Te Tusi a Mataio 27:1-66
27 I te okoga ki te tafataeao, ne fono fakatasi a faitaulaga pule mo toeaina katoa ke tamate a Iesu.+
2 I te otiga ne saisai ana lima ne ‵taki atu ne latou a ia o tuku atu ki a Pilato, te kovana.+
3 Kae i te laveaga ne Iuta, telā ne fakatogafiti ne ia a Iesu, i a ia ko fakasala, ne salamō ‵ki eiloa tou tagata kae fakafoki atu ne ia te 30 tupe siliva ki faitaulaga pule mo toeaina,+
4 ana muna: “Au ko agasala i te faiga o te togafiti masei ki se tino e seai sena ‵se.” Olotou muna: ‘Se a te motou fekau i te mea tenā? Faitalia atu eiloa koe!”*
5 Ne ‵pei atu ne ia a tupe siliva ki te faletapu kae fano. Tenā ne fano ei a ia o noua.+
6 Ne puke ne faitaulaga pule a tupe siliva kae fai aka penei: “E se ‵tau o tuku a tupe konei ki te koga ‵teu koloa tapu, me ne ‵togi ki ei a toto o se tino.”
7 I te otiga ne fono fakatasi latou ki ei, fakaaoga ei ne latou a tupe ke ‵togi ki ei a te manafa o te tino faite mea ki kele mo tanu a tino fakaa‵tea.
8 Tela la, ne fakaigoa te koga tenā ki te Manafa o Toto+ ke oko mai eiloa ki te aso nei.
9 Tenā ne fakataunu ei a pati ne fai mai e auala i a Ielemia te pelofeta: “Kae ne puke ne latou a tupe siliva e 30, ko te ‵togi ne fakatoka ne nisi tama tāgata a Isalaelu ke fakatau ki ei se tagata,
10 kae ne ‵togi ne latou ki ei te manafa o te tino faite mea ki kele, e ‵tusa mo te fakatonuga a Ieova* ki a au.”+
11 Ne tu atu a Iesu i mua o te kovana i te taimi tenei, kae fesili atu te kovana ki a ia: “A koe ko te Tupu o tino Iutaia? Ne tali atu a Iesu: “Tenā eiloa e fai mai ne koe.”+
12 Kae i te ‵losiatuga a faitaulaga pule mo toeaina ki ei, ne seki ai sena tali ne fai.+
13 Tenā ne fai atu ei a Pilato ki a ia: “E a, e se lagona ne koe te uke o mea e ‵losi mai ne latou e uiga ki a koe?”
14 Kae ne seki ai sena tali ne fai atu ki a ia, e tonu, e seai eiloa sena pati e tasi ne fai; ne ofo malosi ei te kovana.
15 I aso fakamanatu takitasi, e masani o ‵tala atu ne te kovana se pagota e tokotasi ki tua i te vaitino, ko te tino telā e ma‵nako latou ki ei.+
16 I te taimi foki eiloa tenā ne ‵sai ei ne latou se pagota fakamataku e igoa ki a Palapa.
17 Tela la, i te taimi ne maopoopo fakatasi ei latou ne fai atu a Pilato ki a latou: “Ko oi te tino e ma‵nako koutou ke ‵tala atu ne au ki a koutou, ko Palapa io me ko Iesu telā e taku ko te Keliso?”
18 Ne iloa ne Pilato me ne tuku atu fua ne latou a Iesu ki a ia ona ko te loto ma‵sei.
19 E se gata i ei, kae koi sagasaga a ia i luga i tena nofoga fakamasino kae oko atu ki ei te fekau a tena avaga, ana muna: “Ke mo a eiloa ma fai ne koe se mea masei ki te tagata amiotonu tenā, me ne puapuaga malosi au i se moemiti i te aso nei ona ko ia.”
20 Kae ne fakamalosi atu a faitaulaga pule mo toeaina ki te vaitino ke fai atu ke ‵tala mai a Palapa,+ kae ke tamate a Iesu.+
21 Ne fai atu te kovana ki a latou: “Ko oi i a lāua konei e ma‵nako koutou ke ‵tala atu ne au ki a koutou?” Olotou muna: “Ko Palapa.”
