Te Tusi a Mataio 4:1-25

  • Ko tofotofo ne te Tiapolo a Iesu (1-11)

  • Ko kamata o talai a Iesu i Kalilaia (12-17)

  • Kalagagina a soko muamua (18-22)

  • Iesu ko talai, akoako, kae faka‵lei masaki (23-25)

4  Tenā ne takitaki ei a Iesu ne te agaga tapu ki te koga lavaki ko te mea ke tofotofo+ a ia ne te Tiapolo.+  I tena otiga ne fakalikiliki i ao e 40 mo po e 40, lagona ei ne ia te fiakai.  Kae ne fanatu te Tino Fakaosooso+ ki a ia kae fai atu: “Kafai koe ko te tama a te Atua, fai atu ki fatu konei ke liu falaoa.”  Kae ne tali atu a ia: “E tusi i te tusi: ‘E se ko meakai fua e ola ei te tagata, kae ko pati katoa kolā e ‵to mai i te gutu o Ieova.’”*+  Tenā ne ave ei a Iesu ne te Tiapolo ki te fakai tapu,+ kae fakatu ne ia i te ‵pui maluga* o te faletapu+  kae fai atu ki a ia: “Kafai koe ko te tama a te Atua, eva ki lalo, me e tusi i te tusi: ‘Ka tuku atu ne ia ki ana agelu se fakatonuga e uiga ki a koe,’ kae ‘Ka sau aka ne latou a koe i olotou lima, ko te mea ke se pakia tou vae i se fatu.’”+  Muna a Iesu ki a ia: “Kae e tusi foki i te tusi: ‘E se ‵tau mo koe o tofotofo a Ieova* tou Atua.’”+  Ne toe ave ne te Tiapolo a ia ki se mauga tafasili i te maluga kae fakaasi atu ki a ia a malo katoa o te lalolagi mo olotou ‵malu.+  Kae ne fai atu ki a ia: “Ka avatu ne au a mea katoa konei ki a koe māfai e ifo kae tapuaki fakatasi mai fua koe ki a au.” 10  Tenā ne fai atu ei a Iesu ki a ia: “Fano kea‵tea e Satani! Me e tusi i te tusi: ‘E ‵tau mo koe o tapuaki ki a Ieova* tou Atua+ kae ko ia fua tokotasi e ‵tau o avatu ne koe ki ei te taviniga tapu.’”+ 11  Tenā ne tiaki ei a ia ne te Tiapolo,+ kae kiloke! ne o‵mai a agelu kae kamata o tavini atu ki a ia.+ 12  I tena logoga i a Ioane ko oti ne puke fakapagota,+ fano ei a ia ki Kalilaia.+ 13  E se gata i ei, i te otiga ne tiaki ne ia a Nasaleta, ne fano a ia o nofo i Kapanaumi+ i tafa o te vai i kogā fenua o Sepulona mo Nafatali, 14  ko te mea ke fakataunu a pati kolā ne fai e auala i te pelofeta ko Isaia, telā ne fai mai: 15  “Te fenua o Sepulona mo te fenua o Nafatali i te auala i tafatafa o te vai, i te suā feitu o te Iolitana, ko Kalilaia o fenua fakaa‵tea! 16  A tino kolā e saga‵saga i te pouliga ne lavea ne latou se mainaga lasi, kae e pelā mo latou kolā ne saga‵saga i te fenua o te ata o te mate, ne sulu atu te mainaga+ ki luga i a latou.”+ 17  Mai te taimi tenā o fano ki mua, ne kamata ei a Iesu o talai kae fai atu: “Sala‵mo, me ko pili mai te Malo o te lagi.”+ 18  Ne sasale atu a Iesu i tafa o te Vai o Kalilaia, kae lavea ne ia te tautaina, ko Simona telā e fakaigoa foki ki a Petelu,+ mo tena taina ko Anitelea, e ‵pei ifo te lā tili ki te vai, me i a lāua ne tino faiika.+ 19  Ana muna ki a lāua: “Tau‵tali mai i a au, kae ka fai ne au koulua ke fai mo tino faiika ki tino.”+ 20  I konā loa, ne tiaki fakavave ne lāua a lā tili kae tau‵tali atu i a ia.+ 21  I tena fanatuga mai konā, lavea ei ne ia te suā tautaina, ko Iakopo te tama a Sepetaio mo tena taina ko Ioane.+ Ne ‵nofo atu lāua i luga i te pōti fakatasi mo te lā tamana ko Sepetaio e ponopono olotou tili, kae ne kalaga atu a ia ki a lāua.+ 22  I konā loa, ne tiaki fakavave ne lāua te pōti mo te lā tamana kae tau‵tali atu i a ia. 23  Tenā ne fanatu ei a ia i loto i Kalilaia kātoa,+ o akoako i loto i olotou sunako*+ kae talai atu te tala ‵lei o te Malo kae faka‵lei a vaegā ma‵saki mo famai katoa o tino.+ 24  Ne oko atu te lipoti e uiga ki a ia i Sulia kātoa, kae ne aumai ne latou ki a ia a latou katoa kolā e logo‵mae i masaki kese‵kese kae tigaina,+ tino e pukea ne temoni+ kae ‵pole sāle+ kae ‵mate olotou foitino, kae ne faka‵lei ne ia a latou. 25  Ona ko te mea tenā, ne tau‵tali atu i a ia a te vaitino mai i Kalilaia mo Tekapoli* mo Ielusalema mo Iuta mo koga katoa i te suā feitu o te Iolitana.

Fakamatalaga mai lalo

Onoono ki te MF A5.
Io me “te ‵toe koga maluga.”
Onoono ki te MF A5.
Onoono ki te MF A5.
A te “sunako” se fale e fai ei a fonotaga.
Io me “te Kogā Koga o Fakai e Sefulu.”