafai e tokolua a avaga a se tagata, kae e alofa atu a ia ki te suā tino i lō te suā tino,* kae e isi katoa ne tama tāgata a ia i fāfine konā, kae ko tena tama tagata matua e a te fafine telā e se alofa a ia ki ei,+ 16  i te aso e tuku atu ei tena tofi ki ana tama tāgata, e se ‵tau o tuku atu ne ia a te tofi o tena tama toekimua i te fafine telā e se alofa a ia ki ei ki te tama tagata a te fafine telā e alofa a ia ki ei. 17  E ‵tau o amanaia a ia ki te tama tagata a te fafine telā e se alofa a ia ki ei e pelā me ko te toekimua kae tuku atu tena vaega mai ana mea katoa fakalua taimi, me i te tamaliki tenā ko te kamataga o tena malosi e pelā me se tagata. Ko ia eiloa e ‵tau o tuku atu ki ei te vaega o te toekimua.+ 18  “Kafai e isi se tama tagata a se tagata telā e loto makeke kae uiga ‵teke kae e se fakalogo ki tena tamana io me ko tena mātua,+ kae ne taumafai lāua o fakatonu a ia kae e se fia fakalogo ki a lāua,+ 19  e ‵tau o puke a ia ne tena tamana mo tena mātua kae avatu ki toeaina i te mataloa o tena fakai 20  kae fai atu ki toeaina o tena fakai, ‘A te mā tama tagata tenei e loto makeke kae uiga ‵teke, kae e se fia fakalogo mai ki a māua. A ia se tino gafula+ kae inu kava.’+ 21  Tenā ko ‵tau ei mo tāgata katoa o tena fakai o peipei a ia ke mate. Tela la, e ‵tau mo koe o tapale kea‵tea a te mea masei mai loto i a koutou, kae ka ‵logo a tino Isalaelu katoa kae ma‵taku.+ 22  “Kafai e fai ne se tagata se agasala telā e ‵tau ei o fakasala a ia ki te mate,+ kae tamate atu a ia kae fakatautau ne koe ki luga i se pou,+ 23  e se ‵tau o tuku tena foitino mate ke tautau i luga i te pou i te po kātoa.+ Kae e ‵tau o fakamautinoa aka ne koe ke tanu tena foitino i te aso eiloa tenā, me i te tino telā e fakatautau ki luga ko oti ne fakamalaia ne te Atua,+ kae e se ‵tau o fakalailai ne koe tou laukele, telā ka tuku atu ne Ieova tou Atua ki a koe mo fai tou tofi.+

Fakamatalaga mai lalo

Epelu, “e tokolua avaga, e tokotasi e alofagina kae tokotasi e takalialiagina.”