Te Tusi a Maleko 5:1-43

  • Ko uga atu ne Iesu a temoni ki loto i puaka (1-20)

  • Te tama fafine a Iailo; se fafine ne patele atu ki te gatu o Iesu (21-43)

5  Ne oko atu latou ki te suā feitu o te tai ki te kogā koga o tino Kelasa.+  I te sopoifoga a Iesu ki lalo mo te pōti ne fakafetaui atu ki a ia se tagata telā e pukea ne se agaga masei kae nofo i tanuga.  A ia e nofo sāle eiloa i tafa o tanuga, kae i te taimi tenā, ne seki ai eiloa se tino kai mafai o saisai ne ia tou tagata ki seni.  Ne masani o pikifao tou tagata ki mea ‵sai vae mo seni, kae ne ‵motu ne ia a seni kae fatifati ne ia a pikifao; kae e seai eiloa se mafi ne mafai o puke ne ia tou tagata.  Kae i taimi katoa, i te po mo te ao, e pakalaga faeloa a ia i tanuga mo mauga kae selesele tena foitino ki fatu.  I te laveaga ne ia a Iesu mai se koga tai ‵mao, ne tele atu tou tagata kae ifo atu ki a ia.+  Tenā ne kalaga atu ei a ia: “Ne a aku mea ne fai ki a koe, e Iesu, te Tama a te Atua Tafasili i te Maluga? Tauto mai i te igoa o te Atua me ka se fakapuapuaga ne koe au.”+  Me ko oti ne fai atu a Iesu ki ei: “Vau ki tua mo te tagata tenā, a koe te agaga masei.”+  Ne fesili atu a Iesu ki tou tagata: “Ko oi tou igoa?” Kae ne tali atu a ia: “A toku igoa ko Lekeono, me e tokouke matou.” 10  Kae ne fakatagi fakafia atu tou tagata ki a Iesu ke se ‵tuli a agaga konā kea‵tea mo te fenua tenā.+ 11  I te taimi tenā, e isi se matugā lafu puaka+ e kai‵kai i luga i te mauga.+ 12  Ne fakamolemole atu a agaga konā ki a ia: “Uga atu matou ki puaka konā, ko te mea ke ulu atu matou ki loto i a latou.” 13  Ne talia ne ia te lotou fakatagi. I konā loa, ne olo ei ki tua a agaga ma‵sei kae ulu atu ki loto i puaka konā kae ne ‵tele fakavave atu te lafu puaka ki te kaugutu* o te mauga, ‵to ki lalo i te tai, kāti e nofo ki se 2,000 o manu konā, kae ne ma‵lemu katoa i ei. 14  Ne ‵tele atu a tino fagai puaka o lipoti te mea tenā ki te fakai mo koga i ana tafatafa, olo atu ei a tino o onoono me se a te mea ne tupu.+ 15  Ne olo atu latou ki a Iesu kae lavea ne latou te tagata telā ne pukea ne temoni, ko te tagata telā ne nofo muamua i ei a Lekeono, e sagasaga mai mo ana gatu kae ko ‵lei foki tena mafaufau, ne ma‵taku ei latou. 16  Kae ko tino foki kolā ne lavea ne latou te mea tenā, ne fakamatala atu ki a latou a te mea ne tupu ki te tagata ne pukea ne temoni e pelā foki mo te lafu puaka. 17  Tenā ne kamata ei latou o fakamolemole atu ki a Iesu ke fano kea‵tea mai te lotou kogā koga.+ 18  I tena sopoga ki te pōti, fakamolemole atu ei te tagata ne pukea ne temoni ke olo tasi lāua.+ 19  Kae ne seki talia ne ia, kae fai atu ki te tagata tenā: “Fano ki ou kāiga kae fakailoa atu ki a latou a mea katoa kolā ko oti ne fai ne Ieova* mō koe mo te alofa fakamagalo ne fakaasi atu ne ia ki a koe.” 20  Ne fano te tagata tenei kea‵tea kae kamata o talai atu i Tekapoli* a mea katoa kolā ne fai ne Iesu mō ia, kae ne ofo a tino katoa i ei. 21  I te ‵toe fokiatuga a Iesu i te pōti ki te tafatai i te suā feitu, ne mumu atu se vaitino ki a ia i konā; kae koi nofo eiloa a ia i te tafatai.+ 22  Ne fanatu se ofisa tausi e tokotasi o te sunako e igoa ki a Iailo, kae i te laveaga ne ia a Iesu, fakasiga ifo ei ki ana vae.