Salamo 45:1-17

  • Te fakaipoipoga a te tupu ne fakaekegina

    • E faipati ki pati ‵gali (2)

    • “A te Atua ko tou nofogaaliki ki te se-gata-mai” (6)

    • E manako malosi te tupu ki te tinogali o te fafine ka fakaipoipo (11)

    • E fai a tama tāgata e pelā me ne pelenise i te lalolagi kātoa (16)

Ki te takitaki o te kau fai pese; ne fai ki “Te Lili.” Ko te salamo a tama tāgata a Kola.+ Masekila.* Se pese o te alofa. 45  A toku loto ko fakamalosi aka ne se mea ‵lei. Aku muna: “A taku pese se pese e uiga ki se tupu.”+ Ke fai toku alelo e pelā mo te ‵peni fiti+ a te tino laga tusi atamai.+   A koe ko te ‵toe tino taulekaleka eiloa i tama a tāgata. A pati ‵gali e ‵to mai i tou gutu.+ Tenā te pogai ne fakamanuia ei koe ne te Atua ki te se-gata-mai.+   Faka‵mau tau pelu+ ki tou feitu, e te tino mafi,+I tou tulaga ‵malu mo te gali.+   Kae mai tou gali ke na fanatu koe o manumalo;*+Tele atu i te auala o te munatonu mo te loto maulalo mo te amiotonu,+Kae ka fakataunu* ne tou lima fakaatamai a mea fakaofoofogia.   A matasana a koe e mata ‵kai, kae fai i ei a tino ke ‵siga i ou mua;+E ‵suki ne latou a loto o fili o te tupu.+   A te Atua ko tou nofogaaliki ki te se-gata-mai, se-gata-mai eiloa;+A te tokotoko o tou malo se tokotoko o te fai mea tonu.*+   E fiafia eiloa koe ki te amiotonu,+ kae takalialia koe ki amioga ma‵sei.+ Tenā te pogai ne fakaeke ei koe+ ne te Atua, tou Atua, ki te sinu o te fiafia+ telā e sili atu i lō ou taugasoa.   Ou gatu katoa e ma‵nogi mulo mo te lakau ko te aloe mo te kasia;Mai te palesi gali telā e teu ki nifo o elefane, e fiafia koe ona ko kitala.   A tama fāfine a tupu e aofia i fāfine kolā e fakaaloalogina. A te tupu fafine ko tu i tena tulaga i tou feitu fakaatamai, kae teu fakagaligali ki aulo o Ofeila.+ 10  Fakalogo mai, e taku tama fafine, saga tonu mai kae tuku mai ou taliga;Fakapuli atu ou tino mo te kāiga o tou tamana. 11  Kae ka manako malosi te tupu ki tou tinogali,Me i a ia ko tou aliki,Tela la, ifo eiloa ki lalo i a ia. 12  A te tama fafine a Tulo ka vau mo se meaalofa;A toe tāgata mau‵mea eiloa ka ‵sala ki tau taliaga. 13  I loto i te palesi,* a te tama fafine a te tupu ko sili eiloa i te tinogali;Ana gatu e teu fakagali‵gali ki aulo. 14  Ka aumai tou fafine ki te tupu i gatu ‵laga ‵togi ‵mafa. A tamafine ‵ma kolā e tau‵tali mai i ana tua ka aumai ki mua o koe. 15  Ka aumai latou fakatasi mo te fia‵fia mo te ‵lifu;Ka ulu atu latou ki loto i te palesi o te tupu. 16  Au tama tāgata ka sui ne latou ou tupuga. Ka faka‵sopo aka ne koe latou e pelā me ne pelenise i te lalolagi kātoa.+ 17  Ka fai ne au ke lauiloa tou igoa i kautama katoa fakamuli.+ Tenā te pogai ka tavae ei koe ne tino ki te se-gata-mai, se-gata-mai eiloa.

Fakamatalaga mai lalo

Onoono ki te FP.
Io me “manuia.”
Epelu, “akoako koe.”
Io me “fakamasinoga tonu.”
Epelu, “I loto.”