Luta 2:1-23

  • Ko taetae ne Luta a fuaga i te fatoaga a Poasa (1-3)

  • Ko fetaui a Luta mo Poasa (4-16)

  • Ko fakamatala ne Luta ki a Naomi a te atafai o Poasa (17-23)

2  E isi se kāiga o Naomi i te feitu o tena avaga telā e maumea ‵ki; a tena igoa ko Poasa,+ kae ko ia se tino mai te kāiga o Elimeleka.  Ne fai atu a Luta, te fafine Moapi ki a Naomi: “Fakamolemole, tuku mai au ke fano ki fatoaga o taetae+ a fuaga i tua o so se tino telā e alofa mai ki a au.” Tenā ne fai atu ei a Naomi ki tou fafine: “Fano la, e taku tama.”  I konā ne fano ei tou fafine kae kamata o taetae a fuaga i te fatoaga mai tua o tino ga‵lue. E se iloa eiloa ne tou fafine me ne fanatu a ia ki te laukele o Poasa,+ telā e kāiga mo Elimeleka.+  I te taimi tenā ne oko mai a Poasa mai Peteleema kae fai atu ki ana tino ga‵lue: “Ke fakatasi atu a Ieova ki a koutou.” Kae ne tali atu latou: “Ke fakamanuia koe ne Ieova.”  Tenā ne fesili atu ei a Poasa ki te tamataene pule o tino ga‵lue: “Ko te kāiga fea ne vau ei te tamafine tenei?”  Ne tali atu a te tamataene pule o tino ga‵lue: “A te tamafine tenā se fafine Moapi+ telā ne ‵foki fakatasi mai mo Naomi mai i laukele o Moapi.+  Ne fesili mai tou fafine, ‘Fakamolemole e mafai ke taetae+ kae fakaputu ne au a fuaga* kolā ne tiaki ne tino ga‵lue?’ Kae ne galue eiloa a ia talu mai tena okomaiga i te taeao nei ke oko mai ki te taimi nei kae fatoa sagasaga ifo tou fafine o mānava malie i te fale fakamalumalu.”  Tenā ne fai atu ei a Poasa ki a Luta: “Fakalogo mai, e taku tama. Sa fano o taetae a fuaga i nisi fatoaga, kae sa fano foki ki se isi koga; fakapilipili mai ki tafa o aku tamafine konei.+  Kilokilo ki te koga e ga‵lue ei latou, kae olo fakatasi mo latou. Ko oti ne fakatonu ne au a tamataene ke mo a eiloa ma fakalavelave* atu ki a koe. Kafai koe e fiainu, fano o inu i tiā vai kolā ko oti ne asu mai ne tamataene.” 10  I konā ne totuli ifo a tou fafine mo ana mata e ‵fuli ki lalo kae ifo ki lalo i te laukele kae fai atu ki tou tagata: “Ne mafai pefea o alofa mai koe ki a au, kae kaia ne saga mai ei koe ki a au, i a au se tino fakaa‵tea?”+ 11  Ne tali atu a Poasa ki a ia: “Ko oti ne logo au i se lipoti e uiga ki au mea katoa ne fai ki te mātua o tau avaga mai tua o te matega o tau avaga mo te auala ne tiakina ei ne koe tou tamana mo tou mātua mo te fenua o ou kāiga ke fanatu koe ki tino kolā e seki iloa muamua ne koe.+ 12  Ke taui atu ne Ieova ki a koe e ‵tusa mo au mea ne fai,+ kae ke isi foki se ‵togi ‵lei* mō koe mai i a Ieova te Atua o Isalaelu, telā ne vau koe o fakamalu mai lalo i ana kapakau.”+ 13  Ne fai atu tou fafine: “Ke alofa mai eiloa koe ki a au, e toku aliki, me ko oti ne fakamafanafana ne koe au kae faipati mai mo te mautinoa ki* tau tavini, faitalia me i a au e sē se tokotasi o au tavini.” 14  Ne fai atu a Poasa ki tou fafine i te taimi ne ‵kai ei latou: “Vau o kai aka ki ne mu falaoa, kae ufi tau falaoa ki te vinika.” Tenā ne sagasaga ifo ei a ia i tafa o tino ga‵lue. Ne avatu ne tou tagata ki a ia a fuaga ne tao, ne kai tou fafine ki ei kae ne makona ei a ia, kae isi foki ne ana mea ne ‵toe. 15  I te taimi ne tu aka ei tou fafine o taetae+ a fuaga, ne fakatonu atu a Poasa ki ana tamataene: “Tuku eiloa a ia ke taetae a fuaga ke oko foki ki fuaga* kolā ko oti ne ‵kati, kae ke mo a eiloa ma sonafai ne koutou a ia.+ 16  E ‵tau foki o tapale ne koutou ne kau kalite mai otou saitaga kae tiaki ke taetae ne ia, kae ke mo a eiloa ma fai ne otou pati ke taofi aka ei a ia.” 17  Tenā ne taetae ei ana fuaga i te fatoaga ke oko eiloa ki te afiafi.+ I te taimi ne tuki ei ne ia ana mea ne taetae, ne maua ne ia se efa* o kalite. 18  Tenā ne puke ei ana mea kae fanatu ki te fakai, kae ne lavea ne te mātua o tena avaga ana mea ne taetae. Ne tapale aka foki ne Luta ana meakai kolā ne ‵toe+ mai i mea kolā ne kai ne ia kae tuku atu ki tou fafine. 19  Ne fai atu te mātua o tena avaga ki a ia: “Ne taetae i fea au fuaga i te aso nei? Koe ne galue i fea? Ke manuia eiloa te tino telā ne saga atu ki a koe.”+ Tenā ne fakamatala atu ei ne ia ki te mātua o tena avaga e uiga ki te tino ne galue a ia i ei, penei: “A te igoa o te tagata ne galue au i ei i te aso nei ko Poasa.” 20  I konā eiloa ne fai atu a Naomi ki te avaga a tena tamaliki tagata: “Ke fakamanuia a ia ne Ieova, telā e seki fakatamala eiloa o fakaasi mai tena alofa fakamaoni ki tino ola mo tino ‵mate.”+ Ne toe fai atu a Naomi: “A te tagata tenā e kāiga tatou.+ A ia se tino e tokotasi o tino kolā e ‵tau o toe ‵togi* ne ia tāua.”+ 21  Tenā ne fai atu ei a Luta te fafine Moapi: “Ne fai mai foki tou tagata ki a au, ‘Fakapilipili atu ki tafa o aku tino ga‵lue ke oko ki te taimi ko palele ei te ‵katiga o te taukai.’”+ 22  Ne fai atu a Naomi ki a Luta te avaga a tena tamaliki tagata: “Taku tama, e ‵lei atu ke olo fakatasi koe mo ana tamafine i lō te fai fakamasei o koe i te suā fatoaga.” 23  Tenā ne fakapilipili atu faeloa tou fafine ki tamafine a Poasa kae taetae a fuaga ke oko ki te taimi ko palele atu ei te ‵katiga o te taukai kalite+ mo te taukai saito. Kae ne ‵nofo faeloa a ia mo te mātua o tena avaga.+

Fakamatalaga mai lalo

Io me kāti, “ko fusiga.”
Epelu, “patele.”
Io me “se taui katoatoa.”
Epelu, “faipati ki te loto o.”
Io me kāti, “ko fusiga.”
Kāti se 22 L. Onoono ki te MF E14.
Io me “se kāiga o tāua telā e mafai o toe ‵togi (fakasaoloto) tāua.”