Teutelonome 2:1-37

  • Ko takasē‵se i te koga lavaki i tausaga e 38 (1-23)

  • Ko manumalo i te tupu o Hesepono ko Sekono (24-37)

2  “Ne ma‵fuli ei tatou kae olo atu ki te koga lavaki i te auala ki te Tai Kula, e pelā eiloa mo pati ne fai mai ne Ieova ki a au,+ kae ne faima‵laga atu tatou i aso e uke o fakatamilo te Mauga o Seila.  Fakamuli loa, kae fai mai a Ieova ki a au,  ‘Ko leva te taimi ne sa‵sale fakatamilo ei koutou i te mauga tenei. Nei la, olo atu ki mātū.  Kae fai atu te fakatonuga tenei ki tino: “A koutou ka olo i tafa o te tuakoi o otou taina, ko tino ne ‵tupu mai i a Esau,+ kolā e ‵nofo i Seila,+ kae ka ma‵taku latou i a koutou,+ kae e ‵tau mo koutou o fakaeteete malosi.  Ke mo a ma fai taua* koutou ki a latou, me ka se tuku atu ne au se laukele o latou mō koutou, faitalia me foliki fua e pelā mo te lasi o se laga, me ko oti ne tuku ne au a te Mauga o Seila mō Esau.+  E ‵tau o ‵togi tupe ne koutou a meakai ka ‵kai koutou ki ei, kae ‵togi foki a vai ka inu koutou ki ei.+  Me i a Ieova te otou Atua ne fakamanuia ne ia otou mea katoa ne fai. E iloa ‵lei ne ia te otou sa‵salega i loto i te koga lavaki fakamataku tenei. A Ieova te otou Atua ne fakatasi faeloa ki a koutou i tausaga e 40 konei, kae e seai eiloa se mea ne ma‵tiva koutou i ei.”’+  Tenā ne olo ei tatou i tafa o ‵tou taina, ko tino ne ‵tupu mai i a Esau,+ kolā ne ‵nofo i Seila, kae faka‵mao mai te auala ki te Alapaa, mai Elata mo Esionikepa.+ “Oti aka, ma‵fuli ei tatou o olo i te auala o te koga lavaki o Moapi.+  Ne fai mai a Ieova ki a au, ‘Sa fai taua io me taua atu ki Moapi, me ka se tuku atu ne au se laukele o latou mō koutou me ko oti ne tuku ne au a Alo ma tino ne ‵tupu mai i a Lota.+ 10  (A tino Emima+ ne ‵nofo muamua i konā, ne tino ma‵losi kae tokouke kae ma‵luga e pelā mo tino Anaki. 11  A tino Lefaima+ ne fai pelā me ‵pau mo tino Anaki,+ kae ne fakaigoa sāle ne tino Moapi me ne tino Emima. 12  Mai mua atu i ei, ne ‵nofo a tino Holite+ i Seila, kae ne fakatakavale kae fakaseai ne tino ne ‵tupu mai i a Esau a latou kae ‵nofo i te lotou fenua,+ e pelā eiloa mo te mea ka fai ne tino Isalaelu ki te fenua telā ka fai mō latou, telā ka tuku atu ne Ieova ki a latou.) 13  Nei la, olo atu ki te suā feitu o te Vanu o Seletai.’ Tenā ne olo ei tatou ki te suā feitu o te Vanu o Seletai.+ 14  A te taimi ne sa‵sale ei tatou mai Katesa-panea ke oko ki te taimi ne olo atu ei tatou ki te suā feitu o te Vanu o Seletai e ‵tusa mo te 38 tausaga, ke oko ki te taimi ne palele atu katoa i ei a tāgata o te taua ne ‵mate, e ‵tusa eiloa mo te tautoga a Ieova ki a latou.+ 15  Ne fakaoko atu te lima o Ieova ki a latou o fakaseai latou ke oko ki te taimi ne ‵mate atu ei latou.+ 16  “I te taimi eiloa ne ‵mate katoa ei a tāgata o te taua mai i a latou,+ 17  ne toe faipati mai a Ieova ki a au, ana muna, 18  ‘I te aso nei, e ‵tau o olo koutou i tafa o te kogā fenua o Moapi, telā ko Alo. 19  Kafai ko pili atu koutou ki tino Amoni, ke mo a ma fai taua io me fakaitaita atu latou, me ka se tuku atu ne au ki a koutou se laukele o tino Amoni ma koutou, me ko oti ne tuku ne au ki tino ne ‵tupu mai i a Lota.+ 20  Ne fai foki a te fenua tenei e pelā me ko te fenua o tino Lefaima.