Luta 3:1-18

  • Ko fakatonu ne Naomi a Luta (1-4)

  • Ko Luta mo Poasa i te koga tuki kalite (5-15)

  • Ko foki atu a Luta ki a Naomi (16-18)

3  I konā loa ne fai atu a Naomi te mātua o tena avaga ki a ia: “Taku tama, e a, e se ‵tau o ‵sala ne au se fale* mō koe+ ko te mea ke ‵lei ei koe?  E a, e se ko Poasa telā e kāiga tatou?+ Ne ga‵lue fakatasi eiloa koe mo ana tamafine. I te po nei ka faka‵ma a kalite a ia i te koga tuki kalite.  Tela la, na koukou kae ‵mili ki se sinu manogi gali; ko fai ei ou gatu kae fano ki te koga tuki kalite. Sa fai ke lavea koe ne tou tagata ke oko ki te taimi ko oti ei a ia ne kai kae inu.  Kafai ko takato a ia ki lalo, onoono ki te koga e takato ei a ia; tenā ko fano ei koe o ‵suke te mea e pulou ei ana vae ko takato ei koe ki lalo. Ka fai atu ne ia a te mea e ‵tau o fai ne koe.”  Kae ne tali atu a Luta: “Ka fai eiloa ne au a mea katoa konā ne fai mai ne koe.”  Tenā ne fano ei a ia ki te koga tuki kalite kae fai ne ia a mea katoa kolā ne fakatonu atu ne te mātua o tena avaga ke fai ne ia.  I te taimi tenā, a Poasa ne kai kae inu kae ne fiafia tena loto. Oti aka, fano ei a ia ki tafa o te fakaputuga kalite o takato i ei. Mai tua ifo, ne tolotolo malie atu tou fafine o ‵suke te mea e pulou ei ana vae kae takato ki lalo.  I te valuapo ne kamata o polepole tou tagata, kae nofotu aka, lavea ei ne ia se fafine e takato i lalo i ana vae.  Ne fai atu tou tagata: “Ko oi koe?” Kae ne tali atu tou fafine: “Au ko Luta, tau tavini. Pulou mai tou gatu ki luga i tau tavini, me i a koe se tino e tokotasi o tino kolā e ‵tau o toe ‵togi ne koe māua.”+ 10  Tenā ne fai atu ei a ia: “Ke fakamanuia koe ne Ieova, e taku tama. Ko sili atu te alofa fakamaoni ne fakaasi mai ne koe i te taimi fakamuli tenei i lō te taimi muamua,+ me i a koe ne seki fano o ‵sala ki tamataene, faitalia me ma‵tiva io me mau‵mea latou. 11  Kae nei la, e taku tama, sa mataku. Ka fai ne au mō koe a mea katoa e fai mai koe ki ei,+ me ko iloa ne tino katoa i te fakai i a koe se fafine ‵lei ‵ki eiloa. 12  Se mea tonu me i a au se tino e tokotasi telā e mafai o toe ‵togi ne au koulua,+ kae e isi se tino telā e ‵tau o toe ‵togi ne ia koulua me kāiga pili atu i lō au.+ 13  Nofo i konei i te po nei, kae kafai e toe ‵togi ne ia koe i te taeao, ko ‵lei la! Ko tuku ke toe ‵togi ne ia koe.*+ Kae kafai e se manako tou tagata ke toe ‵togi ne ia koe,* au e tauto i te igoa o Ieova te Atua ola me ka toe ‵togi eiloa ne au a koe.* Takato i konei ke oko ki te tafataeao.” 14  Tenā ne takato ei tou fafine i lalo i ana vae ke oko eiloa ki te tafataeao kae ne tu aka ki luga kae koi tuai o maina ke se lavea a ia ne se tino. Ne fai atu tou tagata: “Sa fai ke iloa ne se tino me isi se fafine ne vau ki te koga tuki kalite.” 15  Ne fai atu foki tou tagata: “Aumai te gatu tenā e pulupulu ei koe kae ‵fola aka.” Tenā ne ‵fola ei ne ia, kae ne tuku ne tou tagata ki ei e ono sea* o kalite kae tuku atu ki tou fafine, oti aka fano ei tou tagata ki te fakai. 16  Ne fano tou fafine ki te mātua o tena avaga telā ne fai atu ki a ia: “Taku tama, e a tau fanoga?”* Ne fakamatala atu ne tou fafine a pati katoa a tou tagata ki a ia. 17  Ne toe fai atu tou fafine: “Ne tuku mai ne ia e ono sea kalite konei ki a au kae fai mai, ‘Sa fano e aunoa mo ne mea i ou lima ki te mātua o tau avaga.’” 18  Kae ne fai atu a Naomi: “Sagasaga i konei e taku tama, ke oko ki te taimi ko logo ei koe i te ikuga o te mea tenā, me ka se mānava eiloa tou tagata i te aso nei ke oko eiloa ki te taimi ko toka ei te mea tenā.”

Fakamatalaga mai lalo

Epelu, “koga malōlō.”
Io me “fai tena tiute ki a koe.”
Io me “fai tena tiute ki a koe.”
Io me “fai ne au toku tiute ki a koe.”
Kāti e 44 L. Onoono ki te MF E14.
Epelu, “Ko oi koe?”