Te Tusi a Luka 8:1-56

  • Fāfine kolā ne olo fakatasi mo Iesu (1-3)

  • Tala fakatusa e uiga ki te tino ‵toki lakau (4-8)

  • Pogai ne fakaaoga ei ne Iesu a tala fakatusa (9, 10)

  • Te uiga o te tala fakatusa ki te tino ‵toki lakau (11-15)

  • E se ‵tau o pulou a te moli (16-18)

  • Te mātua o Iesu mo ana taina (19-21)

  • Fakafilemu ne Iesu se matagi malosi (22-25)

  • Ko uga atu ne Iesu a temoni ki loto i puaka (26-39)

  • Te tama fafine a Iailo, se fafine ne patele atu ki te gatu o Iesu (40-56)

8  Mai tua malie ifo i ei, ne faimalaga atu a Iesu mai fakai ‵lasi ki nisi fakai ‵lasi, e pelā foki mo fakai fo‵liki ki nisi fakai fo‵liki, o talai kae folafola atu te tala ‵lei e uiga ki te Malo o te Atua.+ Kae ne fakatasi atu foki te toko Sefululua ki a ia,  mo nisi fāfine kolā ko oti ne fakasaoloto mai i agaga ma‵sei kae faka‵lei aka foki olotou masaki kese‵kese. Ne aofia i ei ko Malia telā e fakaigoa ki te Makatala, telā ne o‵mai ki tua mai i a ia a temoni e toko fitu;  Ioana+ te avaga a Kusa, te tino pule a Helota; Susana; mo nisi fāfine e tokouke kolā ne fakaaoga olotou kope totino ke tavini atu ki a latou.+  I te maopoopomaiga o se vaitino fakatasi mo tino kolā ne olo atu ki a ia mai i fakai takitasi, ne faipati atu ei a ia i te faiga o se tala fakatusa:+  “E isi se tino ‵toki lakau ne fano o ‵toki ana fuaga. I te taimi ne ‵toki ei ana fuaga, ne ‵to atu a nisi fuaga i tafa o te auala kae ne lakalaka ne tino, kai ei ne manu eva o te lagi.+  Kae ko nisi fuaga ne ‵to ki te koga fatufatua, kae i te lotou olaakaga, mage‵mage ei ona ko te seai o ne vai.+  Ne ‵to atu a nisi fuaga i va o lakau tala‵tala kae i te olaakaga o lakau tala‵tala ne ola sai‵tia ei a fuaga konā.+  Kae ko nisi fuaga ne ‵to ki luga i te laukele ola ‵lei, kae i te lotou olaakaga, ne ‵fua mai ei i taki 100.”+ I te faiatuga ne ia a pati konei, kalaga atu ei a ia: “A te tino telā e isi ne ana taliga, ke na fakalogo la ki ei.”+  Kae ne fesili atu ana soko ki a ia me se a te uiga o te tala fakatusa tenei.+ 10  Ana muna: “Ko oti ne talia koutou ke malama‵lama i mea ‵funa kae tapu o te Malo o te Atua. Kae e faipati au ki nisi tino e auala i tala fakatusa,+ me e tiga eiloa e ‵kilo atu ki ei kae e se lavea ne latou, e tiga eiloa e lagona ne latou kae e se iloa ne latou tena uiga tonu.+ 11  Tenei la te uiga o te tala fakatusa tenā: A te fuaga ko te muna a te Atua.+ 12  A fuaga i tafa o te auala ko latou kolā ko oti ne lagona ne latou te muna a te Atua, kae ne fanatu te Tiapolo, ave ei ne ia kea‵tea te muna mai i olotou loto ko te mea ke se tali‵tonu latou kae ke se ‵sao foki.+ 13  A fuaga i te koga fatufatua ko latou kolā ne lagona ne latou te muna kae talia ne latou mo te fia‵fia, kae e seai ne olotou aka. Ne tali‵tonu latou i se vaitaimi toetoe, kae i te taimi e tofotofo ei, ‵to atu ei latou kea‵tea.+ 14  Kae ko fuaga kolā ne ‵to atu i va o lakau tala‵tala, konei a tino ne lagona ne latou, kae ona ko te ‵saga atu ki mea e manava‵se ki ei, koloa+ mo fakafiafiaga o te olaga tenei,+ ko ola sai‵tia ei latou kae e seai ne fuaga ‵lei e ‵fua mai i a latou.+ 15  Kae ko fuaga i te laukele ola ‵lei, konei la a tino kolā ne lagona ne latou te muna mo te loto ‵lei,+ ne puke ‵mau ki ei kae ‵fua mai i ei a fuataga i te kufaki.