Te Tusi a Mataio 10:1-42

  • Apositolo e toko 12 (1-4)

  • Fakatonuga mō te galuega talai (5-15)

  • Ka fakasauagina a soko (16-25)

  • Mataku ki te Atua, e se ko tāgata (26-31)

  • Te pelu kae e se ko te filemu (32-39)

  • Te taliaga o soko o Iesu (40-42)

10  Tenā ne fakatonu atu ei a Iesu ki ana soko e toko 12 kae tuku atu ne ia ki a latou te pulega i luga i agaga ma‵sei+ ko te mea ke mafai o afuli kea‵tea a latou kae faka‵lei aka a vaegā masaki katoa.  Konei a igoa o apositolo e toko 12:+ Muamua ko Simona, telā e fakaigoa foki ki a Petelu,+ mo tena taina ko Anitelea;+ Iakopo te tama a Sepetaio mo tena taina ko Ioane;+  Filipo mo Patolomaio;+ Toma+ mo Mataio+ te tino ‵tae lafoga; Iakopo te tama a Alefaio; Tataio;  Simona te tino loto finafinau,* mo Iuta te Isikaliota telā ne fakatogafiti fakamuli ne ia a Iesu.+  Ne uga atu ne Iesu a te toko 12 konei ke olo o talai mo fakatonuga konei:+ “Sa olo ki tino o fenua fakaa‵tea, kae sa olo foki ki fakai o Samalia;+  kae ke olo atu faeloa ki mamoe kolā ko ‵galo o te fenua o Isalaelu.+  Olo o talai atu penei: ‘A te Malo o te lagi ko pili mai.’+  Fai ke ‵lei a masaki o tino,+ faka‵tu a tino ‵mate, faka‵ma a lepela, afuli kea‵tea a temoni. Ne maua ne koutou a mea konei e aunoa mo se ‵togi, tuku atu foki e aunoa mo se ‵togi.  Sa ave ne koutou ne aulo io me ne siliva io me ne kopa i otou taga tupe,+ 10  io me ne taga meakai mō te malaga, io me ne gatu e lua,* io me ne taka io me se tokotoko,+ me e ‵tau o maua ne te tino faigaluega ana meakai.+ 11  “I so se fakai e oko koutou ki ei, ‵sala atu ki tino kolā e mafai o talia ne latou te fekau kae ‵nofo i konā ke oko eiloa ki te taimi e toe ‵foki ei koutou.+ 12  Kafai e ulu atu koutou ki se fale, fakatalofa atu ki tino i loto i ei. 13  Kafai e talia ne latou, ke i luga i a latou te filemu;+ kae kafai e se talia ne latou, toe fakafoki mai la te filemu ki a koutou. 14  So se koga e se talia ei koutou ne se tino io me e se fakalogo ki otou pati, tuetue atu la a ‵pefu i otou vae māfai e olo koutou kea‵tea mai te fale io me ko te fakai tenā.+ 15  Au e fai ‵tonu atu ki a koutou, ka feoloolo atu a te fakasalaga o Sotoma mo Komolo+ i te Aso Fakamasino i lō te fakai tenā. 16  “Kiloke! Ka uga atu ne au koutou e pelā me ne mamoe i va o kuli vao. Tela la, ke fakaeteete koutou e pelā me ne gata kae ke filemu e pelā me ne lupe.+ 17  Ke fakaeteete koutou i tino, me ka ave koutou ne latou ki fono fakamasino+ kae ka ‵ta fakamasei ne latou koutou+ i olotou sunako.+ 18  Kae ka ave koutou ki mua o kovana mo tupu ona ko au,+ ke fai mo molimau ki a latou e pelā foki mo fenua fakaa‵tea.+ 19  Kae kafai e tuku atu ne latou a koutou ke fakamasino, sa manava‵se ki te auala e fai‵pati ei koutou io me ko pati kolā ka fai ne koutou; me ka tuku atu eiloa ki a koutou a pati kolā ka fai ne koutou i te itula tenā;+ 20  me i tino kolā ka fai‵pati e se ko koutou fua, kae ko te agaga o te otou Tamana telā e faipati atu e auala i a koutou.+ 21  E se gata i ei, ka tuku atu ne te tino a tena taina ke tamate, e penā foki mo te tamana ki tena tamaliki, kae ka ‵teke atu a tama‵liki ki olotou mātua kae tuku atu ke tamate.+ 22  Kae ka takalia‵lia a tino katoa ki a koutou ona ko toku igoa,+ kae ko te tino telā e kufaki ke oko ki te gataga ka sao eiloa.