Teutelonome 12:1-32

  • Tapuaki i te koga ne filifili ne te Atua (1-14)

  • Ko talia ke ‵kai ki ‵kano o manu kae e se ko te toto (15-28)

  • Ke mo a ma maleigina koutou ne nisi atua (29-32)

12  “Konei a tulafono fo‵liki mo ikuga o fakamasinoga kolā e ‵tau o faka‵logo faka‵lei koutou ki ei i aso katoa e ola ei koutou i te fenua telā ka tuku atu ne Ieova te Atua o otou tupuga mō koutou.  E ‵tau o ofa katoatoa ne koutou a koga katoa kolā ne tavini atu i ei ki olotou atua+ a tino o fenua kolā ka fakatakavale ne koutou, faitalia me ‵tu a mea konā i luga i mauga ma‵luga io me i tamā mauga io me mai lalo o lakau ola ‵lei.  E ‵tau o ofa ne koutou ki lalo olotou fatafaitaulaga, tuki olotou pou fatu tapu,+ ‵sunu olotou pou lakau tapu* ki te afi kae ‵kati ki lalo a fakatusa o olotou atua,+ kae ‵solo kea‵tea olotou igoa mai koga konā.+  “E se ‵tau mo koutou o tapuaki ki a Ieova te otou Atua i te auala tenā.+  Kae ‵sala atu ki a Ieova te otou Atua i so se koga telā e filifili ne ia ke fakatu i ei tena igoa mo tena koga nofo mai i otou matakāiga katoa, kae olo atu ki ei.+  Tenā te koga e ‵tau o aumai ki ei otou taulaga ‵sunu,+ otou taulaga, otou tasi-vae-sefulu,+ ko mea kolā e tuku mai i otou lima,+ otou taulaga o te tautoga, otou taulaga o te lotomalie,+ mo toekimua o otou lafu pulumakau mo lafu mamoe.+  E ‵tau mo koutou mo otou kāiga o ‵kai i te koga tenā i mua o Ieova te otou Atua+ kae ke fia‵fia ki mea katoa e fai ne koutou,+ me ko oti ne fakamanuia a koe ne Ieova tou Atua.  “E se ‵tau mo koutou o fai a te mea telā ko fai ne tatou i te aso nei, e fai ne so se tino a te mea telā e tonu i tena kilokiloga,*  me e seki oko atu koutou ki te koga malō‵lo+ mo te tofi telā ka tuku atu ne Ieova te otou Atua ki a koutou. 10  Kafai e olo atu koutou ki te suā feitu o te Iolitana+ kae ‵nofo i te fenua telā ka tuku atu ne Ieova te otou Atua mō koutou, ka puipui eiloa ne ia koutou mai i fili katoa o koutou i otou tafa, kae ka ‵nofo koutou mo te tokagamalie.+ 11  A mea katoa kolā ne fakatonu atu ne au ki a koutou ka aumai ne koutou ki te koga telā e filifili ne Ieova te otou Atua ke tuku i ei tena igoa+​—ko otou taulaga ‵sunu, otou taulaga, otou tasi-vae-sefulu,+ ko mea e tuku mai i otou lima, mo so se taulaga o te tautoga telā ne tauto koutou ki a Ieova. 12  Ka fia‵fia eiloa koutou i mua o Ieova te otou Atua,+ ko koutou mo otou tama tāgata, otou tama fāfine, otou pologa tāgata mo pologa fāfine, mo te tino Levi i i loto i otou fakai, me e seai sena vaega io me se tofi o ia i a koutou.+ 13  Fakaeteete ke mo a ma ofo atu ne koe tau taulaga ‵sunu i so se koga e lavea ne koe.+ 14  E ‵tau fua o ofo atu ne koe tau taulaga ‵sunu i te koga telā ko oti ne filifili ne Ieova i se kogā fenua e tasi a tou matakāiga, kae e ‵tau o fai ne koe i konā a mea katoa kolā ne fakatonu atu ne au ki a koe.+ 15  “Kae i so se taimi e manako koe ki ei, e mafai o tamate kae kai koe ki ‵kano o manu,+ e ‵tusa mo te fakamanuiaga ne tuku atu ne Ieova tou Atua ki a koe i ou fakai katoa. E mafai o kai ki ei a te tino telā e se ‵ma mo te tino telā e ‵ma, e pelā eiloa mo koe ma kai ki te manu ko te kasele io me ko te tia. 16  Kae e se ‵tau mo koutou o ‵kai ki te toto;+ e ‵tau o ‵ligi ne koutou ki te laukele e pelā me ne vai.