Luta 1:1-22

  • Ko olo te kāiga o Elimeleka ki Moapi (1, 2)

  • Ko ‵mate a avaga a Naomi, Olepa mo Luta (3-6)

  • Ko fakamaoni a Luta ki a Naomi mo tena Atua (7-17)

  • Ko foki a Naomi ki Peteleema fakatasi mo Luta (18-22)

1  I aso ne fai ei ne famasino+ a ikuga o fakamasinoga,* ne poko se oge i te fenua; kae ne fanatu se tagata mai Peteleema+ i Iuta o nofo e pelā me se tino fakaa‵tea i laukele o Moapi,+ ko ia fakatasi mo tena avaga mo ana tama‵liki tāgata e tokolua.  A te igoa o te tagata tenā ko Elimeleka,* a te igoa o tena avaga ko Naomi,* kae ko igoa o ana tama‵liki tāgata e tokolua ko Malona* mo Kiliona.* A latou ne tino Efalata mai Peteleema i Iuta. Kae ne olo atu latou ki laukele o Moapi kae ‵nofo i ei.  Fakamuli ifo, ne mate a Elimeleka te avaga a Naomi, kae ‵toe mai ei tou fafine mo ana tama‵liki tāgata e tokolua.  Mai tua ifo, ne a‵vaga a tāgata konei ki fāfine Moapi; e tokotasi e igoa ki a Olepa, kae ko te suā tino e igoa ki a Luta.+ Ne ‵nofo latou i konā kāti i tausaga e sefulu.  Tenā ne ‵mate foki ei a tama‵liki tāgata e tokolua, ko Malona mo Kiliona, kae ‵toe mai i ei ko tou fafine, ko seai ne ana tama‵liki kae seai foki sena avaga.  Tenā ne kamata ei a ia o ‵foki mo avaga a ana tama mai i laukele o Moapi, me ne logo tou fafine i Moapi i a Ieova ko saga atu ki ana tino mai te tukuatuga o meakai* ki a latou.  Ne tiaki ne tou fafine a te koga telā ne nofo a ia i ei fakatasi mo avaga a ana tama. I te taimi ne sa‵sale atu ei latou i te auala o ‵foki ki te fenua o Iuta,  ne fai atu Naomi ki avaga a ana tama: “Olo, toe ‵foki nei koulua ki fale o oulua mātua. Ke fakaasi atu ne Ieova te alofa fakamaoni ki a koulua,+ e pelā eiloa mo te fakaasiga ne koulua te alofa fakamaoni ki tāgata kolā ko oti ne ‵mate e penei foki mo au.  Ke tuku atu* ne Ieova ki a koulua taki tokotasi te saogalemu* i fale o avaga a koulua.”+ Tenā ne uma atu ei tou fafine ki a lāua, kae ne ‵tagi eiloa lāua ki luga. 10  Ne fai atu faeloa lāua ki tou fafine: “Ikai, a māua e olo eiloa mo koe ki ou tino.” 11  Kae ne fai atu Naomi: “Toe ‵foki, e aku tama. Kaia e ‵tau ei o ‵mai koulua i a au? E mata, koi mafai o toe fanau ne au ne tama‵liki tāgata ke a‵vaga mo koulua?+ 12  Toe ‵foki, e aku tama. Olo me i a au ko tō matua ke toe avaga. Kafai e manako au ke maua saku avaga i te po nei kae mafai foki o fanau ne au ne tama‵liki tāgata, 13  e a, ka faka‵tali eiloa koulua ke ma‵tua lāua? E a, ka se a‵vaga eiloa koulua ona ko lāua? Ikai, e aku tama, ko oko eiloa i toku alofa i a koulua, me i te lima o Ieova ko oko mai o fakasala au.”+ 14  I konā ne toe ‵tagi eiloa lāua ki luga, oti aka ne uma atu a Olepa ki te mātua o tena avaga ko te mea eiloa ko fano. Kae ko Luta ne ‵piki eiloa ki a ia. 15  Tenā ne fai atu ei Naomi ki tou fafine: “Kiloke! A te avaga a taku suā tama ko toe foki ki ana tino mo ana atua. ‵Foki fakatasi mo ia.” 16  Kae ne fai atu a Luta: “Sa finau mai ke tiakina ne au koe, ke foki au kae se fanatu i a koe; me ko so se koga e fano koe ki ei e fano foki au ki ei, kae ko so se koga e moe koe i ei i te po e moe foki au i ei. Ou tino ka fai mo oku tino, kae ko tou Atua ko toku Atua.+ 17  So se koga e mate i ei koe e mate foki au i ei, kae ka tanu foki au i ei. Ke fakasala faeloa au ne Ieova māfai e tiakina ne au koe, seiloga ke ‵vae tāua ne te mate.” 18  I te taimi ne iloa ei ne Naomi me e manako eiloa a Luta ke olo tasi lāua, ne seki toe faipati eiloa tou fafine. 19  Kae ne olo eiloa lāua i te lā auala ke oko atu ki Peteleema.+ I te taimi eiloa ne oko atu ei lāua ki Peteleema, ne logoa a te fakai kātoa ona ko lāua, kae ne fai aka a fāfine: “Ko Naomi tenei?” 20  Kae ne fai atu a ia ki fāfine konā: “Sa taku ne koutou au ko Naomi.* Kae taku mai au ki a Mala,* me i te Atua Malosi Katoatoa ko oti ne fai ne ia te olaga ke logo‵mae malosi au i ei.+ 21  Ne kātoa ‵lei aku mea i taku fanoga, kae ne fai ne Ieova ke foki mai au e aunoa mo se mea. Kaia e taku ei ne koutou au ko Naomi, me ko Ieova eiloa ne ‵teke mai ki a au kae ko te Atua Malosi Katoatoa ne fai ne ia au ke puapuaga?”+ 22  Tenei te auala ne foki mai ei Naomi mai i laukele o Moapi,+ fakatasi mo Luta te fafine Moapi telā ko te avaga a tena tamaliki tagata. Ne oko atu lāua ki Peteleema i te kamataga o te ‵katiga o kalite.+

Fakamatalaga mai lalo

Epelu, “fakamasinoga.”
Tena uiga “A toku Atua ko te Tupu.”
Tena uiga “Taku Fagasele.”
Kāti ne maua mai i se pati Epelu telā e fakauiga ki te “fano o vāivāi; fakamasakisaki.”
Tena uiga “Se Tino Vāivāi; Se Tino ko Pili o Galo Atu.”
Epelu, “falaoa.”
Io me “fai se meaalofa.”
Epelu, “se koga malōlō.”
Tena uiga “Taku Fagasele.”
Tena uiga “‵Kona.”