+ 23  Kafai e fakasaua atu latou ki a koutou i se fakai e tasi, ‵tele ki te suā fakai;+ me e fai tonu atu au ki a koutou, ka se mafai o palele i a koutou a fakai katoa o Isalaelu kae ko oko mai te Tama a te tagata. 24  “E se sili atu a te tamaliki akoga i tena faiakoga, io me ko te pologa i tena matai.+ 25  E mafai eiloa o fai a te tamaliki akoga e pelā mo tena faiakoga, kae ko te pologa e pelā mo tena matai.+ Kafai ne fakaigoa ne tino a te matai o te kāiga ki a Pelesepulo,*+ e pefea te ma‵sei atu o igoa kolā ka fakaigoa ki ei a nisi tino o tena kāiga? 26  Tela la, sa ma‵taku ki a latou, me e seai se mea e ufi ke galo kae e se fakaasi, e seai foki se mea ‵funa ka se iloa.+ 27  A mea kolā e fai atu ne au ki a koutou i te pouliga, ke fai atu i te mainaga, kae ko mea kolā e musumusu atu ki a koutou, ke na folafola atu ki tino mai luga i tuafale.+ 28  Kae sa ma‵taku ki a latou kolā e tamate ne latou te foitino kae e se mafai o tamate ne latou te ola;+ kae ke ma‵taku ki a ia telā e mafai o fakaseai ne ia te ola mo te foitino i Kena.*+ 29  E a, e se ‵togi fua a manu eva fo‵liki e lua ki se sene e tasi?* Kae e se mafai o tō se manu e tasi i manu konā ki lalo i te laukele kae e se iloa ne te otou Tamana.+ 30  Kae ke oko eiloa ki laulu i otou ulu ko oti katoa ne lau. 31  Tela la, sa ma‵taku; e sili atu te tāua o koutou i lō manu eva fo‵liki e uke.+ 32  “Tela la, so se tino e taku atu ne ia i mua o tino me e iloa ne ia au,+ ka taku atu foki ne au me e iloa ne au a ia i mua o toku Tamana telā i te lagi.+ 33  Kae ko so se tino e fakafiti ne ia au i mua o tino, ka fakafiti foki ne au a ia i mua o toku Tamana telā i te lagi.+ 34  Sa mafaufau i a au ne vau o aumai a te filemu ki te lalolagi, au ne vau o aumai te pelu kae e se ko te filemu.+ 35  Me i a au ne vau o faka‵tupu a mavae‵vaega, ko te tagata e ‵teke atu ki tena tamana, ko te tama fafine e ‵teke atu ki tena mātua, kae ko te avaga a te tama tagata e ‵teke atu ki te mātua o tena avaga.+ 36  E tonu, a fili o te tagata ko tino eiloa o tena kāiga ‵tonu. 37  So se tino e sili atu tena alofa ki tena tamana io me ko tena mātua i lō au e seai sena aoga ki a au; kae ko so se tino e sili atu tena alofa ki tena tamaliki tagata io me ko tena tamaliki fafine i lō au e seai foki sena aoga ki a au.+ 38  Kae ko so se tino e se fia amo tena pou fakasaua* kae tautali mai i a au, e seai sena aoga ki a au.+ 39  So se tino e manumanu ki tena ola ka se maua ne ia, kae ko so se tino e galo tena ola ona ko au ka maua ne ia.+ 40  “So se tino e talia ne ia koutou e talia foki ne ia au, kae ko so se tino e talia ne ia au e talia foki ne ia a te Atua telā ne uga mai ne ia au.+ 41  So se tino e talia ne ia se pelofeta ona ko ia se pelofeta ka maua ne ia te taui o te pelofeta,+ kae ko so se tino e talia ne ia se tagata amiotonu ona ko ia se tagata amiotonu ka maua ne ia te taui o te tagata amiotonu. 42  Kae ko so se tino e ave ne ia se ipu vai ‵moko fua e tasi ke inu i ei se tino fatauva i a latou konei ona ko ia se soko, au e fai ‵tonu atu ki a koutou, ka maua eiloa ne ia tena taui.”+

Fakamatalaga mai lalo

Io me “Simona te Kanana.”
Io me “se suā gatu.”
Se igoa e fakasino atu ki a Satani, te pelenise io me ko te pule o temoni.
Onoono ki te FP.
Eleni, “ki se asilioni.” Onoono ki te MF E14.
Onoono ki te FP.