Salamo 72:1-20
E uiga ki a Solomona.
72 Te Atua, tuku atu au fakamasinoga ki te tupu,Kae tuku atu ki te tama tagata a te tupu a tou amiotonu.+
2 Ke ‵lago atu eiloa a ia ki ou tino i te amiotonu,Mo ou tino ma‵lalo ki te fakamasinoga tonu.+
3 Ke aumai ne mauga a te filemu ki tino,Kae ke aumai ne tamā mauga a te amiotonu.
4 Ke ‵pulu ne ia a tino ma‵lalo o te fenua,Ke fakaola ne ia a tama a tino ma‵tiva,Kae ke tuki pala ne ia a te tino kaisoa.+
5 Ka ma‵taku latou ki a koe i te taimi e isi ei se laMo te taimi e isi ei se masina,Mai te kautama e tasi ki te suā kautama.+
6 Ka fai a ia e pelā mo te vaiua telā e ‵to ki luga i mouku ko oti ne ‵kati,E pelā mo vaiua ‵lotu kolā e fakasiusiu i ei te laukele.+
7 I ana aso a tino amio‵tonu ka lauolaola,+Kae ka lasi te filemu+ ke oko ki te taimi ko seai ei se masina.
8 Ka isi ne tino e ‵nofo mai lalo i* a ia mai te tai e tasi ke oko atu ki te suā taiKae mai te Vaitafe* ke oko ki koga ‵mao o te lalolagi.+
9 A tino faima‵laga i toafa ka punou ki lalo i ana mua,Kae ko ana fili ka sepo ne latou a ‵pefu.+
10 A tupu o Talasisi mo fenua fo‵liki ka aumai olotou meaalofa.+
A tupu o Seepa mo Sepā ka tuku atu olotou meaalofa.+
11 A tupu katoa ka ifo ki lalo i ana mua,Kae ko atufenua katoa ka tavini atu ki a ia.
12 Me ka fakasao ne ia te tino mativa telā e tagi mō se fesoasoani,E pelā foki mo te tino malalo mo so se tino e seai sena fesoasoani.
13 Ka alofa a ia ki tino ma‵lalo mo tino ma‵tiva,Kae ka fakaola ne ia a tino ma‵tiva.
14 Ka faka‵sao ne ia latou mai pulega fakasaua mo fakasauaga,Kae ko olotou toto ka tāua i tena kilokiloga.
15 Ke ola eiloa a ia kae tuku atu ki ei te aulo o Seepa.+
Ke ‵talo atu faeloa e uiga ki a ia,Kae ke maua eiloa ne ia a fakamanuiaga i taimi katoa.
16 Ka malaku eiloa a saito i te laukele;+Ka ‵fonu a taulu o mauga.
Ana fuagalakau ka lauolaola e pelā mo fuagalakau o Lepanona,+Kae i loto i te fakai a tino ka ‵pula mai e pelā mo lakau kaina o te laukele.+
17 Ke tumau eiloa a tena igoa ki te se-gata-mai,+Kae ke manuia faeloa e pelā mo te la.
Ke maua ne tino a fakamanuiaga mō latou eiloa e auala i a ia;+Ke taku ne atufenua katoa a ia me e fiafia.
18 Ke vikia a Ieova te Atua, te Atua o Isalaelu,+Telā e fai tokotasi ne ia a mea fakaofoofogia.+
19 Ke vikia tena igoa ‵malu ki te se-gata-mai,+Kae ke ‵fonu a te lalolagi i tena ‵malu.+
Amene kae Amene.
20 Tenei te fakaotiga o ‵talo a Tavita, te tama tagata a Iese.+
