Tanielu 6:1-28

  • Ko fai ne ofisa o Pelesia se togafiti ki a Tanielu (1-9)

  • Ne ‵talo atu faeloa a Tanielu (10-15)

  • Ko ‵pei a Tanielu ki te lua o leona (16-24)

  • Ko fakaaloalo a te Tupu ko Taliu ki te Atua o Tanielu (25-28)

6  Ne foliga ‵lei ki a Taliu ke faka‵sopo aka ana tino pule e toko 120 ke pule atu ki te malo kātoa.+  E pule atu ki a latou ko ofisa ma‵luga e tokotolu, kae tokotasi mai i ei ko Tanielu;+ kae ko tino pule+ e ‵tau o lipoti atu ki a latou, ko te mea ke seai ne mea a te tupu e ‵galo.  A Tanielu e tu ‵kese eiloa a ia mai i nisi ofisa ma‵luga mo tino pule, me e ‵kese eiloa tena atamai,+ kae ne manako te tupu o fakamaluga aka a ia i te malo kātoa.  I te taimi tenā, a ofisa ma‵luga mo tino pule ne salasala ki se pogai ke fai ne ‵losiga ‵teke ki a Tanielu e uiga ki mea o te malo, kae ne seki mafai o maua ne latou se pogai ke fai ki ei se ‵losiga io me se mea fakamasei, me i a ia e fakatalitonugina kae seai se fakatamala io me fai mea pikopiko e maua i a ia.  Tenā ne fai atu ei a tāgata konei: “E seai se pogai e maua ne tatou ke ‵losi atu ki a Tanielu, seiloga ke maua ne tatou se mea e ‵teke atu ei ki a ia i te tulafono o tena Atua.”+  Tenā ne olo atu ei a ofisa ma‵luga konei mo tino pule e pelā me se potukau ki mua o te tupu, kae ne fai atu latou ki a ia: “Te Tupu ko Taliu, ke ola koe ki te se-gata-mai.  A ofisa katoa a te tupu, takitaki, tino pule, ofisa ma‵luga a te tupu mo kovana ne fai‵pati fakatasi ke fai se fakatonuga mai i te tupu kae ke fai se fakataputapuga, me i aso e 30 so se tino e fakatagi atu ki so se atua io me se tagata i tafa o koe, e te tupu, e ‵tau o ‵pei ki loto i te lua o leona.+  Nei la, e te tupu, ke fai ne koe se fakatonuga kae saina i ei,+ ko te mea ke se mafai eiloa o ‵fuli, e ‵tusa mo te tulafono a tino Metai mo Pelesia, kolā e se mafai o fakaseaoga.”+  Tenā ne saina ei ne te Tupu ko Taliu te fakatonuga mo te fakataputapuga tenā. 10  Kae i te taimi ne iloa ei ne Tanielu a te fakatonuga telā ko oti ne saina, ne fano a ia ki tena fale, telā e isi ne famalama o tena potu i te tuafale kolā e ‵tala ki te feitu ki Ielusalema.+ Kae e tolu taimi i te aso e totuli sāle ei a ia ki lalo o ‵talo kae ‵viki atu i mua o tena Atua, e pelā eiloa mo tena faifaiga masani kae koi tuai o tupu te mea tenei. 11  I te taimi tenā ne ulu fakavave mai ei a tāgata konā kae maua atu ne latou a Tanielu e ‵talo kae fakatagi atu mō te taliaga a te Atua. 12  Tenā ne olo atu ei latou ki te tupu kae fakamasaua atu ki a ia e uiga ki te fakataputapuga ne fai ne te tupu: “E a, e seki ai se fakataputapuga ne fai ne koe me i aso e 30 so se tagata e fakatagi atu ki so se atua io me se tagata i tafa o koe, e te tupu, e ‵tau o ‵pei ki te lua o leona?” Ne tali atu te tupu: “Ko oti eiloa ne faka‵mautakitaki faka‵lei a te mea tenā e ‵tusa mo tulafono a te kau Metai mo Pelesia, telā e se mafai o fakaseaoga.”