Te Tusi a Maleko 15:1-47
15 I te vaveao eiloa tenā, ne fono fakavave a faitaulaga pule mo toeaina mo failautusi, ko te Sanetulini kātoa, saisai ei ne latou a Iesu kae ‵taki o tuku atu ki a Pilato.+
2 Ne fesili atu a Pilato ki a ia: “A koe ko te Tupu o tino Iutaia?”+ Ne tali atu a Iesu: “Tenā eiloa e fai mai ne koe.”+
3 Kae ne ‵losi atu a faitaulaga pule ki a ia e uiga ki mea e uke.
4 Ne toe kamata o fesili atu a Pilato ki a ia, ana muna: “E a, e seai sau tali?+ Kiloke ki te uke o ‵losiga a latou ki a koe.”+
5 Kae ne seki toe tali atu a Iesu, tenā ne ofo malosi ei a Pilato.+
6 I aso fakamanatu takitasi, ne masani o ‵tala atu ne ia ki a latou se pagota e tokotasi, telā e fakatagi mai latou ki ei.+
7 I te taimi tenā ne ‵loka i te falepuipui a te tagata e igoa ki a Palapa fakatasi mo tino kolā ne tatino ona ko te lotou ‵teke ki te malo.
8 Ne olo atu te vaitino kae ne kamata o fakatagi atu e ‵tusa mo te mea telā e fai sāle ne Pilato mō latou.
9 Ne tali atu a ia ki a latou, ana muna: “E ma‵nako koutou ke ‵tala atu ne au ki a koutou te Tupu o tino Iutaia?”+
10 Ne iloa ne Pilato me ne tuku atu ne faitaulaga pule a Iesu ki a ia ona ko te loto ma‵sei.+
11 Kae ne fakamalosi aka ne faitaulaga pule a te vaitino ke fai atu ke ‵tala mai ne ia a Palapa.+
12 Kae ne toe fai atu a Pilato ki a latou: “Ne a la aku mea ka fai ki te tino telā e taku ne koutou ko te Tupu o tino Iutaia?”+
13 Ne toe paka‵laga atu latou: “‵Tuki atu a ia ki te pou!”*+
14 Ne fai atu a Pilato ki a latou: “Kaia? Se a tena mea masei ne fai?” Kae ne paka‵laga aka faeloa latou ki luga: “‵Tuki atu a ia ki te pou!”*+
15 Ona ko te manako o Pilato o fakafiafia te vaitino, ne ‵tala atu ei ne ia a Palapa ki a latou; kae i te otiga ne ‵kini a Iesu,+ tuku atu ei ne ia ke tamate i luga i te pou.+
16 Ne ‵taki atu ne sotia a ia ki te koga ateatea i loto i te fale o te kovana, kae ne ‵luku mai ne latou a sotia katoa.+
17 Kae ne fakapei ne latou ki luga i a ia se gatu violeta kae ‵fili ne latou se foualiki ki lakau tala‵tala kae fakafou atu ki ei.
18 Kae ne kamata o ka‵laga atu latou ki a ia: “Talofa, te Tupu o tino Iutaia!”+
19 Ne pagopago foki ne latou tena ulu ki se tokotoko kae puapuaki atu ki a ia, kae ne to‵tuli ifo latou kae ifo atu ki a ia.
20 Fakamuli ifo, i te otiga o olotou faifaiga fakatauemu konā, tapale ei ne latou te gatu violeta kae toe fakapei atu ki ana gatu eiloa. Kae ‵taki atu ne latou a ia ke ‵tuki ki te pou.+
21 Ne fakatonu atu foki latou ki se tino ne ui atu i konā, ko Simona te Kulene, ne vau mai i te vao, ko te tamana o Alesana mo Lufo, ke amo ne ia te pou fakasaua* o Iesu.+
22 Ne ave ne latou a ia ki te koga e igoa ki Kolokota, ko tena uiga māfai e ‵fuli, ko te “Koga o Gatiulupoko.”+
23 Ne taumafai latou i konā o tuku atu ki a ia te uaina e palu mo te vailakau ko te mulo,+ kae ne seki inu a ia ki ei.
24 Kae ne ‵tuki ne latou a ia ki te pou, kae tufa ne latou ana gatu i te faiga o se vili, ke iloa ei me tefea te vaega e ‵tau o maua ne te tino.+
