Te Tusi a Mataio 16:1-28

  • Ne fakamolemole atu mō se fakailoga (1-4)

  • Mea faka‵fete a te kau Falesaio mo Satukaio (5-12)

  • Kī o te Malo (13-20)

    • Ne fakatu aka te fakapotopotoga i luga i se kaupapa (18)

  • ‵Valo mai te mate o Iesu (21-23)

  • Soko ‵tonu (24-28)

16  Ne olo atu a Falesaio mo Satukaio ki a Iesu i konā o tofotofo a ia, kae ne fesili atu latou ki a ia ke fakaasi mai ne ia ki a latou se fakailoga mai te lagi.+  Ne tali atu a ia ki a latou: “Kafai ko afiafi e fai aka koutou penei, ‘Ka ‵lei te aso, me e kula malosi te lagi,’  kae i te tafataeao, ‘Ka ‵moko kae ‵to te vaiua i te aso nei, me e kula malosi te lagi kae pouli.’ E iloa ne koutou o fakamatala a foliga o te lagi, kae e se iloa ne koutou o fakamatala a fakailoga o taimi.  A te kautama matagā kae mulilua* e ‵sala faeloa ki se fakailoga, kae ka seai eiloa se fakailoga e tuku atu ki ei+ kae na ko te fakailoga o Iona.”+ Oti aka fano ei tou tagata kae tiaki atu latou.  Ne olo atu ana soko ki te suā feitu kae ne puli i a latou ke ave ne falaoa.+  Ne fai atu a Iesu ki a latou: “Ke matapula‵pula koutou, kae fakaeteete i te mea faka‵fete a te kau Falesaio mo Satukaio.”+  Kae ne kamata o fai‵pati latou i a latou eiloa, olotou muna: “E seai ne falaoa ne aumai ne tatou.”  Ne iloa ne Iesu olotou pati, kae fai atu: “Kaia e fai‵pati ei koutou me e seai ne otou falaoa, koutou kolā e fo‵liki otou fakatuanaki?  E a, e se lavea ne koutou te manatu tāua i konei, io me e se masaua ne koutou a falaoa e lima kolā ne fagai ki ei te toko 5,000 tāgata, mo te fia o tapola kolā ne ‵toe mai i ei?+ 10  Io me ko falaoa e fitu kolā ne fagai ki ei te toko 4,000 mo te fia o tapola ‵lasi kolā ne ‵toe mai i ei?+ 11  Kaia ne seki maina ei koutou me i a au ne seki faipati atu ki a koutou e uiga ki falaoa? Kae ke fakaeteete koutou i te mea faka‵fete a te kau Falesaio mo Satukaio.”+ 12  Tenā ne maina ei latou me ne fai atu a ia ke fakaeteete, e se ki te mea faka‵fete falaoa, kae ko akoakoga a Falesaio mo Satukaio. 13  I tena okoatuga ki te kogā koga ko Kaisaleia Filipi, fesili atu ei a Iesu ki ana soko: “Ne a muna a tino, me ko oi te Tama a te tagata?”+ 14  Olotou muna: “E fai mai a nisi tino me ko Ioane te Papatiso,+ kae ko nisi tino ko Elia,+ kae e fai mai foki a nisi tino me ko Ielemia io me se tino e tokotasi o te kau pelofeta.” 15  Ne fai atu a ia ki a latou: “Kae ko koutou la, se a te otou faka‵tau, ko oi au?” 16  Ne tali atu a Simona Petelu: “A koe ko te Keliso,+ ko te Tama a te Atua ola.”+ 17  Ne tali atu a Iesu ki a ia: “Ke fiafia koe e Simona te tama a Iona, me e seki fakailoa atu ne se tino* ki a koe a te mea tenei kae ko toku Tamana i te lagi ne fakailoa atu ne ia.+ 18  E fai atu foki au ki a koe: A koe ko Petelu,+ kae i luga i te kaupapa+ tenei ka fakatu ne au i ei taku fakapotopotoga, kae ka se mafai ne mataloa o te Tanuga* o fakatakavale. 19  Ka tuku atu ne au ki a koe a kī o te Malo o te lagi, kae ko so se mea e saisai ne koe i te lalolagi ko oti ne saisai i te lagi, kae ko so se mea e ‵tala ne koe i te lalolagi ko oti ne ‵tala i te lagi.” 20  Tenā ne fakatonu malosi atu ei a ia ki ana soko ke mo a eiloa ma fakaasi atu ki so se tino i a ia ko te Keliso.+ 21  Mai te taimi tenā o fano ki mua, ne kamata o fakamatala atu ne Iesu ki ana soko me e ‵tau mo ia o fano ki Ielusalema ke logo‵mae a ia i mea e uke mai toeaina mo faitaulaga pule mo failautusi, kae ka tamate a ia, kae i te tolu o aso ka toe fakatu aka ei a ia.+ 22  Ona ko te mea tenei ne ‵taki atu a ia ne Petelu ki se feitu e tasi kae kamata o ‵liko atu ki a ia, ana muna: “Te Aliki, ke alofa koe ki a koe eiloa; ke mo a eiloa ma tupu te mea tenei ki a koe.”+ 23  Ne ‵fuli atu tena tua, kae fai atu ki a Petelu: “Fano kea‵tea mai i a au, e Satani! Ko fai koe mo fai se fakalavelave ki a au, me i a koe e se mafaufau e pelā mo te Atua kae e pelā mo tāgata.”+ 24  Tenā ne fai atu ei a Iesu ki ana soko: “So se tino e fia tautali mai i a au, ke se toe mafaufau ki a ia eiloa, kae ke amo tena pou fakasaua* kae tumau i te tautali mai i a au.+ 25  Me ko so se tino e manako o fakasao tena ola, ka se maua ne ia, kae ko so se tino e galo tena ola ona ko au ka maua ne ia.+ 26  Kae se a te mea ‵lei ka maua ne se tagata māfai e maua ne ia te lalolagi kātoa kae galo atu tena ola i ei?+ Io me se a foki te mea e mafai o tuku atu ne se tagata ke sui ei tena ola?+ 27  Me ka vau eiloa te Tama a te tagata i te ‵malu o tena Tamana fakatasi mo ana agelu, kae ka toe taui atu ne ia ki tino taki tokotasi e ‵tusa eiloa mo olotou faifaiga.+ 28  Au e fai ‵tonu atu ki a koutou me e isi ne tino e ‵tu mai i konei ka se ‵mate* seiloga ke lavea muamua ne latou te Tama a te tagata e vau i tena Malo.”+

Fakamatalaga mai lalo

Io me “e se fakamaoni.”
Eleni, “‵kano mo toto.”
Io me “Heitisi,” telā ko te tanuga masani o tino. Onoono ki te FP.
Onoono ki te FP.
Eleni, “tami ki te mate.”