Te Tusi a Maleko 1:1-45

  • Ko talai atu a Ioane te Papatiso (1-8)

  • Papatisoga o Iesu (9-11)

  • Ko tofotofo Iesu ne Satani (12, 13)

  • Ko kamata o talai Iesu i Kalilaia (14, 15)

  • Soko muamua ne filifiligina (16-20)

  • Ko ‵tuli kea‵tea se agaga masei (21-28)

  • Faka‵lei ne Iesu a tino e tokouke i Kapanaumi (29-34)

  • ‵Talo atu i se koga sē logoa (35-39)

  • Ko faka‵lei aka se lepela (40-45)

1  Ko te kamataga o te tala ‵lei e uiga ki a Iesu Keliso, te Tama a te Atua:  E pelā eiloa mo muna ne tusi i te tusi a te pelofeta ko Isaia: “(Kiloke! Ko uga atu ne au taku avefekau ke mua atu i a koe, telā ka fakatoka ne ia tou auala.)+  E isi se leo o se tino e kalaga i te koga lavaki: ‘Fakatoka te auala o Ieova!* Fai ke ‵tonu ana auala.’”+  Ne nofo a Ioane te Papatiso i te koga lavaki, kae talai atu ne ia te papatisoga e pelā me se fakailoga o te salamō mō te fakamagaloga o agasala.+  Kae ne olo atu ki a ia a tino katoa mai i kogā fenua o Iuta mo tino katoa i Ielusalema, kae ne papatiso ne ia latou i te vaitafe ko te Iolitana, kae ne fakaasi ‵tonu atu ne latou olotou agasala.+  Ne pei a Ioane ki gatu ne faite ki fulufulu o kamela kae ne ‵sai tena taugasulu ki se fusi ne faite ki pa‵kili o manu,+ kae ne kai a ia ki seakelise mo hani.+  Ne talai atu a ia, ana muna: “E isi se tino telā e malosi atu i a au ka vau i oku tua, e se ‵tau mo au o punou ki lalo o ‵tala a fusi o ana taka.+  E papatiso ne au koutou ki te vai, kae ka papatiso ne ia koutou ki te agaga tapu.”+  Ko aso eiloa konā ne vau ei a Iesu mai Nasaleta i Kalilaia kae ne papatiso a ia ne Ioane i te Iolitana.+ 10  Kae i tena fanakaga eiloa mai te vai, ne lavea ne ia te lagi ko matala mo te agaga tapu ko fanaifo ki luga i a ia, e pelā me se lupe.+ 11  Kae ne lagona atu se leo mai te lagi e fai mai penei: “A koe ko taku Tama, ko taku fagasele; ko oti ne talia ne au a koe.”+ 12  Kae ne ave fakavave a ia ne te agaga tapu ki te koga lavaki. 13  Ne nofo a ia i te koga lavaki i aso e 40, kae ne tofotofo a ia ne Satani.+ E isi foki ne manu fe‵kai i konā, kae ne tavini atu a agelu ki a Iesu.+ 14  I te otiga ne puke fakapagota a Ioane, fano ei a Iesu ki Kalilaia+ o talai te tala ‵lei a te Atua i ei+ 15  kae fai atu: “Ko oti ne fakataunu te taimi telā ne fakatoka, kae ko pili mai te Malo o te Atua. Sala‵mo,+ kae fakatuanaki ki te tala ‵lei.” 16  I tena sasalega i tafa o te Vai o Kalilaia, ne lavea ne ia a Simona mo te taina o Simona ko Anitelea+ e ‵pei ifo te lā tili ki te vai,+ me i a lāua ne tino faiika.+ 17  Ne fai atu a Iesu ki a lāua: “Tau‵tali mai i a au, kae ka fai ne au koulua ke fai mo tino faiika ki tino.”+ 18  I konā loa, ne tiaki fakavave ne lāua a lā tili kae tau‵tali atu i a ia.+ 19  Ne momea atu tou tagata ki mua, lavea ei ne ia a Iakopo te tama a Sepetaio mo tena taina ko Ioane, e ponopono te lā tili i loto i te lotou pōti,+ 20  ne kalaga fakavave atu a ia ki a lāua. Ne tiakina ne lāua te lā tamana ko Sepetaio mo tino ga‵lue i te pōti kae tau‵tali atu i a ia. 21  Ne olo atu latou ki Kapanaumi. I te okoga eiloa ki te Sapati ne ulu atu ei a ia ki loto i te sunako kae kamata o akoako i ei.+ 22  Kae ne ofo latou i te auala ne fai ei ana akoakoga, me ne akoako atu ne ia latou e pelā me se tino e isi sena malosi pule, kae e se pelā mo failautusi.