25 Ko oko nei ki te tolu o itula,* kae ne ‵tuki ne latou a ia ki te pou.
26 Kae ne tusi a te ‵losiga telā ne fakasala i ei a ia: “Te Tupu o tino Iutaia.”+
27 E se gata i ei, ne ‵tuki ne latou ki te pou a tino kai‵soa e tokolua i ana tafa, e tokotasi i tena feitu fakaatamai, kae e tokotasi i tena feitu fakamaui.+
28 * ——
29 Kae ko tino kolā ne faka‵sili atu i konā ne pati ma‵sei ki a ia, lūlū olotou ulu+ kae fai atu: “Aa! Ko koe telā ka ofa ne koe te faletapu kae toe faite i aso e tolu,+
30 fakasao aka la koe kae fanaifo ki lalo mo te pou fakasaua.”*
31 E penā foki a faitaulaga pule mo failautusi, ne fakatauemu atu ki a ia i a latou eiloa kae fai aka: “Ne faka‵sao ne ia a nisi tino kae e se mafai o fakasao ne ia a ia eiloa!+
32 Ke na fanaifo nei a te Keliso, te Tupu o tino Isalaelu mai te pou fakasaua, ko te mea ke lavea kae ke tali‵tonu tatou.”+ Ke oko eiloa ki a lāua kolā ne ‵tuki ki pou i ana tafa ne fakatauemu atu foki ki a ia.+
33 I te okoga ki te ono o itula,* ne pouli te fenua kātoa ke oko eiloa ki te iva o itula.*+
34 Kae i te iva o itula, ne kalaga aka ei a Iesu i se leo maluga, ana muna: “Eli, Eli, lama sapakatani?” ko tena uiga māfai e ‵fuli: “Toku Atua, toku Atua, kaia ko tiaki ei au ne koe?”+
35 Kae i te lagonaga ne nisi tino kolā ne takatu‵tu ‵pili atu, fai aka ei latou penei: “Kiloke! Ko kalaga atu a ia ki a Elia.”
36 Tenā ne tele atu ei se tino, ufi ne ia se omomi ki uaina ‵vi, faka‵piki atu ki te mata o se lakau kae tuku atu ke inu a ia,+ ana muna: “Tuku malie a ia! Ke onoono aka tatou me e mata, e vau a Elia o tuku ifo a ia ki lalo.”
37 Kae ne tagi pakalaga a Iesu, ko te mea eiloa ko mate.*+
38 Kae ne masaelua te ‵pui laugatu i te faletapu,*+ mai luga ki lalo.+
39 I te laveaga ne te ofisa o kautau telā ne tu atu i konā me ne mate a ia mai lalo i fakanofonofoga konei, fai atu ei tou tagata: “E tonu, a te tagata tenei ko te Tama eiloa a te Atua.”+
40 E isi foki ne fāfine ne kilo‵kilo atu ki ei mai i se koga tai ‵mao, ne aofia i a latou konā ko Malia te Makatala e pelā foki mo Malia te mātua o Iakopo Foliki mo Iose, mo Salome,+
41 kolā ne olo tasi sāle mo ia kae tavini atu ki a ia+ i tena nofoga i Kalilaia, mo nisi fāfine e tokouke kolā ne olo fakatasi mo ia ki Ielusalema.
42 Ne oko atu ki te afiafi kae ona ko te Aso Fakatoka, telā ko te aso mai mua o te Sapati,
43 ne vau a Iosefa te Alimataia, se tino fakaaloalogina o te Kaupule, telā e nofo fakatalitali foki ki te Malo o te Atua. Ne loto toa tou tagata ke fanatu ki mua o Pilato kae fakamolemole atu ke tuku mai te foitino o Iesu.+
44 Ne fia iloa ne Pilato me ko Iesu nei ko oti ne mate, telā ne aumai ei ne ia te ofisa o te kautau kae fesili atu me ko Iesu nei ko oti ne mate.
45 I te otiga ne fakamautinoa aka ne ia mai te ofisa o te kautau, talia ei ne ia ke tuku atu te foitino mate ki a Iosefa.
46 I te otiga ne ‵togi ne Iosefa a laugatu lino ‵lei kae tuku ifo a ia ki lalo, ne ‵kofu ne ia te foitino ki laugatu lino ‵lei konā kae fakatakato ne ia i te tanuga+ telā ne tuki ne ia i te kaupapa; kae fakateka atu ne ia se fatu ki te mataloa o te tanuga.+
47 Kae ne kilo‵kilo atu faeloa a Malia te Makatala mo Malia te mātua o Iose ki te koga telā ne fakatakato ei a ia.+
Fakamatalaga mai lalo
^ Io me “Tamate atu a ia i luga i te pou!”
^ Io me “Tamate atu a ia i luga i te pou!”
^ Telā kāti ko te 9:00 i te tafataeao.
^ Telā kāti ko te 12:00 i te tutonu.
^ Telā kāti ko te 3:00 i te fakaafiafi.
^ Io me “‵pusi tena toe mānavaga.”
^ A te ‵pui laugatu tenei e ‵vae i ei te Potu Tafasili i te Tapu mo te Potu Tapu.
