Te Tusi a Mataio 8:1-34

  • Ko ‵lei se lepela (1-4)

  • Te fakatuanaki o se ofisa o kautau (5-13)

  • Faka‵lei ne Iesu a tino e tokouke i Kapanaumi (14-17)

  • Auala ke tautali atu i a Iesu (18-22)

  • Ko fakafilemu ne Iesu se matagi malosi (23-27)

  • Ko uga atu ne Iesu a temoni ki loto i puaka (28-34)

8  I tena fanaifoga mai i te mauga ne tau‵tali atu i a Iesu te vaitino.  Kae kiloke! ne vau se lepela, totuli i ana mua, kae fai atu: “Te Aliki, kafai e manako koe ki ei, e mafai o fai ne koe au ke ‵ma.”+  Ne ‵kapa atu tena lima, fakapatele atu ki a ia, kae fai atu: “Au e manako ki ei! Ke ‵ma koe.”+ I konā loa, ‵lei ei tena lepela.+  Tenā ne fai atu ei a Iesu ki a ia: “Ke mo a ma fakailoa atu ne koe a te mea tenei ki se tino,+ kae fano o fakaasi atu a koe ki te faitaulaga+ kae ofo atu te meaalofa telā ne fakatonu mai i te tulafono a Mose,+ ke fai mo fai se molimau ki a latou.”  I tena okoatuga ki Kapanaumi, ne fanatu ki a ia se ofisa o kautau kae ne fakamolemole atu ki a ia,+  ana muna: “Tou ‵malu, a taku tavini e takato i te fale me ko ‵mate tena foitino, kae ko oko eiloa i te tigaina.”  Ne fai atu a Iesu ki a ia: “Ka faka‵lei ne au a ia ma oko atu au ki konā.”  Ne tali atu te ofisa o kautau ki a ia: “Tou ‵malu, e seai soku aoga ke ulu mai ei koe ki loto i toku fale, kae fai aka fua sau pati kae ka ‵lei ei taku tavini.  Me i a au foki se tagata e isi saku pule, o pule ki luga i sotia. E fakatonu atu au ki se sotia, ‘Fano! ko te mea eiloa ko fano, kae ki te suā sotia, ‘Vau!’ ko te mea eiloa ko vau, kae ki taku pologa, ‘Fai te mea tenei!’ ko te mea eiloa ko fai ne ia.” 10  I te lagonaga ne Iesu a te mea tenā, ne ofo a ia kae fai atu ki tino kolā ne tau‵tali atu i a ia: “Au e fai ‵tonu atu ki a koutou, e seai eiloa se tino i Isalaelu kai maua ne au, e lasi penei tena fakatuanaki.+ 11  Kae e fai atu au ki a koutou me e tokouke ka o‵mai mai i te feitu ki saegala mo te feitu ki togala kae ka saga‵saga i te taipola fakatasi mo Apelaamo mo Isaako mo Iakopo i te Malo o te lagi;+ 12  kae ko fanau o te Malo ka ‵pei ki tua i te pouliga. Tenā eiloa te koga ka ‵tagi mautuutu kae ū olotou nifo i ei.”+ 13  Kae ne fai atu a Iesu ki te ofisa o kautau: “Fano. Me ka fai eiloa penā e ‵tusa mo te fakatuanaki ne fakaasi mai ne koe.”+ Kae ne ‵lei eiloa te masaki o te tavini i te itula tenā.+ 14  I te okoatuga a Iesu ki te fale o Petelu, matea ei ne ia te mātua o te avaga a Petelu+ e takato me e pokotia ne te fiva.+ 15  Tenā ne puke atu ei a ia ki tena lima,+ ‵lei ei tena fiva. Ne tu aka tou fafine kae kamata o tavini atu ki a ia. 16  I te okoga ki te afiafi, ne aumai ne tino ki a ia a tino e tokouke kolā e pukea ne temoni; kae ne afuli ne ia kea‵tea a temoni e auala i tena fakatonuga, kae faka‵lei ne ia a tino katoa kolā ne tigaina, 17  ko te mea ke fakataunu a pati kolā ne fai e auala i te pelofeta ko Isaia: “Ne amo ne ia ‵tou logo‵maega kae tauave ne ia a ‵tou masaki.”