+ 16  “E seai se tino e faka‵ka ne ia se moli kae pulou atu ki se pōla io me e tuku mai lalo o se moega. E tuku ne ia ki luga i te tugamoli ko te mea ke lavea ne tino kolā e ulu mai ki loto a te mainaga.+ 17  Me e seai se mea ‵funa ka se fakaasi. E seai foki se mea e ufi faka‵lei ke galo ka se mafai o iloa kae e se tuku faka‵sau mai ki tua.+ 18  Tela la, ‵saga tonu ki te auala e fakalogo‵logo ei koutou. Me ko so se tino e isi ne ana mea ka toe tuku atu ki ei a mea e uke atu,+ kae ko so se tino e seai ne ana mea, ke oko foki ki mea kolā e mafaufau a ia me i a ia, ka tapale kea‵tea mai i a ia a mea konā.”+ 19  Ne olo atu ki a ia tena mātua mo ana taina,+ kae ne seki mafai ne latou o fakapili‵pili atu ki a ia ona ko te vaitino.+ 20  Kae ne fakailoa atu penei ki a ia: “A tou mātua mo ou taina kolā e ‵tu i tua kae e fia fai‵pati ki a koe.” 21  Ne tali atu a ia ki a latou: “A toku mātua mo oku taina ko latou konei e lagona ne latou te muna a te Atua kae e fai ne latou.”+ 22  I te aso e tasi, ne ‵sopo a ia mo ana soko ki te pōti, kae fai atu a ia ki a latou: “‵Tou olo ki te suā feitu o te namo.” Tenā ne olo ei latou.+ 23  Ka koi tele atu te lotou pōti kae tō tena moe. Ne poko te kaumatagi kae ne kamata o ‵fonu te lotou pōti i te vai. Ne oko atu foki i ei ki se tulaga fakamataku.+ 24  Tenā ne olo atu ei latou o ‵fagu a ia, olotou muna: “Te Faiakoga, te Faiakoga, a tatou ko pili o ‵mate!” I konā ne tu aka ei a ia kae ‵liko atu ki te matagi mo te sou o te namo, ma‵lū ei a mea katoa kae filemu.+ 25  Fai atu ei a ia ki a latou: “Tefea te otou fakatuanaki?” Ne ma‵taku kae ofo latou, fai aka ei olotou pati i a latou eiloa: “Ko oi la te tino tenei? Me e fakatonu foki ne ia te matagi mo te tai, kae ne faka‵logo ki a ia.”+ 26  Ne oko atu latou ki uta i te kogā koga o tino Kelasa,+ i te suā feitu o Kalilaia. 27  I te fanakaga a Iesu ki uta, fetaui ei a ia mo se tagata mai te fakai e pukea ne temoni. Ne seki pei eiloa a ia ki gatu i se taimi leva ‵ki, kae ne seki nofo eiloa a ia i se fale, kae nofo fua i tanuga.+ 28  I te laveaga ne ia a Iesu, ne kalaga tou tagata kae fakasiga ifo i ana mua, kae fai atu i se leo lasi penei: “Ne a aku mea ne fai ki a koe, e Iesu, te Tama a te Atua Tafasili i te Maluga? Au e fakamolemole atu ke se fakapuapuaga ne koe au.”+ 29  (Me ne fakatonu atu faeloa a Iesu ki te agaga masei ke vau ki tua mo te tagata. Ne ulufia a ia ne te temoni i taimi e uke,+ kae ne ‵sai faeloa ki seni mo pikifao kae leoleo foki ne tino, kae ne ‵motu ne ia a seni kae ave ne te temoni ki koga sē logoa.) 30  Ne fesili atu a Iesu ki a ia: “Ko oi tou igoa?” Ana muna: “Ko Lekeono,” me e tokouke a temoni ne ulu atu ki loto i a ia. 31  Kae ne fakamolemole atu faeloa latou ke se afuli latou ki te lua ‵poko.+ 32  E isi se lafu puaka+ e kai‵kai i luga i te mauga, ne fakamolemole atu ei latou ki a ia ke uga atu latou ki loto i puaka konā, kae ne talia ne ia.+ 33  I konā loa, ne olo ei ki tua a temoni mai te tagata tenā kae ulu atu ki loto i puaka, kae ne ‵tele fakavave atu te lafu puaka ki te kaugutu o te mauga, ‵to ki lalo i te namo, ma‵lemu atu i ei. 34  I te laveaga ne tino fagai puaka a te mea tenā, ne ‵tele atu ei latou o fakailoa ki te fakai mo koga i ana tafatafa. 35  Tenā ne olo ei a tino o onoono ki te mea ne tupu. Ne olo atu latou ki a Iesu kae maua ne latou te tagata telā ne olo ki tua a temoni mai i ei, ko isi ne ana gatu kae ko ‵lei foki tena mafaufau, e sagasaga i lalo i vae o Iesu, kae ne ma‵taku ei latou. 