Te Tusi a Mataio 23:1-39
23 Tenā ne faipati atu ei a Iesu ki te vaitino mo ana soko, ana muna:
2 “Ko oti ne fakasaga‵saga ne failautusi mo Falesaio a latou eiloa ki luga i te nofoga o Mose.
3 Tela la, a mea katoa kolā e fai atu ne latou ki a koutou, fai kae faka‵logo ki ei, kae sa fai ne koutou a mea kolā e fai ne latou, me e fai‵pati fua latou kae e se fai ne latou olotou pati.+
4 E saisai ne latou a amoga ‵mafa kae tuku atu ki luga i tuauma o tāgata,+ kae e se fia fakapatele atu eiloa ne latou se matikao e tasi ki amoga konā.+
5 A galuega katoa e fai ne latou e fai fua ke lavea ne tino,+ me e faka‵lasi ne latou a mea kolā e tuku ei a tusitusiga tapu kae e ‵sai ki luga i olotou foitino mo fai se puipuiga,+ kae faka‵loa foki ne latou a fele o olotou gatu.+
6 E ma‵nako latou ke ‵nofo i toe koga ma‵luga i ‵kaiga i afiafi mo nofoga tafa ki mua* i sunako+
7 kae e ma‵nako foki ke fakatalofa atu a tino ki a latou i maketi kae ke taku latou ne tino ki Faiakoga.*
8 Kae ko koutou, ke mo a ma taku koutou ne Faiakoga, me e tokotasi fua te otou Faiakoga,+ kae ko koutou katoa ne taina.
9 E se gata i ei, ke mo a ma taku ne koutou se tino i te lalolagi ki te otou tamana, me e tokotasi fua te otou Tamana,+ ko Ia telā i te lagi.
10 Ke se taku foki koutou ne takitaki, me e tokotasi fua te otou Takitaki, ko Keliso.
11 Kae ko te ‵toe tino sili i a koutou e ‵tau o fai mo fai te otou tavini.+
12 So se tino e fakamaluga ne ia a ia eiloa ka fakamalalogina,+ kae ko te tino telā e fakamalalo ne ia a ia eiloa ka fakamalugagina.+
13 “Kalofa eiloa i a koutou failautusi mo Falesaio, koutou ne tino ‵loi! me e ‵pono ne koutou te Malo o te lagi i mua o tino; me e se ulu koutou ki loto i ei, kae e se talia foki ne koutou a latou kolā e olo atu i ei ke ulu ki loto.+
14 * ——
15 “Kalofa eiloa i a koutou failautusi mo Falesaio, koutou ne tino ‵loi!+ me i a koutou e faima‵laga i luga i te tai mo te laukele ke maua se tino talitonu* e tokotasi, kae kafai ko maua, ko fai ei ne koutou a ia ke sili fakalua atu tena malaia i Kena* e pelā mo koutou.
16 “Kalofa eiloa i a koutou, takitaki ‵kivi+ kolā e fai mai, ‘Kafai e tauto se tino i te faletapu e seai se mea e fai i ei, kae kafai e tauto se tino i te aulo o te faletapu, e ‵tau eiloa o tausi ki ei.’+
17 Tino va‵lea kae ‵kivi! Tefea te mea e sili atu, ko te aulo io me ko te faletapu telā e fakatapu i ei te aulo?
18 E se gata i ei, ‘Kafai se tino e tauto i luga i te fatafaitaulaga, e seai se mea e fai i ei; kae kafai e tauto se tino i te taulaga telā i luga i ei, e ‵tau eiloa o tausi ki ei.’
19 Tino ‵kivi! Tefea te mea e sili atu, ko te taulaga io me ko te fatafaitaulaga telā e fakatapu i ei te taulaga?
20 Tela la, a te tino telā e tauto i luga i te fatafaitaulaga e tauto ki ei e pelā foki mo mea katoa i luga i ei;
21 kae ko so se tino e tauto i te faletapu e tauto ki ei e pelā foki mo te Atua telā e nofo i ei;+
22 kae ko so se tino e tauto ki te lagi e tauto i te nofogaaliki o te Atua e pelā foki mo te Atua telā e sagasaga i ei.
