Te Tusi a Mataio 21:1-46

  • Ko ulu atu a Iesu mo te manumalo (1-11)

  • Ko ‵fulu faka‵ma ne Iesu te faletapu (12-17)

  • Ko fetū te lakau ko te mati (18-22)

  • Te ‵tekeatuga ki te pulega a Iesu (23-27)

  • Tala fakatusa ki tama tāgata e tokolua (28-32)

  • Tala fakatusa ki tino fai fatoaga tatino (33-46)

    • Ko teke atu ki te fatu tulimanu tafasili i te aoga (42)

21  I te lotou piliatuga ki Ielusalema kae oko atu ki Petefake i luga i te mauga o Olive, uga atu ei ne Iesu a soko e tokolua,+  ana muna ki a lāua: “Olo ki te fakai tenā e lavea ne koulua, kae ka maua atu ne koulua se asini e ‵sai fakatasi mo se tamā asini. ‵Tala a asini, ko aumai ei ki a au.  Kafai e fai atu ne pati a se tino ki a koulua, e ‵tau mo koulua o fai atu, ‘E manako ki ei te Aliki.’ Kae ka tuku fakavave mai ne ia a asini konā.”  Ne tupu eiloa te mea tenei ke fakataunu ei a pati kolā ne fai e auala i te pelofeta, ana muna:  “Fai atu ki te tama fafine o Siona: ‘Kiloke! A tou tupu ko vau ki a koe,+ e loto maulalo+ kae e sopo i luga i se asini, ao, i luga i se tamā asini, ko te tama a te manu fai galuega ‵mafa.’”+  Ne olo atu a soko konei kae fai eiloa ne lāua a mea ne fakatonu atu ne Iesu.+  Ne aumai ne lāua te asini mo tena tama, ne ‵fola ne latou olotou gatu i luga i manu konā, kae ne sagasaga a ia i luga i ei.+  Ne ‵fola ne te tokoukega o tino olotou gatu i te auala,+ kae ko nisi tino ne ‵kati a kaula o lakau kae ‵fola i te auala.  E se gata i ei, a te vaitino kolā ne olo i ana mua mo latou kolā e o‵mai i ana tua, ne paka‵laga faeloa penei: “Matou e ‵talo atu ke fakaola te Tama a Tavita!+ Ke manuia a te tino telā e vau i te igoa o Ieova!*+ Matou e ‵talo atu ki a koe telā e nofo i te koga maluga ke fakaola ne koe a ia!”+ 10  Kae i tena uluatuga ki Ielusalema, ne ua‵te valevale a te fakai kātoa, olotou muna: “Ko oi la te tino tenei?” 11  Ne fai atu faeloa te vaitino: “A ia tenei ko Iesu te pelofeta+ mai Nasaleta i Kalilaia!” 12  Ne ulu atu a Iesu ki loto i te faletapu kae afuli ne ia ki tua a tino katoa kolā e fakatau kae ‵togi olotou mea i ei, kae ‵fuli ne ia ki lalo a taipola a tino ‵fuli tupe mo nofoga o tino fakatau lupe.+ 13  Kae ne fai atu a ia ki a latou: “E tusi i te tusi, ‘A toku fale ka taku ko te fale ‵talo,’+ kae ko fai ne koutou mo fai se ana o tino kai‵soa.”+ 14  Ne olo atu foki a tino ‵kivi mo tino vae ma‵sei ki a ia i te faletapu kae ne faka‵lei ne ia olotou ma‵saki. 15  I te laveaga ne faitaulaga pule mo failautusi a mea fakaofoofogia kolā ne fai ne ia, mo tama‵liki e paka‵laga i te faletapu penei: “Matou e ‵talo atu ke fakaola te Tama a Tavita!”+ ne kaitāua latou,+ 16  kae fai atu ki a ia: “E lagona ne koe a pati a latou konei?” Ne fai atu a Iesu ki a latou: “Ao. E a, e seki fai‵tau eiloa koutou ki te mea tenei, ‘E auala i gutu o tama‵liki mo pepe, ne fai ei ne koe ke ‵viki atu latou ki a koe’?”