Te Tusi a Mataio 12:1-50

  • Iesu, te “Aliki o te Sapati” (1-8)

  • Ko ‵lei te tagata ne ‵mate tena lima (9-14)

  • Te tavini fagasele a te Atua (15-21)

  • Ko afuli kea‵tea a temoni ne te agaga tapu (22-30)

  • Agasala telā e se mafai o fakamagalogina (31, 32)

  • E iloa fua te lakau i ana fuataga (33-37)

  • Te fakailoga o Iona (38-42)

  • Taimi e toe ‵foki mai ei agaga ma‵sei (43-45)

  • Te mātua mo taina o Iesu (46-50)

12  I te taimi tenā, ne olo atu ei a Iesu mo ana soko i loto i te fatoaga saito i te Sapati. Ne fia‵kai ana soko, tau ei ne latou a kaufui saito o kai.+  I te laveaga ne Falesaio a te mea tenei, fai atu ei latou ki a ia: “Kiloke! Ko fai ne ou soko a te mea telā e tapu i te Sapati.”+  Ne fai atu a ia ki a latou: “E a, e seki fai‵tau koutou ki te mea ne fai ne Tavita mo ana tāgata i te taimi ne fia‵kai ei latou?+  I te taimi ne ulu ei a ia ki loto i te fale o te Atua kae kai ne latou a falaoa kolā ko oti ne ofo atu ki te Atua,+ se mea telā e tapu ma kai a ia ki ei io me ko latou kolā ne olo mo ia, kae na ko faitaulaga fua?+  Io me e seki fai‵tau koutou ki te Tulafono me i taimi o Sapati ne soli sāle ne faitaulaga i te faletapu a te Sapati kae e se agasala eiloa latou?+  Kae e fai atu au ki a koutou me e isi se tino i konei e sili atu i te faletapu.+  Tela la, moi fai ne malamalama koutou i te uiga o te mea tenei, ‘Au e manako ki te alofa fakamagalo,+ kae e se ko taulaga,’+ penei e se taku fakamasei ne koutou a tino e se agasala.  Me i te Tama a te tagata ko te Aliki o te Sapati.”+  I te tiakinaga ne ia a te koga tenā, fanatu ei a ia ki loto i te lotou sunako, 10  kae kiloke! e isi se tagata i konā e ‵mate tena lima!+ Fesili atu ei latou ki a ia, “E a, e saoloto i te tulafono ke faka‵lei a masaki i te Sapati?” me ne ‵sala latou ki se mea ke ‵losi atu ki a ia.+ 11  Ne fai atu a ia ki a latou: “Kafai e tasi fua tau mamoe kae tō te mamoe tenā ki loto i se lua i te Sapati, e a, e isi se tagata i a koutou ka se puke ne ia te mamoe tenā o ‵futi aka ki luga?+ 12  E sili fakafia atu te tāua o te tagata i lō te mamoe! Tela la, e saoloto i te tulafono ke fai a mea ‵lei i te Sapati.” 13  Tenā fai atu ei a ia ki te tagata tenā: “‵Fola mai tou lima.” Kae ne ‵fola atu ne ia tena lima, ko te mea eiloa ko ‵lei e pelā mo tena suā lima. 14  Kae ne olo a Falesaio ki tua kae fono ke tamate ne latou a ia. 15  Ne iloa ne Iesu a te mea tenā, fano ei a ia kea‵tea. Ne tau‵tali atu foki i a ia a tino e tokouke,+ ne faka‵lei ne ia a latou katoa, 16  kae fakatonu malosi atu a ia ki a latou ke mo a ma fakailoa atu ki tino a mea e uiga ki a ia,+ 17  ko te mea ke mafai o fakataunu a pati kolā ne fai e auala i te pelofeta ko Isaia, ana muna: 18  “Kiloke! Tenei taku tavini+ telā ne filifili ne au, ko taku fagasele, telā ne talia ne au!+ Ka tuku atu ne au ki luga i a ia toku agaga+ kae ka fakamaina ne ia ki atufenua katoa a te uiga o te fakamasinoga tonu. 19  Ka se kinau a ia+ io me pakalaga, io me lagona ne se tino tena leo i auala. 20  E seai se mouku telā ko magemage ka lakalaka ne ia, kae ka se tamate ne ia se ‵vae o te moli telā e kākā malie+ ke oko eiloa ki te taimi e aumai ei ne ia te fakamasinoga tonu mo te manuia. 21  E tonu, ka fakamoe‵moe a tino katoa ki tena igoa.”+ 22  Tenā ne aumai ei ne latou ki a ia se tagata e pukea ne se temoni telā e ‵kivi kae gūgū, kae ne faka‵lei ne ia ko te mea ke mafai o ‵kite kae faipati a te tagata gūgū tenā. 23  Ne ofo a te vaitino kae kamata o fai aka olotou pati: “E mata, e se ko ia tenei te Tama a Tavita?” 24  I te lagonaga ne Falesaio a te mea tenei, fai atu ei latou: “E afuli kea‵tea ne te tino tenei a temoni e auala i a Pelesepulo,* te pule o temoni.”+ 25  Ne iloa ne Iesu olotou mafaufauga, fai atu ei ki a latou: “So se malo e ‵nofo mavae‵vae e se mafai o tumau, kae ko so se fakai io me se kāiga telā e ‵nofo mavae‵vae ka se tumau. 26  E penā foki eiloa, kafai a Satani e afuli kea‵tea ne ia a Satani, ko tena uiga ko mavaevae eiloa a ia. Ka mafai la pefea o tumau tena malo? 27  E se gata i ei, kafai e afuli kea‵tea ne au a temoni e auala i a Pelesepulo, i o oi la te malosi e afuli ei kea‵tea ne otou tama a temoni? Tenei te pogai ka fai ei latou mo fai otou famasino. 