+ 18  I te laveaga ne Iesu te vaitino i ana tafa, fakatonu atu ei ke olo latou ki te suā feitu.+ 19  Ne fanatu ki a ia se failautusi kae fai atu: “Te Faiakoga, au ka tautali atu i a koe i so se koga e fano koe ki ei.”+ 20  Kae ne fai atu a Iesu ki a ia: “E isi ne lua o alope, kae ko manu eva o te lagi e isi ne olotou ofaga, kae ko te Tama a te tagata e seai se koga mo ana moe.”+ 21  Tenā ne fai atu ei tena soko e tokotasi ki a ia: “Te Aliki, talia mai ke fano mua au o tanu toku tamana.”+ 22  Ne fai atu a Iesu ki a ia: “Tautali mai faeloa i a au, kae tuku ei a tino ‵mate ke tanu olotou tino ‵mate.”+ 23  Kae i tena sopoga ki te pōti, tau‵tali atu ei ana soko i a ia.+ 24  Kae kiloke! ne agi se matagi malosi kae sou te tai, ‵fonu ei te pōti i tai; kae ko Iesu e tō tena moe.+ 25  Ne olo atu latou o ‵fagu a ia, olotou muna: “Te Aliki, faka‵sao aka tatou, ko pili tatou o ‵mate!” 26  Kae ne fai atu a ia ki a latou: “Kaia e ma‵taku* malosi ei koutou, koutou kolā e fo‵liki otou fakatuanaki?”+ Tenā ne tu aka ei a ia kae ‵liko atu ki te matagi mo te tai, malū palapala ei te matagi mo te tai.+ 27  Ne ofo a tāgata kae fai aka: “Se a te vaegā tino tenei? E faka‵logo foki te matagi mo te tai ki a ia.” 28  I tena okoga ki te suā feitu, ki te kogā koga o tino Katala, fetaui ei a ia mo tāgata e tokolua e pukea ne temoni kolā ne o‵mai mai tanuga.+ Ko oko eiloa i te fakama‵taku, telā ne seki ai eiloa se tino loto toa ne mafai o fano i te auala tenā. 29  Kae kiloke! ne paka‵laga atu lāua: “Ne a ma mea ne fai atu ki a koe, e te Tama a te Atua?+ E a, ko vau koe o fakapuapuagatia māua+ kae koi tuai o oko ki te taimi tonu?”+ 30  Kae e isi se lafu puaka e kai‵kai i se malae e ‵mao mai i a latou.+ 31  Tenā ne kamata ei o fakamolemole atu a temoni ki a ia, olotou muna: “Kafai e afuli ne koe matou kea‵tea, uga atu la matou ki loto i puaka konā.”+ 32  Kae ne fai atu a ia ki a latou: “Olo!” Tenā ne o‵mai ei latou ki tua kae ulu atu ki loto i puaka konā, kae kiloke! ne ‵tele fakavave atu a puaka ki te kaugutu* o te mauga, ‵to ki lalo i te tai, ‵mate atu ei. 33  Kae ne ‵tele atu a tino fagai puaka ki loto i te fakai o lipoti atu a mea katoa, e aofia i ei te tala e uiga ki tāgata kolā ne pukea ne temoni. 34  Kae kiloke! ne o‵mai a tino katoa i te fakai o fakafetaui atu ki a Iesu, kae i te otiga ne lavea ne latou a ia, ne kinau atu latou ke fano a ia kea‵tea mai te lotou fenua.+

Fakamatalaga mai lalo

Io me “loto vāivāi.”
Io me “kaugutu ‵poko.”