Te Tusi a Mataio 20:1-34

  • Tino ga‵lue i te togavine kae ‵pau olotou ‵togi (1-16)

  • Ko toe ‵valo mai te mate o Iesu (17-19)

  • Se fakamolemole ke maua ne tulaga i te Malo (20-28)

    • Iesu ko te togiola mō tino e tokouke (28)

  • Ko faka‵lei tino ‵kivi e tokolua (29-34)

20  “Me i te Malo o te lagi e fakatusa ki te matai o te fale telā ne alausu i te tafataeao o ‵sala ne tino ke ga‵lue i tena togavine.+  I te taimi ne lotoma‵lie fakatasi ei a ia mo tino ga‵lue ke ‵togi latou ki se tenali* e tasi i te aso, uga atu ei ne ia latou ki tena togavine.  I tena fanatuga foki i te tolu o itula,* ne lavea ne ia a nisi tino e seai ne galuega e takatu‵tu fua i te maketi;  ne fai atu a ia ki a latou, ‘Olo foki koutou o ga‵lue i te togavine, kae ka ‵togi ne au koutou ki se ‵togi ‵lei.’  Tenā ne olo ei latou. Ne toe fanatu foki a ia kāti i te ono o itula* mo te iva o itula* kae e penā foki te mea ne fai ne ia.  Fakamuli loa, ne toe fanatu a ia i te 11 o itula* kae ne maua atu ne ia a nisi tino e takatu‵tu fua, ana muna ki a latou, ‘Kaia e takatu‵tu ei koutou i konei i te aso kātoa kae e se ga‵lue?’  Ne tali atu latou, ‘Me e seai se tino e fakagalue ne ia matou.’ Ne fai atu tou tagata ki a latou, ‘Olo foki koutou o ga‵lue i te togavine.’  “I te okoatuga ki te afiafi, ne fai atu te matai o te togavine ki te pule o te kau faigaluega, ‘Kalaga atu ki tino ga‵lue ke o‵mai o puke olotou peofuga,+ e kamata mai i a latou kolā ne ga‵lue fakamuli kae fakaoti ki a latou kolā ne ga‵lue muamua.’  Ne o‵mai a tāgata kolā ne ga‵lue i te 11 o itula, kae ne maua ne latou taki tokotasi se tenali* e tasi. 10  Kae i te o‵maiga o tino kolā ne ga‵lue muamua, ne mafau‵fau latou me ka uke atu olotou mea e maua, kae ne ‵togi foki latou taki tokotasi ki se tenali* e tasi. 11  I te mauaga o olotou peofuga ne kamata ei latou o fameo ki te matai o te fale 12  kae fai atu, ‘A tāgata konei ne fakamuli mai e tasi fua te itula ne ga‵lue i ei; kae e faka‵pau eiloa ne koe olotou peofuga mo matou kolā ne fi‵ta i te ga‵luega i te aso kātoa mo te ‵vela o te la!’ 13  Kae ne tali atu a ia ki se tokotasi o latou, ‘Toku tagata, e seai soku ‵se. E a, ne seki lotomalie koe ke galue mō se tenali* e tasi?+ 14  Puke tou peofuga kae fano. E manako au o tuku atu ki te tino tenei ne fakamuli a te ‵togi foki tenā ne maua ne koe. 15  E a, e se saoloto au o fai a te mea e manako au ki ei i aku mea totino? Io me e loto masei fua koe ona ko au e ‵lei?’*+ 16  I te feitu la tenei, ko latou kolā ne ‵mua ka faka‵muli, kae ko latou kolā ne faka‵muli ka ‵mua.”+ 17  I te lotou ologa ki Ielusalema, ne ‵taki ne Iesu ana soko e toko 12 ke faipati atu ki a latou i a latou eiloa i te auala:+ 18  “Kiloke! A tatou e olo ki Ielusalema kae ka tuku atu a te Tama a te tagata ki faitaulaga pule mo failautusi. Ka fakasala ne latou a ia ki te mate+ 19  kae tuku atu a ia ki tino o fenua fakaa‵tea ke fakatauemu kae fakasaua kae tamate i luga i se pou;+ kae i te tolu o aso ka toe fakatu aka ei a ia.”