+ (A tino Lefaima ne ‵nofo muamua i te koga tenā, kae ne fakaigoa latou ne tino Amoni ko Samasumima. 21  A latou ne tino ma‵losi, kae tokouke kae ma‵luga e pelā mo tino Anaki;+ kae ne fakaseai ne Ieova latou i mua o tino Amoni, kae ne afuli latou kea‵tea ne tino konā kae ‵nofo ei latou i te fenua tenā. 22  Tenā eiloa te mea ne fai ne ia ki tino ne ‵tupu mai i a Esau, kolā ko ‵nofo nei i Seila,+ i te taimi ne fakaseai ei ne ia a tino Holite+ i olotou mua, ko te mea ke mafai o afuli kea‵tea ne latou kae ‵nofo ei i te fenua tenā ke oko mai eiloa ki te aso nei. 23  E pelā mo tino Avima, ne ‵nofo latou i kogā koga o Kasa+ ke oko ki te taimi ne o‵mai ei a tino Kafatoli+ mai Kafatoli* o fakaseai latou kae ‵nofo i te lotou fenua.) 24  “‘‵Tu ki luga, kae olo atu ki te Vanu o Alinona.+ Kiloke, ko oti ne tuku atu ne au ki otou lima a Sekono+ te tupu o Hesepono te tino Amoli. Tela la, ke na kamata o puke ne koutou tena fenua kae taua atu foki ki a ia. 25  I te aso nei ka kamata o fai ne au ke manava‵se kae ma‵taku i a koutou a tino katoa mai lalo o te lagi kolā e ‵logo i tala e uiga ki a koutou. Ka manava‵se kae pole‵pole* latou ona ko koutou.’+ 26  “Tenā ne uga ei ne au a avefekau mai te koga lavaki o Katemota+ ki te tupu o Hesepono ko Sekono mo te fekau o te filemu,+ 27  ‘Talia mai ke ui atu au i loto i tou fenua. Ka tumau eiloa au i te auala kae e se ‵fuli ki te fakaatamai io me ki te fakamaui.+ 28  Ka kai fua au ki meakai kae inu fua ki vai kolā e ‵togi mai ne koe ki a au. Talia mai fua ke ui atu au penā 29 ​ —tenā te mea ne fai ne tino ne ‵tupu mai i a Esau kolā ne ‵nofo i Seila mo tino Moapi kolā ne ‵nofo i Alo ki a au​—ke oko ki te taimi ko fanatu ei au ki te suā feitu o te Iolitana ki te fenua telā ka tuku mai ne Ieova te motou Atua ki a matou.’ 30  Kae ko te tupu o Hesepono ko Sekono ne seki talia ne ia ke ui atu tatou i loto i ei, me ne talia ne Ieova te otou Atua ke ‵teke mai a ia kae ke loto makeke+ foki, ko te mea ke tuku atu a ia ki otou lima, e pelā mo te mea tenei ko tupu.+ 31  “Tenā ne fai mai ei a Ieova ki a au, ‘Kiloke, ko oti ne kamata o tuku atu ne au a Sekono mo tena fenua ki a koe. Ke na kamata nei o puke mō koutou tena fenua.’+ 32  I te taimi ne o‵mai ei a Sekono fakatasi mo ana tino katoa o taua mai ki a tatou i Iasa,+ 33  ne tuku mai a ia ne Ieova te ‵tou Atua ki a tatou, ko te mea ke fakatakavale ne tatou a ia, ana tama tāgata, mo ana tino katoa. 34  Ne puke ne tatou ana fakai katoa i te taimi tenā kae fakamasei atu a fakai katoa konā, e aofia i ei a tāgata, fāfine mo tama‵liki. E seai eiloa se tino ne fakasao ne tatou.+ 35  Ne puke fua ne tatou a manu ma tatou fakatasi mo mea mai fakai kolā ne puke ne tatou. 36  Mai Aloela+ ke oko ki kaugutu o te Vanu o Alinona (e aofia i ei a fakai i loto i te vanu), ke oko atu eiloa ki Kileata, e seai loa se fakai e sili atu tena malosi i lō tatou. Ne tuku mai eiloa ne Ieova te ‵tou Atua a fakai konā ki a tatou.+ 37  Kae ne seki olo atu koutou ki te fenua o tino Amoni,+ ki kaugutu katoa o te Vanu o Iapoka,+ mo fakai o koga maugā, io me ko so se koga telā ne fakatapu ne Ieova te ‵tou Atua.

Fakamatalaga mai lalo

Io me “Ke mo a ma fakaitaita atu.”
Telā ko Keleta.
Io me “logo‵mae e pelā me se tino ka fai o fanau.”