Te Tusi a Mataio 9:1-38

  • Faka‵lei ne Iesu se tino e ‵mate tena foitino (1-8)

  • Ko kalagagina ne Iesu a Mataio (9-13)

  • Fesili e uiga ki te fakalikiliki (14-17)

  • Te tama fafine a Iailo; se fafine ne patele atu ki te gatu o Iesu (18-26)

  • Faka‵lei ne Iesu se tino ‵kivi mo se tino gūgū (27-34)

  • Uke fuataga e ‵tau o ‵kati kae mu‵tana tino ga‵lue (35-38)

9  Ne sopo aka a Iesu ki te pōti kae fanatu ki tena fakai i te suā feitu.+  Kae kiloke! ne avatu ne latou ki a ia i luga i se moega se tagata e ‵mate tena foitino. I te laveaga ne ia te lotou fakatuanaki, ne fai atu a Iesu ki te tagata masaki: “Taku tama, ke loto malosi! Au agasala ko magalo.”+  Kae ne fai aka a nisi failautusi ki a latou eiloa: “A te tagata tenei ko muna masei ki te Atua.”  Ne iloa ne Iesu olotou mafaufauga, kae fai atu: “Kaia e mafau‵fau ei koutou ki mea ma‵sei i otou loto?+  Se a te mea e faigofie atu, ko te fai atu, ‘Au agasala ko magalo,’ io me fai atu ‘Tu ki luga o sasale’?+  Kae ko te mea ke iloa ne koutou me e isi se malosi o te Tama a te tagata o fakamagalo a agasala i te lalolagi​—” fai atu ei a ia ki te tino e ‵mate tena foitino: “Tu ki luga, puke tou moega, kae fano ki tou fale.”+  Kae ne tu aka te tagata tenā ki luga, fano ei ki tena fale.  I te laveaga ne te vaitino a te mea tenei, ne ma‵taku latou, kae ‵viki atu latou ki te Atua telā ne avatu ne ia te malosi tenā ki tāgata.  I tena fanatuga mai konā, lavea ei ne Iesu se tagata e igoa ki a Mataio e sagasaga i te ofisa ‵tae lafoga, kae fai atu ki a ia: “Tautali mai i a au.” Ne tu aka tou tagata kae tautali atu i a ia.+ 10  Fakamuli ifo, i te taimi ne kai* ei a ia i te fale, kiloke! ne olo atu ki a ia a tino ‵tae lafoga mo tino agasala e tokouke kae ne kamata o ‵kai* fakatasi mo Iesu mo ana soko.+ 11  Kae i te laveaga ne Falesaio a te mea tenei, fai atu ei latou ki ana soko: “Kaia e ‵kai fakatasi ei te otou faiakoga mo tino ‵tae lafoga mo tino agasala?”+ 12  I te lagonaga ne ia olotou pati, ana muna: “A tino kolā e malosi ‵lei e se ma‵nako ki se tokita, kae ko tino fua kolā e ma‵saki.+ 13  Olo kae fai ke iloa ne koutou te uiga o te mea tenei: ‘Au e manako ki te alofa fakamagalo, kae e se ko taulaga.’+ Me i a au ne vau o kalaga ki tino agasala, kae e se ki tino amio‵tonu.” 14  Ne olo atu a soko o Ioane ki a ia kae fesili atu, penei: “Kaia e fakaliki‵liki sāle ei matou mo Falesaio kae e se ko ou soko?”+ 15  Ne fai atu a Iesu ki a latou: “E seai se pogai ke fanoa‵noa ei a taugasoa o te tagata ka fakaipoipo+ i te taimi koi ‵nofo fakatasi ei latou, e tonu au me ikai? Kae ka oko mai a aso e ave ei kea‵tea te tagata ka fakaipoipo mai i a latou,+ ko fakaliki‵liki ei latou. 16  E seai se tino e ‵sui ne ia se potu laugatu fou ki se gatu mago, me ka ‵futi ne te laugatu fou a te gatu mago kae ka lasi atu i ei te masaega.