+ 13  Ne fai fakavave atu latou ki te tupu: “A Tanielu, telā se tino ne puke fakapagota mai i Iuta,+ ne seki fakaaloalo atu ki a koe, e te tupu, io me ki te fakataputapuga ne saina ne koe, kae e ‵talo+ atu eiloa a ia fakatolu taimi i te aso.” 14  I te logoga eiloa a te tupu i te mea tenei, ne fanoanoa malosi a ia, kae ne taumafai a ia o mafaufau ki se auala ke fakasao ei a Tanielu; kae ke oko eiloa ki te ‵toga o te mata o te la, ne fai ne ia a taumafaiga e uke ke fakasao ei tou tagata. 15  Fakamuli loa, ne olo atu a tāgata konei e pelā me se potukau ki te tupu, kae ne fai atu latou ki te tupu, “Ke masaua, e te tupu, a te tulafono a tino Metai mo Pelesia me i so se fakataputapuga io me se fakatonuga telā ne fai ne te tupu e se mafai eiloa o ‵fuli.”+ 16  Ne fai te fakatonuga a te tupu, kae ne aumai ne latou a Tanielu kae ‵pei atu a ia ki te lua o leona.+ Muna a te tupu ki a Tanielu: “A tou Atua telā e tavini atu faeloa koe ki ei ka fakasao ne ia koe.” 17  Tenā ne aumai ei se fatu kae tuku i luga i te auala ki loto i te lua, kae ne fakamailoga ne te tupu a te mea tenā ki tena mama fakamailoga mo mama fakamailoga a ana tino tāua, ko te mea ke seai se mea e mafai o ‵fuli e uiga ki a Tanielu. 18  Tenā ne fano ei te tupu ki tena palesi. Ne fakalikiliki a ia i te po tenā kae e se manako ki fakafiafiaga, kae ne seki mafai o tō tena moe. 19  Fakamuli loa, i te mainaga muamua eiloa o te vaveao, ne tu aka te tupu kae fano fakavave ki te lua o leona. 20  I tena piliatuga ki te lua, ne kalaga atu a ia ki a Tanielu i se leo fanoanoa. Ne fesili atu te tupu ki a Tanielu: “Tanielu, te tavini a te Atua ola, e a, ne fakasao koe mai i leona ne tou Atua telā e tavini faeloa koe ki ei?” 21  Ne tali fakavave atu a Tanielu ki te tupu: “Te tupu, ke ola koe ki te se-gata-mai. 22  A toku Atua ne uga mai ne ia tena agelu ke ‵pono a gutu o leona,+ kae ne seki fakapakia ne latou au,+ me e seai saku mea ‵se ne fai i ana mua; io me ne fai ne au se mea ‵se ki a koe, e te tupu.” 23  Ne fiafia malosi te tupu, kae ne fakatonu atu a ia ke avaka a Tanielu ki tua mo te lua. I te taimi ne avaka ei a Tanielu ki tua mo te lua, e seai eiloa sena pakiaga, me ne talitonu a ia ki tena Atua.+ 24  Tenā ne fai atu ei te fakatonuga a te tupu, kae ko tāgata kolā ne ‵losi atu ki a Tanielu ne puke mai, kae ne ‵pei atu latou ki te lua o leona, fakatasi mo olotou tama mo olotou avaga. E seki pa‵tele latou ki lalo i te lua kae ko oko atu a leona ki a latou kae fatifati likiliki olotou ivi katoa.+ 25  Tenā ne tusi atu ei a te Tupu ko Taliu ki tino katoa, atufenua, mo ‵gana kolā e ‵nofo i te lalolagi kātoa:+ “Ke lasi te otou filemu! 26  Ko avatu ne au se fakatonuga me e ‵tau mo tino katoa i so se koga o toku malo o ma‵taku i mua o te Atua o Tanielu.+ Me i a ia ko te Atua ola kae tumau a ia ki te se-gata-mai. A tena malo ka se mafai o fakaseai atu, kae ko tena pulega e tumau ki te se-gata-mai.+ 27  A ia e faka‵sao,+ e fakaola, kae fai a fakailoga mo mea fakaofoofogia i te lagi mo te lalolagi,+ me ne fakasao ne ia a Tanielu mai i lima o leona.” 28  Tela la, ne manuia a Tanielu i te malo o Taliu+ mo te malo o Kulesa te tino Pelesia.+

Fakamatalaga mai lalo