22 Muna a Pilato ki a latou: “Ne a la aku mea ka fai ki a Iesu telā e taku ko te Keliso?” Ne fai atu latou katoa: “‵Tuki atu a ia ki te pou!”*+
23 Ana muna: “Kaia? Se a tena mea masei ne fai?” Kae ne paka‵laga aka faeloa latou ki luga: “‵Tuki atu a ia ki te pou!”+
24 I te laveaga ne Pilato me ko seai se aoga o ana pati, kae e gasolo aka eiloa o ua‵te malosi a te vaitino, ne puke tou tagata ki vai, ‵fulu ana lima i mua o tino konā, kae fai atu: “Au e ‵ma i toto o te tagata tenei. Faitalia atu koutou.”
25 Ne tali atu a tino katoa: “Ke i luga i a matou mo omotou tama‵liki ana toto.”+
26 Tenā ne ‵tala atu ei ne ia a Palapa ki a latou, kae fakatonu atu ke ‵kini+ a Iesu kae tuku atu ke tamate i luga i te pou.+
27 Tenā ne ave ei a Iesu ne sotia a te kovana ki loto i te fale o te kovana kae fakamaopoopo atu a sotia katoa ki ana tafa.+
28 Ne tapale ne latou ana gatu kae fakapei atu se gatu lanu kula ki a ia,+
29 kae ne ‵fili ne latou se foualiki ki lakau tala‵tala, fakafou atu ki tena ulu kae tuku atu te tokotoko ke puke i tena lima fakaatamai. Ne to‵tuli ifo latou i ana mua kae fakatauemu atu ki a ia, olotou muna: “Talofa, te Tupu o tino Iutaia!”
30 Kae ne puapuaki ne latou a ia,+ puke ne latou te tokotoko kae kamata o pagopago tena ulu.
31 Fakamuli ifo, i te otiga o olotou faifaiga fakatauemu konā, tapale ei ne latou te gatu kae toe fakapei atu ki ana gatu eiloa, kae ‵taki atu ke ‵tuki ki te pou.+
32 I te lotou auala, ne fetaui latou mo te tagata Kulene e igoa ki a Simona. Ne fakatonu atu latou ki te tagata tenei ke amo ne ia te pou fakasaua* o Iesu.+
33 I te lotou okoga ki te koga e igoa ki a Kolokota, ko tena uiga ko te Koga o Gatiulupoko,+
34 ne tuku atu ne latou ki a ia te uaina e palu tasi mo se mea ‵kona ke inu a ia ki ei,+ kae i te otiga ne tami ki ei, ne ita a ia ma inu ki ei.
35 I te otiga ne ‵tuki ne latou a ia ki te pou, tufa ei ne latou ana gatu i te faiga o se vili,+
36 kae saga‵saga latou i konā o leoleo a ia.
37 Ne faka‵piki foki ne latou mai luga i tena ulu a te ‵losiga telā ne fakasala i ei a ia: “Ko Iesu tenei te Tupu o tino Iutaia.”+
38 Kae ne ‵tuki a ia ki te pou fakatasi mo tino kai‵soa e tokolua i ana tafa, e tokotasi i tena feitu fakaatamai, kae e tokotasi i tena feitu fakamaui.+
39 Kae ko tino kolā ne faka‵sili atu i konā ne pati ma‵sei ki a ia,+ lūlū olotou ulu+
40 kae fai atu: “Ko koe telā ka ofa ne koe te faletapu kae toe faite i aso e tolu,+ fakasao aka la koe! Kafai koe se tama a te Atua, fanaifo la ki lalo mo te pou fakasaua!”+
41 E penā foki a faitaulaga pule fakatasi mo failautusi mo toeaina; ne kamata o fakatauemu atu ki a ia kae fai atu:+
42 “Ne faka‵sao ne ia a nisi tino kae e se mafai o fakasao ne ia a ia eiloa! Ko ia te Tupu o Isalaelu;+ fanaifo la mai te pou fakasaua* kae ka tali‵tonu tatou ki a ia.