+ 17  E se utu sāle foki ne tino te uaina fou ki loto i taga uaina mua. Kafai e fai ne latou penā ka ma‵pa a taga uaina kae maligi te uaina ki tua, ko ma‵sei ei a taga uaina konā. Kae e utu ne tino a te uaina fou ki loto i taga uaina ‵fou kae ka se mafai o ma‵sei a mea e lua konā.” 18  Kae koi faipati atu a ia ki a latou e uiga ki mea konei, kiloke! ne fanatu se tino pule kae ifo atu ki a ia, ana muna: “Kāti ko oti nei ne mate taku tamaliki fafine, kae vau o tuku aka ou lima ki luga i a ia, ko toe ola ei a ia.”+ 19  Tenā ne ‵tu aka ei a Iesu mo ana soko kae tau‵tali atu i a ia. 20  Kae kiloke! ne fanatu i ana tua se fafine telā ne ‵tafe tena sua i tausaga e 12+ kae fakapatele atu ki te fele o tena gatu,+ 21  me ne fai ifo faeloa tou fafine ki a ia eiloa, penei: “Ke patele fua au ki tena gatu, ko ‵lei ei au.” 22  Ne mafuli atu Iesu kae ne lavea ne ia te fafine, kae fai atu: “Taku tama, ke loto malosi! Ko tou fakatuanaki ne ‵lei ei koe.”+ Kae ne ‵lei ei te masaki o te fafine i te itula eiloa tenā.+ 23  I tena okoatuga ki te fale o te pule ne lavea ne ia a tino faka‵tagi faili mo te logoa o leo o te vaitino fanoa‵noa,+ 24  ne fai atu a Iesu: “Olo ki tua me i te tamaliki fafine tenei e seki mate kae e moe fua.”+ Ona ko ana pati konei, ne kamata o ‵kata fakatauemu atu latou ki a ia. 25  I te ologa o te vaitino ki tua, ulu atu ei a ia ki loto, puke ki tena lima,+ tu aka ei te tamaliki ki luga.+ 26  Ne salalau atu eiloa te tala e uiga ki te mea tenei i te kogā koga kātoa tenā. 27  I te fanatuga a Iesu mai konā, ne tau‵tali atu i a ia a tāgata ‵kivi e tokolua,+ kae paka‵laga atu: “Te Tama a Tavita, ke alofa mai koe ki a māua.” 28  I tena uluatuga ki loto i te fale, olo atu ei te tokolua tāgata konei ki a ia, kae ne fesili atu a Iesu ki a lāua: “E mata, e fakatuanaki eiloa koulua me e mafai ne au o fai te mea tenei?”+ Ne tali atu lāua, “Ao, e te Aliki.” 29  Fakapatele atu ei a ia ki lā mata,+ kae fai atu: “Ke fai eiloa penā, e ‵tusa mo te lua fakatuanaki.” 30  Kae ne ‵pula ei a lā mata. E se gata i ei, ne fakatonu atu a Iesu ki a lāua, ana muna: “Ke mo a ma fakailoa atu a te mea tenei ki se tino.”+ 31  Kae i te lā ologa ki tua, ne fakasalalau atu ne lāua a te tala tenā e uiga ki a ia i te kogā koga kātoa tenā. 32  I te lā ologa kea‵tea, kiloke! ne avatu ne tino ki a ia se tagata gūgū telā e pukea ne se temoni;+ 33  kae i te otiga ne afuli kea‵tea te temoni, faipati ei te tagata gūgū tenā.+ Ne ofo te vaitino kae fai atu: “E seki ai eiloa se mea penei kai lavea atu i Isalaelu.”+ 34  Kae ne fai atu a Falesaio: “E afuli kea‵tea ne ia a temoni mai te malosi o te pule o temoni.”+ 35  Kae ne faimalaga atu a Iesu i fakai ‵lasi mo fakai fo‵liki katoa, o akoako atu i olotou sunako kae talai atu te tala ‵lei o te Malo kae faka‵lei a vaegā masaki katoa.+ 36  I te laveaga ne ia o te vaitino, ne alofa malosi a ia ki a latou+ me ko pa‵ka kae tuku tiaki latou e pelā me ne mamoe e seai se lotou tino tausi.+ 37  Tenā ne fai atu ei a ia ki ana soko: “Ao, ko oko eiloa i te uke o fuataga e ‵tau o ‵kati, kae e mu‵tana a tino ga‵lue.+ 38  Tela la, fakatagi atu ki te Matai o te galuega ke uga mai ne tino ga‵lue o ‵kati a fuataga.”+

Fakamatalaga mai lalo

Io me “fakapale i te taipola.”
Io me “fakapale i te taipola.”