Teutelonome 15:1-23

  • Te fakaseaiga o kaitalafu i taki fitu tausaga (1-6)

  • Te fesoasoani atu ki tino ma‵tiva (7-11)

  • Te fakasaolotoga o pologa i taki fitu tausaga (12-18)

    • Te mea fakapu taliga i te taliga o se pologa (16, 17)

  • Te fakatapuga o manu kolā ne toekimua (19-23)

15  “I te fakaotiga o taki fitu tausaga katoa e ‵tau o fakamagalo ne koe a kaitalafu a tino.+  E fai penei a te fakamagaloga o kaitalafu: A latou katoa kolā ne tuku fakakaitalafu olotou sene e ‵tau o fakamagalo ne latou olotou tuakoi mai olotou kaitalafu. E se ‵tau o fai ne te tino tenā ke ‵togi mai ne tena tuakoi io me ko tena taina a tena kaitalafu, me se kaitalafu telā e fakamagalo ke faka‵malu ei a Ieova.+  E ‵tau o fai koe ki te tino fakaa‵tea ke ‵togi mai tena kaitalafu,+ kae e ‵tau o fakamagalo ne koe te kaitalafu a tou taina i a koe.  Kae e seai se tino i a koutou e ‵tau o mativa, me ka fakamanuia eiloa ne Ieova a koe+ i te fenua telā ka tuku atu ne Ieova tou Atua mō koe e pelā me se tofi,  māfai fua e fakalogo faka‵lei koe ki te leo o Ieova tou Atua kae tausi faka‵lei a fakatonuga katoa kolā e tuku atu ne au i te aso nei.+  Me i a Ieova tou Atua ka fakamanuia ne ia koe e pelā eiloa mo tena tautoga ki a koe, kae ka tuku* atu au mea ki atufenua e uke kae ko koe e se manakogina ke fai sau kaitalafu;+ kae ka pule atu koe ki atufenua e uke, kae ka se pule atu latou ki a koe.+  “Kafai ko mativa se tokotasi o ou taina i loto i se fakai e tasi i te fenua telā ka tuku atu ne Ieova tou Atua ki a koe, sa loto makeke io me kaiu i tou taina mativa.+  Me e ‵tau mo koe o ‵tala atu tou lima mo te kaimalie ki a ia+ kae tuku* atu a te mea telā e manako a ia ki ei io me e ‵tau o maua ne ia.  Fakaeteete ke mo a ma isi se mafaufauga masei penei i tou loto, ‘Ko oko mai te fitu o tausaga, ko te tausaga e fakamagalo ei a kaitalafu,’+ kae e se kaimalie koe ki tou taina mativa kae seai ne au mea e tuku atu ki a ia. Kafai e fameo a ia ki a Ieova e uiga mō koe, ka fai a te mea tenā e pelā me se agasala ki a koe.+ 10  E ‵tau o kaimalie koe kae tuku atu a mea ki a ia,+ kae e se ‵tau o faimālō koe* ke tuku atu a mea ki a ia, me tenei te pogai ka fakamanuia ei ne Ieova tou Atua au faifaiga katoa e fai.+ 11  Me ka isi faeloa ne tino ma‵tiva i te fenua.+ Tenā te pogai e fakatonu atu ei au ki a koe, ‘E ‵tau mo koe o ‵tala tou lima mo te kaimalie ki tou taina telā e puapuaga kae mativa i tou fenua.’+ 12  “Kafai ne fakatau atu ki a koe se tokotasi o ou taina, se tagata io me se fafine Epelu, kae ne tavini atu ki a koe i tausaga e ono, e ‵tau o fakasaoloto ne koe a ia i te fitu o tausaga.+ 13  Kae kafai e fakasaoloto ne koe a ia, ke mo a ma tuku ne koe ke fano e aunoa mo ne mea i ana lima. 14  E ‵tau o tuku atu ne koe mo te kaimalie se mea mai tau lafu mamoe, tau koga tuki saito, mo tau mea ‵tau sinu mo uaina. E pelā eiloa mo te fakamanuiaga ne Ieova tou Atua a koe, e ‵tau foki o tuku ne koe ne mea ki a ia. 15  Ke masaua me i a koe ne fai pelā me se pologa i te fenua o Aikupito kae ko Ieova tou Atua ne fakasaoloto ne ia koe. Tenā te pogai e fakatonu atu ei au ki a koe ke fai te mea tenei i te aso nei. 16  “Kae kafai e fai atu a ia ki a koe, ‘Au e se fia fano kea‵tea mai i a koe!’ me e alofa a ia ki a koe mo tou kāiga, me ne fiafia a ia i te taimi ne ‵nofo ei mo koe,+ 17  tenā ko ‵tau ei o puke ne koe se mea fakapu taliga kae fakapu atu tena taliga i te mataloa, kae ka fai a ia mo fai tau pologa i tena olaga kātoa. Tenā foki te mea e ‵tau o fai ne koe ki tau pologa fafine. 18  Ke mo a ma fai pelā me se mea faigata māfai ko fakasaoloto ne koe a ia kae tiaki eiloa ne ia koe, me i ana galuega ne fai mō koe i loto i tausaga e ono, e ‵lei fakalua atu i lō se tino galue ‵togi, kae ne fakamanuia eiloa ne Ieova tou Atua a koe i au mea katoa ne fai. 19  “E ‵tau o fakatapu ne koe a toekimua tāgata katoa o au lafu pulumakau mo lafu mamoe ki a Ieova tou Atua.+ E se ‵tau mo koe o fakagalue a te tama muamua o tau lafu pulumakau,* io me ‵vele a fulufulu o te tama muamua o tau lafu mamoe. 20  E ‵tau o kai koe ki ei fakatasi mo tou kāiga i mua o Ieova tou Atua i tausaga takitasi i te koga e filifili ne Ieova.+ 21  Kae kafai e isi sena pona​—e ‵pili, e ‵kivi, io me se isi pona aka​—e se ‵tau mo koe o ofo atu a te manu tenā ki a Ieova tou Atua.+ 22  E ‵tau o kai koe ki ei i loto i ou fakai, fakatasi mo te tino telā e ‵ma mo te tino sē ‵ma, e pelā eiloa me kai koe ki se kasele io me se tia.+ 23  Kae e se ‵tau mo koe o kai ki tena toto;+ e ‵tau o ‵ligi ne koe ki te laukele e pelā me se vai.+

Fakamatalaga mai lalo

Io me “tuku fakakaitalafu.”
Io me “tuku fakakaitalafu.”
Epelu, “tou loto.”
Epelu, “pulumakau tagata.”