+ 23  Ne fakamolemole atu faeloa a ia, ana muna: “A taku tamaliki fafine ko oko eiloa i te masaki.* Fakamolemole, vau aka o tuku ou lima ki luga i a ia+ ko te mea ke toe ‵lei a ia kae ola.” 24  Tenā ne olo ei lāua mo Iesu, kae ne tau‵tali atu i a ia se vaitino kae fakatauteke atu i ana tafa. 25  E isi se fafine i konā ne ‵tafe tena sua+ i tausaga e 12.+ 26  Ne logo‵mae malosi a ia i lima o tokita e tokouke kae ko oti foki ne fakaaoga ana tupe katoa e aunoa mo se ‵lei ne maua mai i ei, kae ne gasolo aka eiloa o masei atu. 27  I te lagonaga ne ia a tala e uiga ki a Iesu, ne fanatu a ia i loto i te vaitino mai ana tua kae fakapatele atu ki tena gatu,+ 28  me ne fai ifo faeloa tou fafine ki a ia eiloa, penei: “Ke patele fua au ki tena gatu ko ‵lei ei au.”+ 29  Kae ne gata fakavave te ‵tafe o tena sua, kae ne lagona ne ia i tena foitino me ko oti ne faka‵lei aka te masaki fakalogo‵mae tenā. 30  Ne lagona fakavave ne Iesu te fanoga kea‵tea o te ‵mana+ mai i a ia kae ne mafuli atu ki te vaitino kae fesili atu: “Ko oi ne patele ki toku gatu?”+ 31  Kae ne fai atu ana soko ki a ia: “E lavea ne koe te vaitino konā e fakatauteke atu i ou tafa, kae kaia e fai mai ei koe, ‘Ko oi ne patele mai ki a au?’” 32  Kae ne salasala tou tagata ke lavea ne ia te tino telā ne fai ne ia te mea tenei. 33  Ne mataku te fafine kae polepole, me e iloa ne ia te mea telā ko oti ne tupu ki a ia, ne fanatu tou fafine, fakasiga ifo i ana mua kae fakaasi atu a mea katoa ki a Iesu. 34  Ne fai atu a ia ki tou fafine: “Taku tama, ko tou fakatuanaki ne ‵lei ei koe. Fano mo te filemu+ kae ke ‵lei tou masaki fakalogo‵mae tenā.”+ 35  Kae koi faipati a ia kae oko atu a tāgata mai te fale o te ofisa tausi o te sunako kae fai atu: “A tau tamaliki fafine ko mate! E se ‵tau o toe fakalavelave atu koe ki te Faiakoga.”+ 36  Kae ne lagona ne Iesu olotou pati, fai atu ei ki te ofisa tausi o te sunako: “Sa mataku, ke fakaasi atu fua te fakatuanaki.”+ 37  Ne seki talia ne ia se tino ke tautali atu i a ia kae na ko Petelu, Iakopo, mo Ioane te taina o Iakopo.+ 38  Ne oko atu latou ki te fale o te ofisa tausi o te sunako, kae ne lavea ne ia te logoa o tino kolā e ‵tagi mautuutu kae ‵tagi paka‵laga.+ 39  I te uluatuga ki loto ne fai atu tou tagata ki a latou: “Kaia e ‵tagi mautuutu ei koutou kae logoa valevale? A te tamaliki tenā e seki mate kae e moe fua.”+ 40  Ona ko ana pati konei, ne kamata o ‵kata fakatauemu atu latou ki a ia. Kae i te otiga ne uga ne ia a tino katoa ki tua, olo ei latou ki loto mo te tamana mo te mātua o te tamaliki mo tino kolā ne olo atu mo ia. Ne fanatu a ia ki te koga telā e takato ei te tamaliki tenā. 41  Ne puke ne ia te lima o te tamaliki kae fai atu ki ei: “Talita kumi,” ko tena uiga māfai e ‵fuli: “Te tamaliki fafine, au e fai atu ki a koe, ‘tu ki luga!’”+ 42  Ne tu fakavave aka te tamaliki fafine kae kamata o sasale. (Ko 12 ana tausaga.) Kae ne fia‵fia malosi ei ana mātua. 43  Kae ne fakatonu atu faeloa a ia ki a latou ke mo a ma fakailoa atu te mea tenei ki se isi tino,+ kae fai atu fua ke tuku atu ne meakai ki te tamaliki fafine ke kai.

Fakamatalaga mai lalo

Io me “kaugutu ‵poko.”
Onoono ki te MF A5.
Io me “te Kogā Koga o Fakai e Sefulu.”
Io me “ko pili o mate.”