+ 17  Ka se talia ke kai ne koe i loto i ou fakai a te tasi-vae-sefulu o au fuataga, au uaina ‵fou, au sinu, te toekimua o au lafu pulumakau mo lafu mamoe,+ so se taulaga o te tautoga telā e tauto koe ki ei, au taulaga o te lotomalie, io me ko mea kolā e tuku mai ne tou lima. 18  E ‵tau o kai ne koe a mea konei i mua o Ieova tou Atua i te koga ka filifili ne Ieova tou Atua+—ko koe mo tau tama tagata, tau tama fafine, tau pologa tagata mo tau pologa fafine, mo te tino Levi telā e nofo i loto i ou fakai; kae ka fia‵fia koe i mua o Ieova tou Atua i au mea katoa e fai. 19  Fakaeteete ke mo a ma puli i a koe a te tino Levi+ i taimi katoa e ola ei koe i tou fenua. 20  “Kafai ko fakalasi aka ne Ieova tou Atua a tou kogā fenua,+ e pelā eiloa mo tena tautoga ki a koe,+ kae fai aka koe, ‘Au e fiakai ki ‵kano o manu,’ ona ko koe e manako o kai ki ‵kano o manu, e mafai koe o kai ki ‵kano o manu i so se taimi e manako koe ki ei.+ 21  Kafai e ‵mao mai i a koe a te koga ne filifili ne Ieova tou Atua ke tuku i ei tena igoa,+ e ‵tau o tamate ne koe ne pulumakau mai tau lafu pulumakau io me ne mamoe mai tau lafu mamoe telā ne tuku atu ne Ieova ki a koe, e pelā eiloa mo taku fakatonuga ki a koe, kae e ‵tau o kai koe ki ei i loto i ou fakai i so se taimi e manako koe ki ei. 22  E mafai o kai koe ki ei e pelā eiloa mo koe māfai e kai ki te manu ko te kasele mo te tia;+ e mafai o kai ki ei a te tino telā e se ‵ma mo te tino telā e ‵ma. 23  Kae e ‵tau o fakaiku aka ne koe mo te mautinoa ke mo a ma kai ki te toto,+ me i te toto ko te ola+ kae e se ‵tau mo koe o kai ki te ola fakatasi mo ‵kano. 24  E se ‵tau mo koe o kai ki ei. E ‵tau o ‵ligi ne koe ki te laukele e pelā me ne vai.+ 25  E se ‵tau mo koe o kai ki ei, ko te mea ke fanofano ‵lei a mea katoa mō koe mo au tama mai tua ifo o koe, me ko fai ne koe a te mea tonu i te kilokiloga a Ieova. 26  E ‵tau fua o puke ne koe au mea kolā e tapu mo au taulaga o te tautoga māfai ko vau koe ki te koga telā ka filifili ne Ieova. 27  Tenā te koga ka ofo atu ei ne koe au taulaga ‵sunu, ko ‵kano mo toto,+ i luga i te fatafaitaulaga a Ieova tou Atua, kae ko toto o au taulaga e ‵tau o ‵ligi ki luga i te fatafaitaulaga+ a Ieova tou Atua, kae e mafai o kai ne koe a ‵kano. 28  “E ‵tau o fakalogo faka‵lei koe ki pati katoa konei ne fakatonu atu ne au, ko te mea ke fanofano ‵lei a mea katoa mō koe mo au tama tāgata mai tua ifo o koe, me ko fai ne koe a te mea ‵lei kae tonu i te kilokiloga a Ieova tou Atua. 29  “Kafai ko ‵ta fakapalele ne Ieova tou Atua a atufenua kolā ka fakatakavale ne koe,+ kae ko ola koe i te lotou fenua, 30  fakaeteete ke mo a ma maleigina koe māfai ko oti ne ‵ta fakapalele atu latou i ou mua. Ke mo a ma fesili koe e uiga ki olotou atua, kae fai atu, ‘Ne tavini atu pefea a fenua konei ki olotou atua? Au foki ka fai penā.’+ 31  E se ‵tau mo koe o fai a te mea tenei ki a Ieova tou Atua, me e fai ne latou ki olotou atua a mea fakatakalia‵lia katoa kolā e takalialia ki ei a Ieova, kae ‵sunu foki olotou tama tāgata mo tama fāfine ki te afi ke ofo atu ki olotou atua.+ 32  E ‵tau eiloa o fai ne koutou a pati katoa kolā e fakatonu atu ne au ke fai ne koutou.+ E se ‵tau mo koutou o fakaopoopo ne mea ki ei io me toese kea‵tea ne mea mai i ei.+

Fakamatalaga mai lalo

Onoono ki te FP.
Io me “ko te mea telā e mafaufau a ia me tonu.”