Teutelonome 14:1-29

  • Fakaasiga sē ‵lei o te fanoanoa (1, 2)

  • Meakai ‵ma mo meakai sē ‵ma (3-21)

  • Te tasi-vae-sefulu a Ieova (22-29)

14  “A koutou ko tama tāgata a Ieova te otou Atua. Sa katikati otou foitino+ io me ‵vele ke ‵kila otou fulumata* ona ko te mea ne mate se tino.+  Me i a koutou se fenua tapu+ ki a Ieova te otou Atua, kae ko oti ne filifili ne Ieova a koutou ke fai mo ana tino, ko ana tino fakapito,* mai tino katoa i luga i te lalolagi.+  “E se ‵tau mo koutou o ‵kai ki so se mea fakatakalialia.+  Konei a manu kolā e mafai o ‵kai koutou ki ei:+ te pulumakau tagata, te mamoe, te kouti,  te tia, te kasele, te imula, te kouti vao, te anitilope, te mamoe vao, mo te mamoe o mauga;  e mafai o ‵kai koutou ki so se manu telā e va tena alofivae ki vaega e lua kae e kai fakalua tena mama.  Kae e se ‵tau mo koutou o ‵kai ki manu konei e kai fakalua olotou mama io me kolā e va olotou alofivae: te kamela, te lapiti, te lokipatia me e ‵kai fakalua olotou mama kae e se va olotou alofivae. A manu konā e se ‵ma mō koutou.+  E penā foki te puaka me e va tena alofivae kae e se kai fakalua tena mama. E se ‵ma a te mea tenā mō koutou. E se ‵tau mo koutou o ‵kai ki olotou ‵kano io me pa‵tele ki olotou foitino ‵mate.  “Kae ko mea ola katoa i te vai, e mafai o ‵kai koutou ki ei: So se mea telā e isi ne ana tala mo unafi, e mafai o ‵kai koutou ki ei.+ 10  Kae e se ‵tau mo koutou o ‵kai ki so se mea telā e seai ne ana tala mo unafi. A te mea tenā e se ‵ma mō koutou. 11  “E mafai o ‵kai koutou ki so se manu eva telā e ‵ma. 12  Kae e se ‵tau mo koutou o ‵kai ki mea konei: te aeto, te pusate, te valatua uli,+ 13  te kite kula, te kite uli, mo so se vaegā kilite, 14  so se vaegā leveni, 15  te osetelite, te lulu, te kanapu mo so se vaegā falakone, 16  te lulu foliki, te lulu taliga ‵loa, te suani, 17  te pelikane, te valatua, te komolane, 18  te sikala, so se vaegā matuku, te hupose, mo te pate. 19  A manu* fai kapakau katoa kolā e oloolo fakatasi e se ‵ma foki mō koutou. E se ‵tau o ‵kai ki ei. 20  E mafai o ‵kai koutou ki so se manu eva telā e ‵ma. 21  “E se ‵tau mo koutou o ‵kai ki so se manu telā ne maua atu ko mate.+ E ‵tau o tuku atu ne koutou a te manu tenā ki te tino fakaa‵tea telā e nofo i loto i otou fakai, kae e mafai o kai a ia ki ei, io me fakatau atu ki se tino mai fenua fakaa‵tea. Me i a koutou se fenua tapu ki a Ieova te otou Atua. “E se ‵tau mo koe o saka se tamā kouti ki vai ū o tena mātua.+ 22  “E se ‵tau eiloa o fakatamala koe o tuku atu te tasi-vae-sefulu o au fuataga katoa i tou fatoaga i tausaga takitasi.+ 23  Ka kai koe ki te tasi-vae-sefulu o au fuataga, au uaina fou, au sinu, mo te toekimua o au lafu pulumakau mo au lafu mamoe i mua o Ieova tou Atua i te koga telā e filifili ne ia ke tuku i ei tena igoa,+ ko te mea ke iloa ne koe o mataku faeloa ki a Ieova tou Atua.+ 24  “Kae kafai ko tō loa te malaga ki a koe kae e se mafai o ave ne koe a mea konā ki te koga e filifili ne Ieova tou Atua mo fai te koga e tuku ei tena igoa+ me ko tō ‵mao te koga tenā ki a koe (me i a Ieova tou Atua ka fakamanuia ne ia koe), 25  e mafai o ‵fuli ne koe a mea konā ki tupe, ko faimalaga ei koe mo tupe konā i ou lima ki te koga telā ka filifili ne Ieova tou Atua. 26  Ko fakaaoga ei ne koe a tupe ki so se mea e manako koe ki ei​—ki pulumakau, mamoe, kouti, uaina mo nisi meainu ma‵losi, mo so se mea e fiafia koe ki ei; kae ka kai koe i te koga tenā i mua o Ieova mo te fiafia, ko koe mo tou kāiga.+ 27  Kae ke mo a ma manatu māmā koe ki te tino Levi telā e nofo i ou fakai,+ me e seai sena vaega io me sena tofi e maua fakatasi mo koe.+ 28  “I te fakaotiga o taki tolu tausaga katoa, e ‵tau o aumai ne koe a te tasi-vae-sefulu o au mea katoa i te tausaga tenā o ‵teu i loto i ou fakai.+ 29  A te tino Levi telā e seai sena vaega io me sena tofi e maua fakatasi mo koe, te tino fakaa‵tea, te tamaliki e seai sena tamana, mo te fafine ko mate tena avaga kolā e ‵nofo i loto i ou fakai, ka ‵mai o ‵kai ke ma‵kona,+ ko te mea ke mafai ne Ieova tou Atua o fakamanuia koe i au mea katoa e fai.+

Fakamatalaga mai lalo

Io me “‵vele otou muālae.”
Io me “kope tāua.”
Io me “tamā manu fo‵liki.”