Te Tusi a Mataio 11:1-30

  • Ko tavaegina a Ioane te Papatiso (1-15)

  • Ko taku fakamasei se kautama fui fai (16-24)

  • Ko tavae ne Iesu tena Tamana mō te fakatāua ne ia o tino loto mau‵lalo (25-27)

  • E fakamalosi loto te amo a Iesu (28-30)

11  I te otiga ne tuku atu ne Iesu a fakatonuga ki ana soko e toko 12, fanatu ei a ia o akoako kae talai atu i loto i olotou fakai.+  Kae ko te logoga a Ioane i loto i te falepuipui+ e uiga ki galuega a Keliso, uga atu ei ne ia ana soko+  ke fesili atu ki ei: “A koe ko te Tino telā ka vau, io me koi faka‵tali matou ki se isi tino?”+  Ne tali atu a Iesu ki a lāua: “Olo o fakailoa atu ki a Ioane a mea kolā ko lagona kae lavea ne koulua:+  A tino ‵kivi ko ‵kite+ kae ko tino vae ma‵sei ko sa‵sale, a tino lepela+ ko oti ne faka‵magina kae ko tino ‵tuli ko ‵logo, a tino ‵mate ko oti ne faka‵tu aka, kae ko oti ne folafola atu a te tala ‵lei ki tino ma‵tiva.+  Ka fiafia a te tino telā e se siga ona ko au.”*+  I te ologa a lāua konei, ne kamata a Iesu o faipati atu ki te vaitino e uiga ki a Ioane: “Se a te mea ne fia lavea ne koutou i te koga lavaki?+ E mata, se mouku loa telā e agi valevale ne te matagi?+  Se a la te mea ne fia lavea ne koutou? E mata, se tagata e pei ki gatu ‵gali?* A tino kolā e ‵pei ki gatu ‵gali e ‵nofo i fale o tupu.  Se a la te mea ne fia lavea tonu ne koutou? Se pelofeta? E tonu, au e fai atu ki a koutou, a ia tenā e sili fakafia atu i se pelofeta.+ 10  Ko ia eiloa tenei ne tusi mai e uiga ki ei: ‘Kiloke! Ko uga atu ne au taku avefekau ke mua i a koe, telā ka mua atu o fakatoka tou auala!’+ 11  Au e fai ‵tonu atu ki a koutou, e seai se tino mai i a latou kolā ne fa‵nau mai i fāfine e sili atu i a Ioane te Papatiso, kae ko te ‵toe tino malalo i te Malo o te lagi e sili atu i a ia.+ 12  Mai i aso o Ioane te Papatiso ke oko mai ki aso nei, a te Malo o te lagi ko te fakamoemoega telā e kausaki ki ei a tino, kae ko tino kolā e maua ne latou ka taofi ‵mau eiloa ki ei.+ 13  Me ne ‵valo mai a Pelofeta katoa mo te Tulafono ke oko ki a Ioane;+ 14  kae kafai e talia ne koutou a ia mo te loto fia‵fia, a ia tenā ko ‘Elia telā ka fai o vau.’+ 15  A te tino telā e isi ne ana taliga ke na fakalogo la ki ei. 16  “Ko oi ka fakatusa ne au ki ei a te kautama tenei?+ A latou konei e pelā me ne tama‵liki fo‵liki e saga‵saga i te maketi kae ka‵laga atu ki olotou taugasoa, 17  olotou muna: ‘Ne fakatagi ne matou te faili mō koutou, kae ne seki ‵saka koutou; ne ‵tagi mautuutu matou, kae e se ‵tagi fanoa‵noa koutou.’ 18  E penā foki te vauga a Ioane, ne seki kai io me ne seki inu, kae fai mai a tino, ‘E isi se temoni i a ia.’ 19  I te vauga a te Tama a te tagata, ne kai kae inu,+ kae fai mai a tino, ‘Kiloke! A te tagata tenei se tino gafula kae inu uaina, se taugasoa o tino ‵tae lafoga mo tino agasala.’+ Kae e fakatalitonugina te poto o te tagata e auala i ana galuega amio‵tonu.”+ 20  Tenā ne kamata ei o taku fakamasei ne Iesu a fakai kolā ne fai i ei te ukega o ana galuega ‵mana, me ne seki sala‵mo latou: 21  “Kalofa eiloa i a koe e Koasini! Kalofa eiloa i a koe e Petesaita! me i galuega ‵mana kolā ko oti ne fai i a koutou moi ne fai i Tulo mo Saitonu, penei ko leva ne sala‵mo latou kae ‵pei ki gatu lautaga kae sagasaga i luga i ‵pefu.+ 22  Kae fai atu au ki a koutou: ka feoloolo atu a te fakasalaga o Tulo mo Saitonu i te Aso Fakamasino i lō koutou.+ 23  Kae ko koe e Kapanaumi,+ e mata, ka fakamaluga aka koe ke oko ki te lagi? A koe ka ‵pei ‵tuki ki lalo i te Tanuga*+ me i galuega ‵mana kolā ko oti ne fai i a koutou moi ne fai i Sotoma, penei koi tumau eiloa te fakai tenā ke oko mai ki te aso nei. 24  Tela la, au e fai atu ki a koutou, ka feoloolo atu a te fakasalaga o te fenua o Sotoma i te Aso Fakamasino i lō koutou.”+ 25  Ne tali atu a Iesu i te taimi tenā: “E tavae ne au a koe i mua o tino katoa, e toku Tamana, te Aliki o te lagi mo te lalolagi, me ko oti ne ‵funa ne koe a mea konei mai i tino ‵poto mo tino ne a‵koga ma‵luga kae fakaasi atu a mea konā ki tama‵liki fo‵liki.+ 26  Ao, e toku Tamana, me tenei eiloa te auala e talia ne koe. 27  Ko oti ne tuku mai ki a au a mea katoa ne toku Tamana,+ kae e seai se tino e iloa katoatoa ne ia a te Tama kae na ko te Tamana.+ E seai foki se tino e iloa katoatoa ne ia a te Tamana kae na ko te Tama, mo so se tino telā e manako te Tama o fakaasi ki ei.+ 28  O‵mai ki a au, a koutou katoa kolā e fi‵ta kae ‵mafa otou amoga, me ka tuku atu ne au ki a koutou se malosi fou. 29  Ke puke ne koutou taku amo kae fakaakoako mai ki a au, me i a au e agamalu kae loto maulalo,+ kae ka maua ne koutou i ei se malosi fou. 30  Me e amogofie* taku amo, kae māmā foki taku amoga.”

Fakamatalaga mai lalo

Io me “e se ‵tuka tena loto.”
Io me “gatu ‵lei.”
Io me “Heitisi,” telā ko te tanuga masani o tino. Onoono ki te FP.
Io me “faigofie o amo.”