Salamo 64:1-10
-
Se puipuiga mai taua e fai ‵funa
-
“Te Atua ka sana atu ki a latou” (7)
-
Ki te takitaki o te kau fai pese. Ko te pese a Tavita.
64 Fakalogo mai ki toku leo, e te Atua, i te taimi e fai ei taku fakatagi.+
Puipui toku ola mai mea fakama‵taku a te fili.
2 Ke ‵funa aka ne koe au mai aofaga ‵funa a tāgata ma‵sei,+Mai te potukau o tino fai mea ‵se.
3 E fakamata ne latou olotou alelo e pelā eiloa mo te pelu;E faka‵tonu ne latou olotou pati fakalogo‵mae e pelā me ne matasana,
4 Ke sana ki ei te tino e seai sena ‵se mai olotou koga ‵muni;E sana fakavave ne latou a ia, e aunoa mo te ma‵taku.
5 E taofi ‵mau latou ki olotou taumafaiga matagā;*E sau‵tala latou ki auala ke ‵funa ei olotou matasele.
E fai aka latou: “Ko oi ka lavea ne ia a mea konā?”+
6 E salasala latou ki auala ‵fou e fai ei a mea ‵se;E fakatoka lēmū ne latou olotou aofaga faitogafiti;+A mafaufauga i loto o tino taki tokotasi e faigata o malamalama i ei.
7 Kae ko te Atua ka sana atu ki a latou;+Ka pa‵kia fakavave latou i se matasana.
8 Ko olotou alelo eiloa ka fai ei ke ‵siga latou;+A latou katoa kolā e ‵kilo atu ki ei ka lūlū olotou ulu.
9 Tenā ko ma‵taku ei a tāgata katoa,Kae ka folafola atu ne latou a mea katoa ne fai ne te Atua,Kae ka ‵loto te lotou malamalama e uiga ki ana faifaiga.+
10 A tino amio‵tonu ka fia‵fia i a Ieova kae faka‵lafi atu ki a ia;+A tino fai mea tonu i te loto ka fia‵fia.
Fakamatalaga mai lalo
^ Io me “E fakamalosi atu latou ki te suā tino ke fai a mea matagā.”