23 “Kalofa eiloa i a koutou failautusi mo Falesaio, koutou ne tino ‵loi! me e tuku atu ne koutou te tasi-vae-sefulu o fuaga o te mili, te pekano mo te kumina,+ kae ko oti ne fakaseaoga ne koutou a vaega tāua o te Tulafono, e pelā mo fakamasinoga ‵tonu,+ te alofa fakamagalo+ mo te fakamaoni. Ne ‵tau o fai ne koutou a mea katoa konei, kae ke mo a ma tiakina a nisi mea.+
24 Takitaki ‵kivi,+ e faka‵ma kea‵tea ne koutou a namu+ kae e folo kātoa ne koutou te kamela!+
25 “Kalofa eiloa i a koutou failautusi mo Falesaio, koutou ne tino ‵loi! me e ‵fulu ne koutou te tua o te ipu mo te tifa,+ kae i loto i ei e ‵fonu i te kaimanako*+ mo te manako lasi.+
26 Falesaio ‵kivi, ‵fulu muamua te koga i loto o te ipu mo te tifa, ko te mea ke mafai foki o ‵ma te koga i tua.
27 “Kalofa eiloa i a koutou failautusi mo Falesaio, koutou ne tino ‵loi!+ me e ‵pau eiloa koutou mo tanuga kolā e ‵kena pakipaki+ kae e foliga ‵gali i tua kae i loto i ei e ‵fonu i ivi o tino ‵mate mo vaegā mea lai‵lai katoa.
28 E penā foki koutou, e ‵kilo atu a tino ki otou foliga i tua i a koutou ne tino amio‵tonu, kae i loto i a koutou e ‵fonu i te ‵pelo mo amioga solitulafono.+
29 “Kalofa eiloa i a koutou failautusi mo Falesaio, koutou ne tino ‵loi!+ me e faite ne koutou a tanuga o pelofeta kae e teu fakagali‵gali ne koutou a tanuga o tino amio‵tonu,+
30 kae fai mai koutou, ‘Moi ne ola matou i aso o omotou tupuga, penei e se ‵kau fakatasi matou mo latou i te fakama‵ligiga o toto o pelofeta.’
31 Tela la, ko fakamaoni mai ne koutou i a koutou ko tama a tino kolā ne tamate ne latou a pelofeta.+
32 Fakaoti la ne koutou a galuega kolā ne kamata ne otou tupuga.
33 “A koutou ne gata, ko tama a gata ‵poisini,+ ka mafai pefea o ‵sao koutou mai te fakasalaga i Kena?*+
34 Ko te pogai eiloa tenei ka uga atu ei ne au ki a koutou a pelofeta+ mo tāgata ‵poto mo faiakoga o tino katoa.+ Ka tamate+ kae ‵tuki ne koutou a nisi o latou ki luga i pou, kae ko nisi ka ‵ta fakamasei+ ne koutou i loto i otou sunako kae fakasaua+ atu ki a latou mai te fakai e tasi ki te suā fakai,
35 ko te mea ke i luga i a koutou a toto o tino amio‵tonu katoa kolā ne ma‵ligi i luga i te lalolagi, mai te toto o te tino amiotonu ko Apelu+ ki te toto o Sakalia te tama a Palakaio, telā ne tamate ne koutou i te va o te koga tapuaki mo te fatafaitaulaga.+
36 Au e fai ‵tonu atu ki a koutou, a mea katoa konei ka oko mai eiloa ki luga i te kautama tenei.
37 “Ielusalema, Ielusalema, ne tamate ne koe a pelofeta kae peipei ki fatu a tino kolā ne uga atu ki a koe.+ Ko oko eiloa i te uke o taimi ne manako ei au o fakamaopoopo mai au tama‵liki e pelā me se moa fafine e fakamaopoopo mai ne ia ana punua moa ki lalo i ana kapakau! Kae ne seki ma‵nako koutou ki ei.+
38 Kiloke! A te otou fale ka tuku tiaki atu ki a koutou.+
39 Me e fai atu au ki a koutou, ka se toe lavea ne koutou au mai te taimi nei ke oko ki te taimi ka fai aka ei koutou penei, ‘Ke manuia a te tino telā e vau i te igoa o Ieova!’”*+
Fakamatalaga mai lalo
^ Io me “tafasili i te ‵lei.”
^ Eleni, “Lapi.”
^ Io me “se tino ne ‵fuli tena lotu.”
^ Io me “mea ne ‵fao.”
