Te Tusi a Mataio 25:1-46

  • FAKAILOGA O TE FAKATASI MAI O KELISO (1-46)

    • Tala fakatusa ki tamafine ‵ma e tokosefulu (1-13)

    • Tala fakatusa ki taleni (14-30)

    • Mamoe mo kouti (31-46)

25  “Kae ko te Malo o te lagi e mafai o fakatusa ki tamafine ‵ma e tokosefulu kolā ne puke olotou moli+ kae olo atu o fakafetaui ki te tagata ka fakaipoipo.+  E tokolima i a latou e va‵lea, kae ko te suā tokolima e ‵poto.+  Ne ave ne tamafine va‵lea olotou moli e aunoa mo sinu* fakaleoleo,  kae ko tamafine ‵poto ne ave olotou sinu i loto i fagu fakatasi mo olotou moli.  I te taimi ne tuai mai ei te tagata ka fakaipoipo, ne matule‵tule latou katoa kae ‵to olotou ‵moe.  Kae ne pa mai te kalaga i te valuapo: ‘Ko oko mai te tagata ka fakaipoipo! Olo o fakafetaui ki ei.’  Tenā ne ala aka ei a tamafine ‵ma katoa konā kae fakatoka olotou moli.+  Ne fai atu a tamafine va‵lea ki tamafine ‵poto, ‘Tuku mai aka ne otou sinu ki a matou, me ko pili o ‵mate omotou moli.’  Ne tali atu a tamafine ‵poto, olotou muna: ‘Kāti e se lava katoa tatou i sinu konei. Olo atu ki tino e fakatau ne latou a sinu, kae ‵togi ne otou sinu mai i ei.’ 10  I te taimi ne olo ei latou o ‵togi olotou sinu kae oko mai te tagata ka fakaipoipo. Ne ulu atu a tamafine ‵ma kolā ko toka fakatasi mo te tagata ki loto i te ‵kaiga o te avaga+ kae ‵pono te mataloa. 11  Fakamuli ifo, ne oko atu te ‵toega o tamafine ‵ma, kae ka‵laga atu, ‘Tou ‵malu, Tou ‵malu, ‵tala mai aka ki a matou!’+ 12  Ne tali atu tou tagata, ‘Au e fai ‵tonu atu ki a koutou, e se iloa ne au koutou.’ 13  “Tela la, ke tumau i te matapula‵pula,+ me e se iloa ne koutou te aso io me ko te itula.+ 14  “Me ka pelā eiloa mo se tagata telā ka fai o fano ki se isi fenua, ne kalaga atu ki ana tavini kae tuku atu ana kope ke tausi ne latou.+ 15  Ne tuku atu ne ia ki te tino e tokotasi e lima taleni,* ki te suā tino e lua, kae ko te suā tino e tasi, e ‵tusa mo te mea a te tino e mafai o fai, kae fano tou tagata. 16  Ne fano fakavave a te tino telā ne tuku atu ki ei a taleni e lima, fakagalue ne ia, kae ne maua mai i ei a nisi taleni e lima. 17  Ne fai foki penā a te tino telā ne maua ne ia a taleni e lua, ne toe maua foki a nisi taleni e lua. 18  Kae ko te tavini telā ne maua ne ia te taleni e tasi, ne fano o keli te lua kae tanu ne ia te tupe* a tena matai. 19  “Mai tua o se taimi leva ‵ki, ne toe foki atu te matai o tavini konā ke maua ne ia se tala e uiga ki ana tupe kolā ne tuku ki a latou.+ 20  Ne vau te tavini telā ne tuku atu ki ei a taleni e lima kae ne aumai ne ia a taleni fakaopoopo e lima, ana muna, ‘Toku Matai, ne tuku mai ne koe ki a au e lima taleni; kiloke, ne maua ne au te suā lima taleni.’+ 21  Ne fai atu tena matai ki a ia: ‘Mālō, a koe se tavini ‵lei kae fakamaoni! A koe ne fakamaoni i te faiga o nai mea. Ka ‵tofi aka ne au a koe ke pule i mea e uke.+ Ulu mai ki loto o fia‵fia fakatasi mo tou matai.’+ 22  Oti aka, ne vau te tavini telā ne tuku atu ki ei a taleni e lua kae fai atu, ‘Toku Matai, ne tuku mai ne koe ki a au e lua taleni; kiloke, ne maua ne au te suā lua taleni.’+ 23  Ne fai atu tena matai ki a ia: ‘Mālō, a koe se tavini ‵lei kae fakamaoni! Ne fakamaoni koe i te faiga o nai mea. Ka ‵tofi aka ne au a koe ke pule i mea e uke. Ulu mai ki loto o fia‵fia fakatasi mo tou matai.’ 24  “Fakamuli loa, ne vau a te tavini telā ne tuku atu ki ei a te taleni e tasi kae fai atu: ‘Toku Matai, ne iloa ne au i a koe se tagata faigata, e tau ne koe a fuataga i lakau e seki ‵toki ne koe kae e ‵luku a fuataga kolā e seki faka‵ma ne koe.