Te Tusi a Luka 7:1-50

  • Te fakatuanaki o se ofisa o te kautau (1-10)

  • Ne fakatu ne Iesu te tama tagata a te fafine i Naina telā ko mate tena avaga (11-17)

  • Ko tavaegina a Ioane te Papatiso (18-30)

  • Ko taku fakamasei se kautama fui fai (31-35)

  • Ko fakamagalo se fafine agasala (36-50)

    • Tala fakatusa ki tāgata ne kaitalafu tupe (41-43)

7  I te otiga o ana pati kolā ne ‵tau o fai atu ki tino, fanatu ei a ia ki Kapanaumi.  E isi se pologa a te ofisa o te kautau, telā e pele ki a ia, e masaki malosi kae ko pili eiloa o mate.+  I te taimi ne logo ei a ia e uiga ki a Iesu, uga atu ei ne ia a nisi toeaina Iutaia o fakamolemole atu ki a ia ke vau o faka‵lei aka tena pologa.  Ne olo atu latou ki a Iesu kae kamata o fakatagi atu ki a ia, olotou muna: “A ia se tino telā e ‵tau eiloa o maua ne ia tou fesoasoani,  me ko ia eiloa ko alofa ki te ‵tou fenua kae ne fakatu foki ne ia te motou sunako.”  Ne fanatu a Iesu i a latou. Kae i tena piliatuga ki te fale, uga atu ei ne te ofisa o te kautau ana taugasoa ke fai atu ki a ia: “Tou ‵malu, sa vau, me e seai soku aoga ke ulu mai ei koe ki loto i toku fale.+  Tenā te pogai ne mafaufau ei au me e seai soku aoga ke fanatu au ki a koe. Kae fai aka fua sau pati, ko ‵lei ei taku tavini.  Me i a au foki se tagata e isi saku pule, o pule ki luga i sotia. E fakatonu atu au ki se sotia, ‘Fano!’ ko te mea eiloa ko fano, kae ki te suā sotia, ‘Vau!’ ko te mea eiloa ko vau, kae ki taku pologa, ‘Fai te mea tenei!’ ko te mea eiloa ko fai ne ia.”  I te lagonaga ne Iesu a mea konei, ne ofo a ia i te tagata tenā. Ne ‵fuli atu a ia ki te vaitino kolā ne tau‵tali atu i a ia kae fai atu: “Au e fai atu ki a koutou, e seai eiloa se tino i Isalaelu kai maua ne au, e lasi penei tena fakatuanaki.”+ 10  Kae i te ‵fokiatuga ki te fale a latou kolā ne uga atu, maua atu ei ne latou a te pologa ko ‵lei.+ 11  Fakamuli ifo, ne faimalaga atu ei a ia ki se fakai e igoa ki a Naina, kae ne ma‵laga fakatasi atu a ia mo ana soko mo se vaitino. 12  I tena piliatuga ki te mataloa o te fakai, kiloke! e isi se tino mate e amo mai, ko te tama tagata eiloa e tokotasi a tena mātua.+ I tafa i ei, a ia se fafine ko mate tena avaga. E tokouke foki a tino o te fakai ne o‵mai fakatasi mo tou fafine. 13  I te taimi ne lavea ei ne te Aliki a te fafine, ne alofa malosi a ia ki tou fafine,+ kae fai atu ki ei: “Sa tagi.”+ 14  Ne fanatu a ia, puke atu ki te moega telā e sau ei te tino mate, kae ne ‵tu a tino kolā e amo ne latou. Ne fai atu a ia: “Te tamataene, au e fai atu ki a koe, tu ki luga!”+ 15  Ne nofotu aka te tino mate, kae ne kamata o faipati, tuku atu ei ne Iesu ki tena mātua.+ 16  Ne ma‵taku katoa latou, kae ne kamata o tavae atu ki te Atua, olotou muna: “Ko oti ne fakatu aka se pelofeta sili mai i a tatou,”+ kae, “Ko oti foki ne saga atu te Atua ki ana tino.”