+ 20  Tenā ne fanatu ei te mātua o tama a Sepetaio+ ki a ia fakatasi mo ana tama tāgata, ne ifo atu tou fafine i ana mua kae fai atu tena fakamolemole ki a ia.+ 21  Ne fai atu a Iesu ki tou fafine: “Se a te mea e manako koe ki ei?” Ne tali atu tou fafine: “Fai mai aka sau pati ke saga‵saga aku tama e tokolua konei i ou feitu, e tokotasi i tou feitu fakaatamai kae tokotasi i tou feitu fakamaui i tou Malo.”+ 22  Ne tali atu a Iesu: “E se iloa ne koulua a te mea telā ne fakamolemole mai koulua ki ei. E a, e mafai ne koulua o inu a te ipu telā ko pili o inu ne au?”+ Ne tali atu lāua: “E mafai ne māua.” 23  Ne fai atu a ia ki a lāua: “Ka inu eiloa a koulua i taku ipu,+ kae e seai saku pule ki te tino telā ka sagasaga i toku feitu fakaatamai mo toku feitu fakamaui, me i koga konei e ‵nofo fua i ei a tino kolā ko oti ne fakatoka ne toku Tamana mō latou.”+ 24  I te ‵logoga a nisi soko e tokosefulu i te mea tenei, ne ita latou ki te tautaina konei.+ 25  Kae ne kalaga atu a Iesu ke o‵mai latou ki a ia kae fai atu: “E iloa ne koutou i takitaki o malo e fai pelā me ne aliki ki luga i tino kae ko tāgata takutakua e pule fakasaua ki luga i a latou.+ 26  Kae ko koutou e se ‵tau o fai penā,+ kae ko so se tino i a koutou e manako ke sili a ia, e ‵tau o fai mo fai te otou tavini,+ 27  kae ko so se tino e manako ke mua a ia i a koutou e ‵tau o fai mo fai te otou pologa.+ 28  E pelā mo te Tama a te tagata, ne seki vau ke tavini mai a tino ki a ia, kae ke tavini atu+ ki tino kae tuku atu foki tena ola e pelā me se togiola mō tino e tokouke.”+ 29  I te lotou ologa kea‵tea mai i Ieliko ne tau‵tali atu se vaitino i a ia. 30  Kae kiloke! i te ‵logoga a tāgata ‵kivi e tokolua kolā e saga‵saga i tafa o te auala i a Iesu e sasale atu i lā tafa, ne ka‵laga atu ei lāua: “Te Aliki, te Tama a Tavita, ke alofa mai koe ki a māua!”+ 31  Kae ne ‵liko atu te vaitino ki a lāua ke se uā; kae ne gasolo o paka‵laga malosi atu lāua, kae fai atu: “Te Aliki, te Tama a Tavita, ke alofa mai koe ki a māua!” 32  Ne tu a Iesu, kalaga atu ki a lāua kae fai atu: “Se a te mea e ma‵nako koulua ke fai ne au mō koulua?” 33  Ne tali atu lāua: “Te Aliki, fai aka ke ‵kite mā mata.” 34  Ona ko tena alofa, ne fakapatele atu a Iesu ki lā mata,+ kae ne ‵lei fakavave ei lā mata, kae tau‵tali atu lāua i a ia.

Fakamatalaga mai lalo

Onoono ki te MF E14.
Telā kāti ko te 9:00 i te tafataeao.
Telā kāti ko te 12:00 i te tutonu.
Telā kāti ko te 3:00 i te fakaafiafi.
Telā kāti ko te 5:00 i te fakaafiafi.
Onoono ki te MF E14.
Onoono ki te MF E14.
Onoono ki te MF E14.
Io me “kaimalie.”