+ 25  Tela la, au ne mataku, fano ei au o ‵funa tau taleni i te laukele. Tenei la tau mea.’ 26  Ne tali atu tena matai ki a ia: ‘A koe se tavini matagā kae paie. Tenā eiloa e iloa ne koe me e tau ne au a fuataga i lakau kolā e seki ‵toki ne au kae e ‵luku a fuataga kolā e seki faka‵ma ne au. 27  Tela la, ne ‵tau o faulu ne koe taku tupe ki te page kae ka toe maua ne au taku tupe fakatasi mo te pasene i te taimi e foki mai ei au. 28  “‘Tela la, puke kea‵tea te taleni mai i a ia kae tuku atu ki te tino telā ko sefulu ana taleni.+ 29  Me i so se tino telā e isi ne ana mea, ka tuku ki ei a mea e uke atu kae ka maua ne ia a mea e uke ‵ki. Kae ko ia telā e seai ne ana mea, ka ave kea‵tea mai i a ia a nai mea kolā e maua ne ia.+ 30  Kae ‵pei atu te tavini sē aoga tenei ki tua i te pouliga. Tenā eiloa te koga ka tagi mautuutu kae ū ana nifo i ei.’ 31  “Kafai e vau te Tama a te tagata+ i tena ‵malu, fakatasi mo ana agelu katoa,+ ko sagasaga ei a ia ki lalo i tena nofogaaliki ‵malu. 32  Ka fakamaopoopo atu ki ana mua a atufenua katoa, kae ka vaevae ne ia a tino, e pelā eiloa mo te tausi mamoe e ‵vae ne ia a mamoe mai kouti. 33  Kae ka tuku ne ia a mamoe+ i tena feitu fakaatamai, kae ko kouti i tena feitu fakamaui.+ 34  “Tenā ko fai atu ei te Tupu ki a latou kolā i tena feitu fakaatamai, ‘O‵mai, a koutou kolā ko oti ne fakamanuia ne toku Tamana, ke fai mō koutou te Malo telā ne fakatoka mō koutou talu mai te taimi ne fakavae ei te lalolagi. 35  Me i a au ne fiakai kae ne fagai au ne koutou; au ne fiainu kae ne fainu au ne koutou. Au se fakaalofa kae ne talimalo au ne koutou;+ 36  au ne nofo fuafua* kae ne fakapei ne koutou a gatu ki a au.+ Au ne masaki kae ne tausi ne koutou au. Au ne ‵pei ki te falepuipui kae ne āsi mai koutou ki a au.’+ 37  Kae ka tali atu a tino amio‵tonu ki a ia penei: ‘Te Aliki, anafea ne lavea ei ne matou a koe e fiakai kae fagai ne matou a koe, io me e fiainu kae fainu ne matou a koe?+ 38  Anafea ne lavea ei ne matou i a koe se fakaalofa kae talimalo ne matou a koe, io me e nofo fuafua kae fakapei atu a gatu ki a koe? 39  Anafea ne lavea ei ne matou a koe e masaki io me e ‵pei ki te falepuipui kae āsi atu ki a koe?’ 40  Ne tali atu te Tupu ki a latou, ana muna, ‘Au e fai ‵tonu atu ki a koutou, ona ko te mea ne fai ne koutou te mea tenā ki se tokotasi o toe tino fatauva i oku taina konei, ne fai eiloa ne koutou a mea konā ki a au.’+ 41  “Tenā ko fai atu ei a ia ki tino i tena feitu fakamaui: ‘Olo kea‵tea mai i a au,+ koutou kolā ko oti ne fakamalaiagina ki te afi se-gata-mai+ telā ne fakatoka mō te Tiapolo mo ana agelu.+ 42  Me i a au ne fiakai, kae ne seki fagai au ne koutou; au ne fiainu kae seki fainu au ne koutou. 43  Au ne fakaalofa, kae seki talimalo au ne koutou; au ne nofo fuafua kae seki fakapei ne koutou au ki gatu; ne masaki kae ‵pei ki te falepuipui kae ne seki tausi ne koutou au.’ 44  Tenā ne tali atu foki latou ki a ia: ‘Te Aliki, anafea ne lavea ei ne matou a koe e fiakai io me e fiainu, io me se fakaalofa, io me e nofo fuafua, io me e masaki, io me e ‵pei ki te falepuipui kae seki tausi atu matou ki a koe?’ 45  Tenā ka tali atu ei a ia ki a latou, ana muna: ‘Au e fai ‵tonu atu ki a koutou, ona ko te mea e seki fai ne koutou a mea konā ki se tokotasi o tino fatauva konei, e seki fai foki ne koutou a mea konā ki a au.’+ 46  Ka olo atu a latou konei ki te fakaseaiga se-gata-mai,+ kae ko tino amio‵tonu ki te ola se-gata-mai.”+

Fakamatalaga mai lalo

Ko te sinu mai i fuagā olive telā ne faka‵ka sāle ki ei a moli i aso mua.
A te taleni Eleni e ‵pau mo te 20.4 kk. Onoono ki te MF E14.
Eleni, “siliva.”
Io me “e se fai faka‵lei ana gatu.”