Teutelonome 18:1-22
18 “A faitaulaga Levi, e penā foki mo te matakāiga kātoa o Levi, ka seai ne olotou vaega io me se tofi o latou i Isalaelu. Ka ‵kai latou ki taulaga kolā e ofo atu i luga i te afi ki a Ieova, ko mea kolā e fai pelā me ko tena tofi.+
2 Tela la, e se ‵tau o isi ne olotou tofi e pelā mo olotou taina. A Ieova ko te lotou tofi, e pelā eiloa mo ana pati ne fai ki a latou.
3 “Konei a mea e ‵tau o maua ne faitaulaga mai i tino: So se tino e ofo atu tena taulaga, faitalia me se pulumakau io me se mamoe, e ‵tau o ave ne ia ki te faitaulaga a te tuauma, kauvae lalo mo te tinae.
4 A fuataga muamua a koe, au uaina ‵fou, au sinu, mo fulufulu mamoe muamua kolā ne ‵vele mai au lafu mamoe e ‵tau o avatu katoa ki a ia.+
5 Ko oti ne filifili ne Ieova tou Atua a ia mo ana tama tāgata mai ou matakāiga katoa ke tavini atu i te igoa o Ieova i taimi katoa.+
6 “Kae kafai e tiaki ne se tino Levi se fakai e tasi o koutou i Isalaelu telā ne nofo+ a ia i ei kae manako o fano ki te koga telā e filifili*+ ne Ieova,
7 e mafai o tavini atu a ia i te koga tenā i te igoa o Ieova tena Atua e pelā eiloa mo ana taina katoa, ko tino Levi, kolā e ‵tu atu i konā i mua o Ieova.+
8 E ‵pau eiloa te aofaki o meakai ka maua ne ia e pelā mo latou,+ i tafa o mea kolā e maua ne ia māfai ko oti ne ‵togi ki tua a mea a ana tupuga.
9 “Kafai ko oko atu koutou ki te fenua telā ka tuku atu ne Ieova te otou Atua ki a koutou, e se ‵tau mo koutou o fakaakoako ki faifaiga fakatakalialia a fenua konā.+
10 E se ‵tau o maua atu i a koutou se tino telā e ‵sunu tena tama tagata io me ko tena tama fafine i te afi,*+ se tino fai mea fakataulaitu,+ io me faivailakau,+ io me salasala ki ne fakailoga o mea ka ‵tupu,+ se tino fai tapune,+
11 se tino fai pati ‵lau, se tino telā e fesokotaki ki agaga,+ se tino fakamatala mea ‵tupu i aso mai mua,+ io me se tino e ‵sala se fesoasoani mai i tino ‵mate.+
12 So se tino e fai ne ia a mea konei ka takalialia ki ei a Ieova, kae ona ko mea fakatakalia‵lia konei ka afuli ei latou kea‵tea ne Ieova te otou Atua mai i otou mua.
13 E ‵tau o fakamaoni atu ne koutou i mua o Ieova te otou Atua i a koutou e se ‵se.+
14 “Me i atufenua konei ka afuli kea‵tea ne koutou ne masani o faka‵logo ki tino faivailakau+ mo tino fai mea fakataulaitu,+ kae ne seki talia ne Ieova te otou Atua ke fai ne koutou se mea penei.
15 Ka fakatu aka ne Ieova te otou Atua mō koutou se pelofeta mai i otou taina e penei eiloa mo au. E ‵tau mo koutou o faka‵logo ki a ia.+
16 A te mea tenei ko te tali ki te otou fakamolemole ne fai ki a Ieova te otou Atua i Holepa i te aso ne maopoopo ei te fakapotopotoga+ kae fai atu koutou, ‘Sa fai ke lagona ne matou te leo o Ieova te motou Atua io me toe lavea ne matou te afi fakamataku tenei, ko te mea ke se ‵mate matou i ei.’+
17 Tenā ne fai mai ei a Ieova ki a au, ‘A te mea ne fai mai ne latou e ‵lei.
18 Ka ‵tofi ne au se pelofeta mō latou mai i olotou taina e pelā mo koe,+ kae ka tuku atu ne au aku pati ki loto i tena gutu,+ kae ka faipati atu ne ia ki a latou a mea katoa ne fakatonu atu ne au ki a ia.+
19 E tonu, ka fakamasino ne au te tagata telā e se fakalogo ki aku pati me ka faipati atu a ia i toku igoa.+
20 “Kafai e faipati fakamatamata se pelofeta i toku igoa kae seki fakatonu ne au ke faipati atu a ia io me faipati a ia i te igoa o nisi atua, e ‵tau eiloa o tamate te pelofeta tenā.+
21 Kae e mafai o fai ifo koutou i otou loto eiloa: “Ka iloa pefea ne matou me ne seki fai mai ne Ieova a pati konā?”
22 Kafai e faipati te pelofeta i te igoa o Ieova kae ne seki taunu a pati konā io me e se ‵tonu, ko tena uiga e seki fai mai ne Ieova a pati konā. Ne faipati fakamatamata eiloa a te pelofeta tenā. E se ‵tau o mataku koe ki a ia.’
Fakamatalaga mai lalo
^ Ko te koga telā e filifili ne Ieova ke fai i ei te tapuakiga.
^ Epelu, “ave i loto i te afi.”