+ 17  Kae ne salalau atu te tala tenei e uiga ki a ia i Iuta mo fenua katoa i ana tafa. 18  Ne lipoti atu ne soko o Ioane a mea katoa konei ki a ia.+ 19  Tenā ne kalaga atu ei a Ioane ki ana soko e tokolua kae uga atu ki te Aliki ke fesili atu ki a ia: “A koe ko te Tino telā ka vau,+ io me koi faka‵tali matou ki se isi tino?” 20  I te taimi ne o‵mai ei lāua ki a ia, fai atu ei a tāgata konā: “Ne uga mai māua ne Ioane te Papatiso ke fesili atu ki a koe, ‘A koe ko te Tino telā ka vau, io me koi faka‵tali matou ki se isi tino?’” 21  I te itula foki tenā ne faka‵lei ne ia a masaki e uke,+ masaki ma‵sei, mo tino e pukea ne agaga ma‵sei kae faka‵pula ne ia a mata o tino ‵kivi e tokouke. 22  Ne tali atu a ia ki a lāua: “Olo o fakailoa atu ki a Ioane a mea ne lavea kae lagona ne koulua: A tino ‵kivi ko ‵kite,+ a tino vae ma‵sei ko sa‵sale, a tino lepela ko oti ne faka‵magina, a tino ‵tuli ko ‵logo,+ a tino ‵mate ko oti ne faka‵tu aka, kae ko oti ne folafola atu a te tala ‵lei ki tino ma‵tiva.+ 23  Ka fiafia a te tino telā e se siga ona ko au.”+ 24  I te ologa o avefekau a Ioane, ne kamata a Iesu o faipati atu ki te vaitino e uiga ki a Ioane: “Se a te mea ne fia lavea ne koutou i te koga lavaki? E mata, se mouku loa telā e agi valevale ne te matagi?+ 25  Se a la te mea ne fia lavea ne koutou? E mata, se tagata e pei ki gatu ‵gali?+ A tino kolā e ‵pei ki gatu ‵gali kae e ola e pelā me ne tino mau‵mea, e ‵nofo i palesi o tupu. 26  Se a la te mea ne fia lavea tonu ne koutou? Se pelofeta? E tonu, au e fai atu ki a koutou, a ia tenā e sili fakafia atu i se pelofeta.+ 27  Ko ia eiloa tenei ne tusi mai e uiga ki ei: ‘Kiloke! Ko uga atu ne au taku avefekau ke mua i a koe, telā ka mua atu o fakatoka tou auala.’+ 28  Au e fai atu ki a koutou, e seai se tino i a latou kolā ne fa‵nau mai i fāfine e sili atu i a Ioane, kae ko te ‵toe tino malalo i te Malo o te Atua e sili atu i a ia.”+ 29  (I te lagonaga ne tino katoa mo tino ‵tae lafoga a te mea tenei, folafola mai ei ne latou i te Atua e amiotonu, me ko oti ne papatiso latou i te papatisoga a Ioane.+ 30  Kae ne seki fia ‵saga atu a Falesaio mo tino ‵poto i te Tulafono ki pati fakatonutonu a te Atua ki a latou,+ me i a latou e seki papatiso ne Ioane.) 31  “Ko oi la ka faka‵tusa ne au ki ei a tino o te kautama tenei, kae ko oi a tino e ‵pau mo latou?+ 32  E ‵pau latou mo tama‵liki fo‵liki kolā e saga‵saga i te maketi kae e fakatau paka‵laga atu ki a latou eiloa, kae fai atu: ‘Ne fakatagi ne matou te faili mō koutou, kae ne seki ‵saka koutou; ne ‵tagi mautuutu matou, kae e se ‵tagi fanoa‵noa koutou.’ 