+ 17  Ne tiaki ne ia latou kae fano ki Petania i tua o te fakai, moe ei i konā i te po tenā.+ 18  I tena fokiatuga ki te fakai i te tafataeao ‵malu, ne fiakai a ia.+ 19  Ne lavea ne ia te lakau ko te mati i tafa o te auala, ne fanatu ki ei kae iloa aka ne ia me e seai ne fuaga i ei kae na ko ana lau fua,+ fai atu ei tou tagata ki ei: “Ke se toe fua mai eiloa koe ke oko ki te se-gata-mai.”+ Ne magemage fakavave ei te mati. 20  I te laveaga ne soko a te mea tenei, ne ofo latou, olotou muna: “Kaia ne magemage fakavave ei te mati tenei?”+ 21  Ne tali atu a Iesu ki a latou: “Au e fai ‵tonu atu ki a koutou, kafai e fakatuanaki koutou e aunoa mo te fakalotolotolua, ka se fai fua ne koutou te mea telā ne fai ne au ki te mati tenei, kae e mafai foki o fai atu koutou ki te mauga tenei, ‘Masagi ki luga kae tō ki te tai,’ ko te mea eiloa ko fai penā.+ 22  Kae ko mea katoa kolā e fakamolemole atu koutou ki ei e auala i te ‵talo ona ko te fakatuanaki, ka maua eiloa ne koutou.”+ 23  I tena uluatuga ki te faletapu, ne olo atu a faitaulaga pule mo toeaina ki a ia kae koi akoako atu a ia, olotou muna: “I o oi te malosi e fai ei ne koe a mea konei? Kae ko oi ne tuku atu ne ia te malosi tenei ki a koe?”+ 24  Ne tali atu a Iesu ki a latou: “Ka ‵sili atu foki ne au se fesili ki a koutou. Kafai e tali mai ne koutou, tenā ko fai atu ei ne au me i o oi te malosi e fai ei ne au a mea konei: 25  Ne māfua mai i fea te papatisoga a Ioane? Mai te lagi io me mai i tāgata?”* Kae ne kamata latou o fakatau tītī olotou manatu i a latou eiloa, kae fai aka: “Kafai e fai atu tatou, ‘Mai te lagi,’ ka fai mai a ia ki a tatou, ‘Kaia la ne seki tali‵tonu ei koutou ki a ia?’+ 26  Kae kafai e fai atu tatou, ‘Mai tāgata,’ e ma‵taku tatou i te vaitino, me e tali‵tonu katoa latou i a Ioane se pelofeta.” 27  Tela la, ne tali atu latou ki a Iesu: “E se iloa ne matou.” Ne fai atu a Iesu ki a latou: “E se fakaasi atu foki ne au me i o oi te malosi e fai ei ne au a mea konei. 28  “Se a te otou faka‵tau? E isi se tagata e tokolua ana tama‵liki. Ne fanatu tou tagata ki te tamaliki muamua, ana muna, ‘Taku tama, fano o galue i te togavine i te aso nei.’ 29  Ne tali atu te tamaliki, ‘Au e se fano,’ kae oti aka ne ‵fuli tena mafaufau kae fano. 30  Ne fanatu a ia ki te tokolua, kae fai atu foki penā ki ei. Ne tali atu te tamaliki tenei, ‘Tou ‵malu, au e fano,’ kae ne seki fano. 31  Ko oi la i a lāua konei ne fai ne ia te loto o tena tamana?” Ne fai atu latou: “Ko te tamaliki muamua.” Ne fai atu a Iesu ki a latou: “Au e fai ‵tonu atu ki a koutou me ka ‵mua atu a tino ‵tae lafoga mo fāfine talitāgata ki te Malo o te Atua i lō koutou. 