Teutelonome 17:1-20

  • E se ‵tau o isi se pona o te taulaga (1)

  • Fakatokaga o fakalavelave ki te aposetasi (2-7)

  • Te fakamasinoga o fakalavelave faiga‵ta (8-13)

  • Fakatakitakiga mō se tupu i aso fakamuli (14-20)

    • E ‵tau o tusi ne se tupu se ‵kopi o te Tulafono (18)

17  “E se ‵tau mo koe o ofo atu ki a Ieova tou Atua se pulumakau tagata io me se mamoe telā e isi sena pona io me se mea sē ‵lei i ei, me ka fai a te mea tenā e pelā me se mea fakatakalialia ki a Ieova tou Atua.+  “Kafai e maua atu se tagata io me se fafine i a koutou, i so se fakai telā ka tuku atu ne Ieova tou Atua ki a koe, telā e fai ne ia a mea ma‵sei i te kilokiloga a Ieova tou Atua kae soli i ei tena feagaiga,+  kae ko sipa kea‵tea a ia kae tapuaki atu ki nisi atua kae ifo atu ki a latou io me ki te la io me ki te masina io me ki kautau katoa o te lagi,+ se mea telā e seki fakatonu atu eiloa ne au.+  Kafai ko fakailoa atu ki a koe io me logo koe i ei, e ‵tau o iloilo faka‵lei ne koe a te mea tenā. Kafai e fakamautinoa aka me se mea tonu+ eiloa me ko oti ne fai a te mea fakatakalialia tenei i loto i Isalaelu,  e ‵tau mo koe o aumai a te tagata io me ko te fafine telā ne fai ne ia te mea masei tenei ki tua mo mataloa o te fakai, kae e ‵tau o peipei a te tagata io me ko te fafine tenā ke mate.+  Mai i molimau a tino e tokolua io me tokotolu+ e ‵tau ei o tamate a te tino tenā. E se ‵tau o tamate a ia ona ko te molimau a se tino e tokotasi.+  E ‵tau o pei muamua ne molimau konā a fatu ke tamate ei a ia, ko peipei ei ne nisi tino a ia mai tua ifo i ei. E ‵tau mo koe o tapale kea‵tea a te mea masei mai i a koutou.+  “Kafai e sae aka se fakalavelave i se fakai e tasi o koe telā e faigata ‵ki ke fai se fakamasinoga ki ei, faitalia me se fakalavelave e uiga ki te fakamaligi toto+ io me se tagi ki mea tau te tulafono io me se amioga fakasaua io me ne nisi kinauga aka, e ‵tau o tu aka koe ki luga kae fano ki te koga telā ka filifili aka ne Ieova tou Atua.+  Fano ki faitaulaga Levi mo te famasino+ telā e tu i aso konā o fesili ki ei e uiga ki te fakalavelave tenā, kae ka fai mai ne latou ki a koe te fakaikuga ko oti ne fai.+ 10  Tenā ko ‵tau ei mo koe o gasuesue e ‵tusa mo te lotou fakaikuga ne fai atu ne latou ki a koe mai te koga telā ne filifili ne Ieova. Fakaeteete koe kae ke fai a mea katoa ne fakatonu atu ne latou ki a koe. 11  E ‵tau mo koe o gasuesue e ‵tusa mo te tulafono ne fakaasi atu ne latou ki a koe penā foki mo te fakaikuga ne folafola atu ne latou ki a koe.+ Ke mo a eiloa ma ‵fuli kea‵tea koe ki te feitu fakaatamai io me ki te feitu fakamaui mai te fakaikuga telā ka tuku atu ne latou ki a koe.+ 12  A te tagata uiga fakamatamata telā e se fakalogo ki te faitaulaga telā e tavini ki a Ieova tou Atua io me ki te famasino e ‵tau eiloa o tamate.+ E ‵tau mo koe o tapale kea‵tea a te mea masei mai Isalaelu.+ 13  Kae ka ‵logo a tino katoa i ei kae ka ma‵taku, kae ka se toe uiga fakamata‵mata latou.+ 14  “Kafai ko ulu atu koe ki te fenua ka tuku atu ne Ieova tou Atua ki a koe kae ka puke mō koe te fenua tenā kae nofo i ei, kae fai aka koe, ‘Ke fakasopo aka ne au se tupu mō oku e pelā mo nisi fenua i oku tafa,’+ 15  e ‵tusa mo te mea tenā, e ‵tau eiloa o fakasopo aka ne koe se tupu telā ka filifili ne Ieova tou Atua.+ E ‵tau o fakasopo aka ne koe se tino mai ou taina ke fai mo tupu. E tapu ma fakasopo ne koe se tino mai fenua fakaa‵tea telā e se ko tou taina ke pule i a koe. 16  Kae e se ‵tau o uke ana solofanua io me fai ne ia a tino+ ke toe ‵foki ki Aikupito ke maua mai i ei a solofanua e uke atu,+ me ko oti ne fai atu a Ieova ki a koutou, ‘E se ‵tau eiloa mo koutou o toe ‵foki mai i te auala tenei.’ 17  E se ‵tau foki o puke ne ia ke tokouke ana avaga, ko te mea ke mo a ma takitaki ‵se tena loto;+ io me ‵sala a ia ki siliva mo aulo e uke.+ 18  Kafai ko sagasaga a ia i te nofogaaliki i tena malo, e ‵tau o tusi ne ia mō ia eiloa i se tusi* se ‵kopi o te Tulafono tenei, mai te tusi telā ne tausi ne faitaulaga Levi.+ 19  “E ‵tau eiloa o nofo mo ia te ‵kopi tenā, kae e ‵tau o faitau a ia ki ei i aso katoa o tena olaga,+ ko te mea ke malamalama a ia e uiga ki te mataku ki a Ieova tena Atua kae ke fakalogo ki pati katoa i te Tulafono tenei mo tulafono fo‵liki katoa konei ke fai ne ia.+ 20  Tela la, ka se mafai o maua ne ia te loto fia sili ki ana taina, kae ka se mafai o ‵fuli kea‵tea a ia mai te fakatonuga, ki te feitu fakaatamai io me ko te feitu fakamaui, ko te mea ke tumau a ia i se taimi leva i tena malo, ko ia mo ana tama tāgata i loto i Isalaelu.

Fakamatalaga mai lalo

Io me “se peluga tusi.”