+ 23  Ne nofo foki i te sunako i te taimi tenā se tagata e pukea ne se agaga masei, kae pakalaga atu: 24  “Ne a omotou mea ne fai atu ki a koe, e Iesu, te Nasaleta?+ E a, a koe ne vau o fakaseai matou? E iloa ‵lei ne au a koe, ko te Tino Tapu a te Atua!”+ 25  Kae ne ‵liko atu a Iesu, ana muna: “Filemu, kae fano nei ki tua mai i a ia!” 26  Kae i te otiga ne fai ne te agaga masei ke pole malosi te tagata tenā kae pakalaga loa ki luga, fano ei ki tua mai i a ia. 27  Ne ofo malosi a tino katoa i konā kae kamata o fakatau fai‵pati i a latou eiloa, olotou muna: “Se a te mea tenei? Se akoakoga fou eiloa! E nofo foki tou tagata mo te ‵mana ke ‵tuli ne ia a agaga ma‵sei, kae e faka‵logo foki a latou ki a ia.” 28  Ne salalau fakavave atu a te tala tenā e uiga ki a ia ki kogā koga katoa o Kalilaia. 29  Ne tiaki ne latou a te sunako kae olo atu ki te fale o Simona mo Anitelea fakatasi mo Iakopo mo Ioane.+ 30  Ne takato i konā te mātua o te avaga a Simona+ me e poko ne te fiva, kae ne fakailoa fakavave atu ne latou ki a ia e uiga ki tou fafine. 31  Ne fanatu a Iesu ki tou fafine, puke ki tena lima kae fakatu aka ki luga. Ne ‵lei tena fiva kae ne kamata a ia o tavini atu ki a latou. 32  Mai tua o te tōga o te la i te afiafi, ne kamata o avatu ne tino ki a ia a latou katoa kolā ne ma‵saki kae pukea ne temoni;+ 33  kae ne mumu atu a tino katoa o te fakai ki te mataloa o te fale tenā. 34  Tenā ne faka‵lei ei ne ia a tino e tokouke kolā ne pokotia i masaki kese‵kese,+ ne ‵tuli ne ia a temoni e uke, kae ne seki talia ne ia a temoni ke fai‵pati, me ne iloa ne latou i a ia ko te Keliso.* 35  I te tafataeao ‵malu kae koi pouli, ne tu aka tou tagata, fano ki tua kae fanatu ki se koga sē logoa kae ne kamata a ia o ‵talo i ei.+ 36  Kae ne ‵sala atu ki a ia a Simona mo nisi tino kolā ne ‵nofo mo ia 37  kae ne maua ne latou a ia, fai atu ei ki a ia: “A tino katoa e ‵sala ki a koe.” 38  Kae ne fai atu a ia ki a latou: “‵Tou olo ki se isi koga, ki fakai kolā e ‵pili mai, ko te mea ke talai foki au i ei, me e tenā te pogai ne vau ei au.”+ 39  Kae ne fanatu a ia o talai i loto i olotou sunako i Kalilaia kātoa kae afuli foki kea‵tea a temoni.+ 40  Ne fanatu eiloa ki a ia se tino lepela i konā, totuli ifo kae tagi atu ki a ia, ana muna: “Kafai e manako koe ki ei, e mafai o fai ne koe au ke ‵ma.”+ 41  Ne ‵fonu te loto o Iesu i te alofa ki a ia. Ne ‵kapa atu tena lima, fakapatele atu ki a ia kae fai atu: “Au e manako ki ei! Ke ‵ma koe.”+ 42  I konā loa, ‵lei ei tena lepela kae ne ‵ma foki tou tagata. 43  Tenā ne tuku atu ei ne ia ne fakatonuga ‵mafa ki a ia kae uga fakavave ne ia ke fano, 44  ana muna ki a ia: “Ke mo a ma fai ne koe ki se tino se pati e tasi, kae fano o fakaasi atu a koe ki te faitaulaga, kae ofo atu a mea kolā ne fakatonu mai ne Mose mō tou faka‵māga,+ ko te mea ke fai mo fai se molimau ki a latou.”+ 45  Kae i te fanoga kea‵tea, ne fakasalalau valevale atu ne te tagata tenā a te tala tenei i koga katoa, ko se mafai ei ne Iesu o fakasaesae atu ki loto i se fakai, kae ko nofo fua i koga kolā e se tokouke a tino i ei. E tiga te feitu tenā, ne olo atu faeloa ki a ia a tino mai koga katoa.+

Fakamatalaga mai lalo

Onoono ki te MF A5.
Io me kāti, “ne iloa ne latou me ko oi a ia.”