Teutelonome 13:1-18

  • Faifaiga e ‵tau o fai ki aposetate (1-18)

13  “Kafai e sae aka se pelofeta io me se tino fakamatala moemiti i a koutou kae fai atu ne ia se fakailoga io me fakamatala atu ne ia se mea ka tupu i aso mai mua,  kae taunu eiloa te fakailoga io me ko te mea telā ne fai mai a ia me ka tupu i aso mai mua kae fai mai a ia, ‘Ke na tau‵tali atu nei tatou ki nisi atua kolā e seki iloa ne tatou, kae ke tavini atu tatou ki a latou,’  e se ‵tau mo koutou o faka‵logo ki pati a te pelofeta io me ko te tino fakamatala moemiti tenā,+ me i a Ieova te otou Atua e tofotofo ne ia koutou+ ke iloa ne ia me ko koutou e a‵lofa ki a Ieova te otou Atua mo otou loto kātoa mo otou ola kātoa io me ikai.+  E ‵tau o tau‵tali koutou i a Ieova te otou Atua, e ‵tau o ma‵taku koutou ki a ia, e ‵tau o faka‵logo koutou ki ana fakatonuga, e ‵tau o faka‵logo koutou ki tena leo, e ‵tau o tavini koutou ki a ia kae e ‵tau o ‵piki ‵mau koutou ki a ia.+  Kae ko te pelofeta io me ko te tino fakamatala moemiti tenā e ‵tau o tamate,+ me ne fakamalosi aka ne ia a te ‵tekeatuga ki a Ieova te otou Atua​—telā ne aumai ne ia koutou ki tua mo te fenua o Aikupito kae fakasaoloto ne ia koe mai te koga ne nofo pologa i ei koe​—ke ‵fuli koe mai te auala ne fakatonu atu ne Ieova tou Atua ke sasale koe i ei. Kae e ‵tau mo koe o tapale kea‵tea a te mea masei mai loto i a koutou.+  “Kafai a tou taina, te tama tagata a tou mātua, io me ko tau tama tagata io me ko tau tama fafine io me ko tau avaga fakapelepele io me ko tou taugasoa pele, e taumafai o fakakolekole koe i se auala ‵funa, kae fai atu penei, ‘Ke na olo nei tatou o tavini atu ki nisi atua,’+ kolā e seki iloa ne koe io me ko otou tupuga,  mai atua o tino i otou tafa, faitalia me ‵nofo pili atu ki a koe io me ‵nofo ‵mao mai i a koe, mai te feitu e tasi o te fenua ke oko ki te suā feitu o te fenua,  e se ‵tau mo koe o talia a ia io me fakalogo ki a ia,+ io me fakaasi atu te alofa io me ko te alofa atafai ki a ia io me puipui a ia;  i lō te fai penā e ‵tau o tamate ne koe a ia.+ Ko koe e ‵tau o pei muamua ne koe te fatu ki a ia ke tamate ei a ia, ko peipei ei ne nisi tino a ia mai tua o koe.+ 10  Kae e ‵tau mo koe o peipei a ia ki fatu ke mate,+ me ne taumafai a ia o ‵fuli koe kea‵tea mai i a Ieova tou Atua, telā ne aumai ne ia koe ki tua mo te fenua o Aikupito, mai te koga ne nofo pologa i ei koe. 11  Kae ka ‵logo a Isalaelu kātoa i ei ko ma‵taku ei, ko se toe fai ei ne latou se mea masei penei i loto i a koutou.+ 12  “Kafai e logo koe i se tala i loto i se fakai e tasi, telā ka tuku atu ne Ieova tou Atua ke nofo koe i ei, penei, 13  ‘E isi ne tāgata seai ne aoga ne olo atu mai i a koutou kae taumafai o ‵fuli kea‵tea a tino e ‵nofo i te lotou fakai, olotou muna: “Ke na olo nei tatou o tavini atu ki nisi atua,” ko atua kolā e seki iloa ne koutou,’ 14  e ‵tau o onoono koe ki te mea tenā, kae iloilo faka‵lei kae sukesuke foki koe ki ei;+ kae kafai ko oti ne fakamautinoa aka me i te mea fakatakalialia tenei i loto i a koutou se mea tonu eiloa, 15  e ‵tau eiloa o ‵ta fakavave ne koe a tino o te fakai tenā ki te pelu.+ Tuku atu a te fakai tenā mo mea katoa i loto i ei, e aofia i ei ana lafu manu, ke fakamasei+ ki te pelu. 16  Tenā ko ‵tau ei o puke mai ne koe a mea katoa kolā ne ‵toe mai i ei ki loto i te kogaloto o te fakai kae ‵sunu a te fakai ki te afi, kae ka fai a mea ‵toe o te fakai e pelā me se taulaga kātoa ki a Ieova tou Atua. Ka fai eiloa e pelā me se fakaputuga tumau o mea kolā ne fakamaseigina. E se ‵tau eiloa o toe fakatu aka te fakai tenā. 17  E se ‵tau eiloa o puke ne koe ki ou lima a mea kolā ko oti ne tuku ke fakamaseigina,+ ko te mea ke ‵fuli kea‵tea a Ieova mai tena kaitaua telā e ‵ka pelā me se afi kae fakaasi atu ki a koe a te alofa fakamagalo mo tena alofa atafai, kae fakatokouke ne ia koe, e pelā eiloa mo tena tautoga ki ou tupuga.+ 18  Me e ‵tau eiloa mo koe o fakalogo ki a Ieova tou Atua mai te tausiga o ana fakatonuga katoa kolā e fakatonu atu ne au i te aso nei, kae ka fai ei ne koe a te mea tonu i te kilokiloga a Ieova tou Atua.+

Fakamatalaga mai lalo