32  Me ne vau a Ioane o fakaasi atu ki a koutou a te amiotonu, kae ne seki tali‵tonu koutou ki a ia. Kae ne tali‵tonu a tino ‵tae lafoga mo fāfine talitāgata ki a ia,+ kae e pelā mo koutou, e tiga eiloa ne matea ne koutou a te mea tenei, ne seki sala‵mo fakamuli koutou ko te mea ke tali‵tonu koutou ki a ia. 33  “Faka‵logo mai ki te suā tala fakatusa tenei: E isi se tagata, ko te pule o te manafa, ne ‵toki tena togavine,+ kae ‵pui ne ia kae keli te mea mo ‵tau a uaina kae fakatu ne ia se taoa;+ tenā ne liisi ei ne ia te togavine ki tino fai fatoaga kae fano ki se isi fenua.+ 34  I te okoga ki te ‵tau e tau ei a fuagavine, ne uga atu ne ia ana pologa ki tino fai fatoaga ke puke mai ana fuagavine. 35  Kae ne puke ne tino fai fatoaga ana pologa, e tokotasi ne ta ne latou, kae ko te suā tino ne tamate ne latou, kae peipei ne latou te suā tino ki fatu.+ 36  Ne toe uga atu ne ia a nisi pologa, e tokouke atu i te potukau muamua, kae ne fai foki ne latou a mea konā ki a latou.+ 37  Fakamuli loa, uga atu ei ne ia tena tama ki a latou, kae fai aka penei, ‘Ka āva eiloa latou ki taku tama.’ 38  I te laveaga ne latou a te tama, fai aka ei a pati a tino fai fatoaga, ‘Tenei eiloa tena sui.+ O‵mai ke tamate ne tatou a ia, ko puke ei ma tatou tena tofi!’ 39  Tenā ne puke ei ne latou a ia kae ‵pei ki tua mo te togavine kae tamate.+ 40  Tela la, kafai e fanatu te tagata i o ia te togavine, ne a mea ka fai ne ia ki tino fai fatoaga konā?” 41  Ne fai atu latou ki a ia: “Ona ko latou ne tino matagā, ka avatu foki ne ia ki a latou se fakasalaga matagā, kae ka liisi ne ia te togavine ki nisi tino fai fatoaga kolā ka avatu ne latou ki a ia ana fuagavine i te taimi tonu.” 42  Muna a Iesu ki a latou: “E a, e seki fai‵tau eiloa koutou ki Tusitusiga Tapu, ‘A te fatu telā ne tiakina ne tufuga fai fale ko fai nei mo fatu tulimanu tafasili i te aoga.*+ Ne aumai eiloa te mea tenei mai i a Ieova,* kae ko oko eiloa i te fakaofoofogia ki omotou mata’?+ 43  Tenei eiloa te pogai e fai atu ei au ki a koutou, a te Malo o te Atua ka tapale kea‵tea mai i a koutou kae tuku atu ki se fenua telā e ‵fua mai i ei a fuataga ‵lei. 44  A te tino foki telā e siga ki luga i te fatu tenei ka fatifati valevale tena foitino.+ Kae ko so se tino telā e siga ki ei te fatu tenei ka palapala valevale tena foitino.”+ 45  I te lagonaga ne faitaulaga pule mo Falesaio ana tala fakatusa, ne iloa ne latou me ne faipati eiloa a ia e uiga ki a latou.+ 46  E tiga eiloa ne ma‵nako latou o puke* a ia, ne ma‵taku latou i te vaitino me ne tali‵tonu eiloa latou i a Iesu se pelofeta.+

Fakamatalaga mai lalo

Onoono ki te MF A5.
Io me “māfua mai i tino?”
Eleni, “te ulu o te tulimanu.”
Onoono ki te MF A5.
Io me “puke fakapagota.”