36  A tino kolā ne lavea ne latou te mea tenā ne fakamatala atu ne latou ki tino a te auala ne faka‵lei aka ei te tagata telā ne pukea ne temoni. 37  Tenā ne fakamolemole atu ei te vaitino mai kogā koga i tafa o tino Kelasa ki a Iesu ke fano kea‵tea mai i a latou, me ne ma‵taku malosi latou i ei. Tenā ne sopo ei a Iesu ki te pōti o fano kea‵tea. 38  Ne fakamolemole atu faeloa te tagata telā ne olo kea‵tea a temoni mai i ei ke tautali atu a ia i a Iesu, kae ne seki talia ne ia, ana muna:+ 39  “Toe foki ki tou fale, kae tumau i te fakaasi atu a mea kolā ne fai ne te Atua mō koe.” Ne fano ei tou tagata kae folafola atu i te fakai kātoa a mea kolā ne fai ne Iesu mō ia. 40  I te fokiatuga a Iesu, ne fakafetaui atu te vaitino ki a ia mo te fia‵fia, me ne fakatali‵tali a latou katoa ki a ia.+ 41  Kae kiloke! ne fanatu se tagata e igoa ki a Iailo; a te tagata tenei ko te ofisa tausi o te sunako. Ne fakasiga ifo a ia ki vae o Iesu kae fakamolemole atu ki a ia ke fanatu ki tena fale,+ 42  me i tena tama fafine eiloa e tokotasi telā kāti ko 12 ana tausaga ko pili o mate. I te auala o Iesu o fano, ne mumu atu te vaitino ki a ia. 43  E isi se fafine i konā ne ‵tafe tena sua+ i tausaga e 12, kae e seai eiloa se faka‵leiga ne maua ne ia mai se tino.+ 44  Ne fanatu tou fafine i ana tua kae fakapatele atu ki te fele o te gatu+ o Iesu, kae ne gata fakavave ei te ‵tafe o tena sua. 45  Fai atu ei a Iesu: “Ko oi ne patele mai ki a au?” Ne faka‵fiti a latou katoa, fai atu ei a Petelu: “Te Faiakoga, a te vaitino konā eiloa e mumu atu i ou tafa kae e fakatauteke atu i ou tua.”+ 46  Kae ne fai atu a Iesu: “E isi se tino ne patele mai ki a au me ne iloa ne au te fanoga o te ‵mana+ kea‵tea mai i a au.” 47  I te iloaga ne tou fafine i a ia ko se mafai o ‵muni, ne fanatu ei a ia mo te polepole, fakasiga ifo i ana mua kae fakaasi atu i mua o tino katoa te pogai ne fakapatele atu ei a ia ki a Iesu, mo te auala ne ‵lei fakavave ei tena masaki. 48  Kae ne fai atu a ia ki tou fafine: “Taku tama, ko tou fakatuanaki ne ‵lei ei koe. Fano mo te filemu.”+ 49  Kae koi faipati a ia kae oko atu se sui o te ofisa tausi o te sunako, kae fai atu: “A tau tamaliki fafine ko mate. Sa toe fakalavelave atu ki te Faiakoga.”+ 50  I te lagonaga ne Iesu te mea tenā, fai atu ei: “Sa mataku, fakatuanaki fua koe, kae ka toe ola a ia.”+ 51  I tena okoatuga ki te fale, ne seki talia ne ia se tino ke ulu mo ia ki loto kae na ko Petelu, Ioane, Iakopo mo te tamana mo te mātua o te tamaliki fafine. 52  Ne ‵tagi mautuutu a tino katoa i te fanoa‵noa ona ko te tamaliki fafine. Fai atu ei a Iesu: “Sa ‵tagi,+ me i a ia e seki mate kae e moe fua.”+ 53  Ona ko ana pati konei, ne kamata o ‵kata fakatauemu atu latou ki a ia, me ne iloa ‵lei ne latou i te tamaliki ko mate eiloa. 54  Ne puke ne ia te lima o te tamaliki kae kalaga atu: “Te tamaliki, tu ki luga!”+ 55  Ne toe ola*+ aka ei a ia, kae tu fakavave ki luga.+ Ne fakatonu atu a Iesu ke tuku atu ne ana mea ke kai. 56  Ne fia‵fia malosi i ei ana mātua, kae ne fakatonu atu a Iesu ki a lāua ke mo a eiloa ma fakaasi atu ki se tino a te mea telā ne tupu.+

Fakamatalaga mai lalo

Io me “ne toe foki mai tena mānava (malosi ola).”