43 Ne talitonu a ia ki te Atua; fai la ke fakasao nei ne Ia a ia eiloa māfai e manako a Ia ki ei,+ me ne fai mai tou tagata, ‘Au ko te Tama a te Atua.’”+
44 E penā foki a tino kai‵soa kolā ne ‵tuki ki pou i ana tafa ne fakatauemu atu ki a ia.+
45 I te ono o itula* o fano ki mua, ne pouli te fenua kātoa ke oko eiloa ki te iva o itula.*+
46 Kāti ko te iva o itula ne kalaga aka ei a Iesu i se leo maluga, ana muna: “Eli, Eli, lama sapakatani?” ko tena uiga, “Toku Atua, toku Atua, kaia ko tiaki ei au ne koe?”+
47 I te lagonaga ne latou te mea tenei, ne kamata ei o fai aka a nisi tino kolā ne takatu‵tu atu i konā: “A te tagata tenei ko kalaga ki a Elia.”+
48 Ne tele fakavave atu se tino i a latou, puke se omomi, ufi atu ki se uaina ‵vi, faka‵piki ki te mata o se lakau kae tuku atu ke inu a ia.+
49 Kae ne fai atu a nisi tino: “Tuku malie a ia! Ke onoono aka tatou me e mata, e vau a Elia o fakasao a ia.”
50 Ne toe kalaga aka a Iesu i se leo maluga, ko te mea eiloa ko mate.*+
51 Kae kiloke! ne masaelua+ te ‵pui laugatu i te faletapu,+ mai luga ki lalo,+ ne galulu te laukele kae mafa‵fa valevale a kaupapa.
52 Ne ma‵tala a tanuga kae uke a foitino o tino tapu kolā ko oti ne ‵mate ne ‵to ki tua
53 (kae ko tino kolā ne ui atu i tanuga konā i tena otiga ne toetu aka, ne ulu atu ki loto i te fakai tapu), kae ne lavea latou ne tino e tokouke.
54 Kae i te laveaga ne te ofisa o kautau mo latou kolā ne leoleo ne latou a Iesu, a te mafuie mo mea kolā ne ‵tupu, ko oko eiloa te lotou ma‵taku, olotou muna: “E tonu, tenei eiloa te Tama a te Atua.”+
55 Kae e tokouke a fāfine ne kilo‵kilo atu ki ei mai i se koga tai ‵mao, ko latou kolā ne olo fakatasi mo Iesu mai Kalilaia ke tavini atu ki a ia;+
56 e aofia i a latou konā ko Malia te Makatala, ko Malia te mātua o Iakopo mo Iose, mo te mātua o tama‵liki tāgata a Sepetaio.+
57 I te afiafi, ne fanatu se tino maumea mai i Alimataia, e igoa ki a Iosefa, telā ko oti foki ne fai mo fai se soko o Iesu.+
58 Ne fanatu te tagata tenei ki a Pilato kae fakamolemole atu ke tuku mai te foitino o Iesu.+ Tenā ne fakatonu atu ei a Pilato ke tuku atu te foitino ki a ia.+
59 Ne puke ne Iosefa te foitino kae ‵kofu ne ia ki laugatu lino ‵lei,+
60 kae fakatakato ne ia i tena tanuga fou+ telā ne tuki ne ia i te kaupapa. Kae i te otiga ne fakateka ne ia se fatu lasi ki te mataloa o te tanuga, fano ei a ia.
61 Kae ne ‵nofo eiloa a Malia te Makatala mo te suā Malia i konā, i mua o te tanuga.+
62 I te suā aso, mai tua o te Aso Fakatoka,+ ne maopoopo fakatasi atu ei a faitaulaga pule mo Falesaio i mua o Pilato,
63 kae fai atu: “Tou ‵malu, ko masaua ne matou a pati a te tino fakaloiloi tino tenā ne fai kae koi ola ei a ia, ‘Mai tua o aso e tolu kae ka toe fakatu aka au.’+
64 Tela la, fakatonu atu ke leoleo faka‵lei te tanuga ke oko ki te tolu o aso, ko te mea ke se olo atu ana soko o kaisoa tena foitino+ ko fai atu ei ki tino, ‘Ne fakatu aka a ia mai te mate!’ Tenā ko sili atu ei te masei o te loi tenei i lō te mea muamua.”
65 Muna a Pilato ki a latou: “E isi ne otou leoleo. Olo la o leoleo faka‵lei te tanuga e pelā eiloa mo te mea e iloa ne koutou o fai.”
66 Tenā olo ei latou o ‵pono faka‵lei te tanuga ki se fatu kae faka‵tu ne leoleo i ei.
Fakamatalaga mai lalo
^ Io me “I o koe eiloa te ‵se!”
^ Io me “Tamate atu a ia i luga i te pou!”
^ Telā kāti ko te 12:00 i te tutonu.
^ Telā kāti ko te 3:00 i te fakaafiafi.
^ Io me “ko se mānava.”
