Teutelonome 19:1-21

  • Te agasala i te toto mo fakai faka‵lafi (1-13)

  • E se ‵tau o fakagasue te pine o te tuakoi (14)

  • Ko molimau i se fono fakamasino (15-21)

    • E manakogina molimau e tokolua io me tokotolu (15)

19  “Kafai ko ‵ta fakapalele ne Ieova tou Atua a atufenua kolā ka tuku atu ne Ieova tou Atua ki a koe, kae ko oti ne afuli kea‵tea ne koe latou kae ‵nofo atu i olotou fakai mo olotou fale,+  e ‵tau o ‵vae kea‵tea ne koe a fakai e tolu mai te fenua telā ka tuku atu ne Ieova tou Atua mō koe.+  E ‵tau o vaevae ne koe a kogā fenua o te fenua telā ka tuku atu ne Ieova tou Atua mō koe ki vaega e tolu, kae fakatoka a auala ko te mea ke mafai ne so se tino ne mate i ei te suā tino o tele ki se fakai e tasi i fakai konā.  “Konei a mea e ‵tau o fai ki se tino ne mate i ei te suā tino telā e mafai o tele ki konā ke ola a ia: Kafai ne ta ne ia tena tuakoi i se auala fakafuasei kae ne seki takalialia muamua a ia ki ei;+  e pelā mo ia māfai e olo mo tena tuakoi ki te togavao o fai fafie kae sisi aka tena lima o ‵kati te lakau ki te takū, ko te mata eiloa o te takū ko lele mai tena kau kae poko i tena tuakoi kae mate, e ‵tau o tele atu a ia ki se fakai e tasi i fakai konei o nofo i ei.+  Kafai e se fai penā, ona ko te kaitaua, e mafai eiloa o afuli a ia ne te tino telā e taui ne ia te toto,+ maua atu a ia, kae tamate, me e ‵mao ‵ki a te koga e tu ei te fakai. Kae e se ‵tau o tamate a ia me i a ia ne seki takalialia muamua eiloa ki tena tuakoi.+  Tenā te pogai e fakatonu atu ei au, ‘‵Vae kea‵tea ne fakai e tolu.’  “Kafai e fakalasi aka ne Ieova tou Atua a tou kogā fenua e pelā mo tena tautoga ki ou tupuga+ kae tuku atu ne ia ki a koe a fenua katoa kolā ne tauto a ia ke tuku atu ki ou tupuga+ 9 ​ —māfai e fakamaoni koe o fakalogo ki fakatonuga katoa kolā ka tuku atu ne au i te aso nei, ke alofa ki a Ieova tou Atua kae tumau i te sasale i ana auala+​—ko fakaopoopo atu ei ne koe a nisi fakai e tolu ki fakai konei.+ 10  I te auala tenei ko seai ei se toto o se tino telā e seai sena ‵se e maligi+ i tou fenua telā ka tuku atu ne Ieova tou Atua e pelā me se tofi, kae ka se agasala koe i te toto.+ 11  “Kae kafai ne takalialia se tagata ki tena tuakoi,+ kae alamati ke ta ne ia kae fakapakia fakamasei ne ia kae mate atu, kae tele a te tagata tenā ki se fakai e tasi i fakai konei, 12  e ‵tau mo toeaina o tena fakai o puke mai a ia mai konā kae avatu ki lima o te tino telā e taui ne ia te toto, ko tamate ei a ia.+ 13  E se ‵tau o alofa koe ki a ia, kae e ‵tau mo koe o ave kea‵tea mai i Isalaelu a te agasala ki te toto o te tino e seai sena ‵se,+ ko te mea ke ‵lei a mea katoa mō koe. 14  “Kafai ko maua ne koe tou tofi i te fenua telā ka tuku atu ne Ieova tou Atua ki a koe, e se ‵tau mo koe o fakagasue te pine o te tuakoi o tou tuakoi+ mai te koga ne ‵toki i ei ne ou tupuga. 15  “E se mafai ne se molimau e tokotasi o fakasala te suā tino mō so se mea ‵se io me se agasala ne fai ne ia.+ E ‵tau o fakatalitonu aka a te mea tenā i molimau a tino e tokolua io me i molimau a tino e tokotolu.+ 16  Kafai e isi se tino e fai sena molimau masei ki se tagata kae ‵losi atu ki ei mō te faiga o se amioga solitulafono,+ 17  a tāgata e tokolua konā e ‵tau o ‵tu i mua o Ieova, i mua o te kau faitaulaga mo famasino kolā e tavini atu i aso konā.+ 18  Ka iloilo faka‵lei ne famasino a te mea tenā,+ kae kafai e se tonu a te mau a te tino telā ne fai tena molimau kae ‵se te ‵losiga ne fai ne ia ki tena taina, 19  e ‵tau o fai ne koutou ki a ia a te mea telā ne mafaufau a ia o fai ki tena taina,+ kae ‵tau mo koe o tapale kea‵tea a te mea masei tenā mai i a koutou.+ 20  Ka ‵logo a tino kolā e ‵toe mai i te mea tenā kae ka ma‵taku, kae ka se toe fai eiloa ne latou a te mea masei penā i a koutou.+ 21  E se ‵tau o alofa koe ki a ia:+ E ‵tau o sui te ola ki te ola, te mata ki te mata, te nifo ki te nifo, te lima ki te lima, te vae ki te vae.+

Fakamatalaga mai lalo