33  E penā foki te vauga a Ioane te Papatiso, ne seki kai a ia ki falaoa io me inu ki uaina,+ kae fai mai koutou: ‘E isi se temoni i a ia.’ 34  Kae ne vau te Tama a te tagata e kai kae inu, kae e fai mai koutou: ‘Kiloke! A te tagata tenei se tino gafula kae inu uaina, se taugasoa o tino ‵tae lafoga mo tino agasala!’+ 35  Kae e fakatalitonugina te poto o te tagata e auala i ana tama‵liki.”*+ 36  Kae ne ‵kami faeloa a ia ne se Falesaio e tokotasi ke ‵kai fakatasi lāua. Ne ulu atu a ia ki loto i te fale o te Falesaio kae sagasaga i te taipola. 37  Kae kiloke! ne iloa ne se fafine telā e lauiloa i te fakai tenā me se tino agasala, me i a Iesu e kai i te fale o te Falesaio, fanatu ei a ia mo se fagu* sinu manogi gali.+ 38  Ne vau a ia mai i ana tua kae totuli ifo i ana vae. Ne tagi tou fafine kae ne ‵sofi ifo ana loimata ki vae o Iesu kae ‵solo ne ia ki ana laulu. Ne sogi atu foki ki ana vae kae ‵ligi ne ia te sinu manogi ki luga i ei. 39  I te laveaga ne te Falesaio telā ne ‵kami ne ia tou tagata a te mea tenei, fai aka ei ana mafaufauga: “Kafai te tagata tenei se pelofeta eiloa, e ‵tau o iloa ne ia me ko oi te fafine telā e puke atu ki a ia, me i a ia se fafine agasala.”+ 40  Kae ne tali atu a Iesu ki a ia: “Simona, e isi se mea e fia fai atu ne au ki a koe.” Ana muna: “Te Faiakoga, fai mai la!” 41  “E tokolua tāgata ne kaitalafu tupe i se tino e tokotasi; e tokotasi ne kaitalafu ne ia te 500 tenali,* kae ko te suā tino e 50. 42  I te taimi ko se mafai ei ne lāua o ‵togi lā kaitalafu, ne fakamagalo ei ne ia a lāua tokolua?” Tela la, ko oi la te tino i a lāua konā ka alofa malosi atu ki a ia?” 43  Ne tali atu a Simona: “Kāti la ko ia telā e lasi tena kaitalafu.” Ana muna ki a ia: “E tonu koe.” 44  Ne ‵fuli atu ei a ia ki te fafine kae fai atu ki a Simona: “E lavea ne koe te fafine tenei? Ne ulu mai au ki tou fale; ne seki tuku mai ne koe ne vai ke ‵fulu ei oku vae. Kae ne faka‵siu ne te fafine tenei oku vae ki ana loimata kae ‵solo ne ia ki ana laulu. 45  Ne seki sogi mai koe ki a au, kae ko te fafine tenei, talu mai te taimi ne ulu mai ei au ki loto, ne sogi faeloa a ia ki oku vae. 46  Ne seki ‵ligi ne koe ne sinu ki toku ulu, kae ne ‵ligi ne te fafine tenei oku vae ki se sinu manogi. 47  Ona ko te mea tenei, au e fai atu ki a koe, e tiga eiloa te uke o ana agasala kae ko oti katoa ne fakamagalo+ ona ko te lasi o tena alofa. Kae ko te tino telā e foliki te mea ne fakamagalogina, e foliki tena alofa.” 48  Ne fai atu a ia ki te fafine: “Au agasala ko magalo.”+ 49  Ne ma‵natu ifo a tino kolā e saga‵saga mo ia i te taipola: “Ko oi la te tagata tenei e fakamagalo ne ia a agasala?”+ 50  Kae ne fai atu a ia ki te fafine: “Ko oti ne fakasao koe ne tou fakatuanaki;+ fano la mo te filemu.”

Fakamatalaga mai lalo

Io me “i mea kolā e fua mai i ei.”
Onoono ki te fml i te Mat 26:7.
Onoono ki te MF E14.