28  Kae kafai e afuli kea‵tea ne au a temoni e auala i te agaga o te Atua, ko tena uiga ko oti ne oko mai te Malo o te Atua ki a koutou.+ 29  Io me e mafai pefea o ulu mālō atu se tino ki se fale o se tagata mafi kae ‵fao ne ia ana kope, seiloga ke saisai muamua ne ia te tagata mafi tenā? Tenā fua te auala e mafai ei ne ia o puke a kope mai tena fale. 30  So se tino e se kau mai ki a au e ‵teke mai ki a au, kae ko so se tino e se ga‵lue fakatasi māua o fakamaopoopo mai a tino e faka‵kalo ne ia a tino.+ 31  “Ona ko te pogai tenei, au e fai atu ki a koutou, so se vaegā agasala mo pati ma‵sei katoa e fai ne tino ka fakamagalogina, kae ko pati ma‵sei e fai ki te agaga ka se fakamagalogina.+ 32  E pelā mo so se tino e muna masei ki te Tama a te tagata ka fakamagalogina a ia,+ kae ko so se tino e muna masei ki te agaga tapu ka se fakamagalogina a ia i te olaga tenei io me ko te olaga* telā ka oko mai.+ 33  “E mafai o fai ne koutou a te lakau ke ‵lei kae ke fua mai foki i ei a fuataga ‵lei, io me fai ne koutou se lakau ke masei kae ke ma‵sei foki ana fuataga, me e iloa fua a te lakau i ana fuataga.+ 34  Tama a gata ‵poisini,+ e mafai pefea o fai‵pati koutou ki mea ‵lei māfai a koutou ne tino amio ma‵sei? Me e faipati mai ne te gutu a mea kolā e ‵fonu i te loto.+ 35  A te tagata ‵lei e aumai sāle ne ia mai i ana koloa ‵lei a mea ‵lei, kae ko te tagata masei e aumai sāle ne ia mai i ana koloa ma‵sei a mea ma‵sei.+ 36  Au e fai atu ki a koutou me ka tuku atu ne tāgata se tala+ e uiga ki pati sē aoga katoa kolā ne fai ne latou, i te Aso Fakamasino; 37  me ka taku amiotonugina koutou e auala i otou pati, kae ka taku fakamaseigina foki koutou e auala i otou pati.” 38  Tenā ne tali atu ei a nisi failautusi mo Falesaio ki a ia: “Te Faiakoga, a matou e ma‵nako ke lavea ne matou se fakailoga mai i a koe.”+ 39  Ne tali atu a ia ki a latou, ana muna: “A te kautama matagā kae mulilua* e ‵sala faeloa ki se fakailoga, kae ka seai eiloa se fakailoga e tuku atu ki ei kae na ko te fakailoga o Iona te pelofeta.+ 40  Me e pelā eiloa mo Iona ne nofo atu i te tinae o te ika lasi i ao e tolu mo po e tolu,+ e penā foki te Tama a te tagata, ka nofo i lalo i te laukele i ao e tolu mo po e tolu.+ 41  Ka toe faka‵tu aka a tino Nineva i te fakamasinoga fakatasi mo te kautama tenei kae ka taku fakamasei i ei a latou, me ne sala‵mo latou i te talaiga a Iona.+ Kae kiloke! e isi se tino i konei e sili atu i a Iona.+ 42  Ka toe fakatu aka a te tupu fafine mai saute i te fakamasinoga fakatasi mo te kautama tenei kae ka taku fakamasei i ei a te kautama tenei; me ne vau a ia mai koga ‵mao o te lalolagi ke lagona ne ia te poto o Solomona.+ Kae kiloke! e isi se tino i konei e sili atu i a Solomona.+ 43  “Kafai e fano ki tua se agaga masei mai se tagata, e ui atu a ia i loto i koga e seai ne vai i ei o salasala se koga mo ana malōlō, kae ka se maua ne ia.+ 44  Tenā ko fai ifo ei a ia, ‘Au ka toe foki ki toku fale telā ne vau au i ei,’ kae i tena okoatuga ki ei ne maua atu ne ia me e seai se tino e nofo i ei kae ko ‵ma kae ne teu fakagaligali. 45  Tenā ne toe fano ei a ia kae puke mai a nisi agaga e tokofitu kolā e ma‵sei atu i a ia, kae i te lotou uluatuga ki loto i te fale, ‵nofo ei latou i konā; kae ka sili atu la te masei o te ikuga o te tagata tenā i lō te taimi muamua.+ Tenā foki eiloa te mea ka tupu ki te kautama matagā tenei.” 46  Kae koi faipati a ia ki te vaitino, ne ‵tu mai i tua a tena mātua mo ana taina+ kolā ne fia fai‵pati ki a ia.+ 47  Tenā ne fai atu ei se tino ki a ia: “Kiloke! A tou mātua mo ou taina kolā e ‵tu i tua kae e fia fai‵pati ki a koe.” 48  Ne tali atu a ia ki te tino tenā: “Ko oi toku mātua, kae ko oi foki oku taina?” 49  Kae ne tusi atu tena lima ki ana soko kae fai atu: “Kiloke! Ko toku mātua mo oku taina konei!+ 50  Me ko so se tino e fai ne ia te loto o toku Tamana telā i te lagi, ko ia tenā ko toku taina mo toku tuagane mo toku mātua.”+

Fakamatalaga mai lalo

Se igoa e fakasino atu ki a Satani.
Io me “te vaitaimi tenei.” Onoono ki te FP.
Io me “e se fakamaoni.”