Te Tusi a Luka 6:1-49
-
Iesu, “te Aliki o te Sapati” (1-5)
-
Ko ‵lei te tagata ne ‵mate tena lima (6-11)
-
Apositolo e toko 12 (12-16)
-
Iesu ko akoako kae faka‵lei masaki (17-19)
-
Mea fakafia‵fia mo mea fakafanoanoa (20-26)
-
Alofa ki ou fili (27-36)
-
Sa fakamasino atu (37-42)
-
E iloa fua i ana fuataga (43-45)
-
Se fale ne faite faka‵lei; se fale e seai sena fakavae (46-49)
6 I te sapati e tasi ne fanatu a ia i loto i se fatoaga saito, kae ne tau ne ana soko a kaufui saito+ o kai, kae milimili ne latou ki olotou lima.+
2 Kae ne fai atu a nisi Falesaio: “Kaia e fai ei ne koutou te mea telā e tapu i te Sapati?”+
3 Kae ne tali atu a Iesu ki a latou: “E a, e seki fai‵tau koutou ki te mea ne fai ne Tavita i te taimi ne fia‵kai ei a ia mo ana tāgata?+
4 I te taimi ne ulu ei a ia ki loto i te fale o te Atua o puke a falaoa kolā ko oti ne ofo atu ki te Atua, kai ne ia kae tuku atu a nisi mea ki ana tāgata, ko mea kolā e tapu ma kai ki ei se tino kae na ko faitaulaga fua?”+
5 Tenā ne fai atu ei a ia ki a latou: “A te Tama a te tagata ko te Aliki o te Sapati.”+
6 I te suā sapati,+ ne ulu atu a ia ki loto i te sunako kae kamata o akoako atu. Kae e isi se tagata i konā e ‵mate tena lima fakaatamai.+
7 Ne lamalama a Iesu ne failautusi mo Falesaio i te mea ma faka‵lei ne ia se tino i te Sapati, ko te mea ke maua ne latou se pogai ke ‵losi atu ki a ia.
8 Kae ne iloa ne ia olotou mafaufauga,+ fai atu ei a ia ki te tagata e ‵mate tena lima: “Tu ki luga kae vau ki te kogaloto.” Ne tafuke aka a ia kae fanatu ki konā.
9 Tenā ne fai atu ei a Iesu ki a latou: “Au ne fesili atu ki a koutou, E mata, e saoloto i te Sapati ke fai se mea ‵lei io me se mea masei, ke fakasao se ola io me tamate se tino?”+
10 I te otiga ne kilokilo atu ki a latou katoa, fai atu ei a ia ki te tagata tenā: “‵Fola mai tou lima.” Ne fai ne ia penā, ‵lei ei tena lima.
11 Kae ne kaitāua malosi ou tāgata, kae kamata o fai‵pati latou me se a te mea ka fai ne latou ki a Iesu.
12 I se aso e tasi, ne fanaka a ia ki luga i te mauga o ‵talo i ei,+ kae ne ‵talo atu a ia ki te Atua i te po kātoa tenā.+
13 Kae i te taeaoakaga, ne kalaga atu a ia ki ana soko kae ne filifili ne ia mai i a latou te toko 12, kolā ne fakaigoa foki ne ia ki apositolo:+
14 ko Simona, telā ne fakaigoa foki ne ia ki a Petelu, mo tena taina ko Anitelea, Iakopo, Ioane, Filipo,+ Patolomaio,
15 Mataio, Toma,+ Iakopo te tama a Alefaio, Simona telā e fakaigoa ki “te tino loto finafinau,”
16 Iuta te tama a Iakopo, mo Iuta te Isikaliota, telā ne fai mo fai te tino faitogafiti.
17 Ne fanaifo a ia ki lalo fakatasi mo latou kae tu i se koga laugatasi, kae e tokouke foki ana soko mo se vaitino mai i Iuta kātoa mo Ielusalema mo kogā koga i te tafatai o Tulo mo Saitonu, kolā ne o‵mai o fakalogo‵logo ki a ia kae ke faka‵lei foki olotou masaki.
18 Ke oko foki ki tino kolā ne fakalavelavegina ne agaga ma‵sei ne ‵lei katoa.
19 Kae ne taumafai a te vaitino kātoa o fakapa‵tele atu ki a ia me ne fano ki tua te ‵mana mai i a ia+ kae ne ‵lei ei latou katoa.
20 Ne kilo aka ana mata ki ana soko kae fai atu:
“E fia‵fia a koutou kolā e ma‵tiva, me i o koutou te Malo o te Atua.+
21 “E fia‵fia a koutou kolā e fia‵kai nei, me ka ma‵kona eiloa koutou.+
“E fia‵fia a koutou kolā e ‵tagi nei, me ka ‵kata eiloa koutou.+
22 “E fia‵fia koutou māfai e takalia‵lia a tino ki a koutou,+ kae ‵tuli ne latou a koutou,+ e fakatauemu atu ki a koutou kae taku fakamasei otou igoa ona ko te Tama a te tagata.
23 Ke fia‵fia kae eva koutou mo te ‵lifu i te aso tenā, kae kiloke! a te otou taui e lasi ‵ki i te lagi, me konā foki a mea ne fai sāle ne olotou tupuga ki pelofeta.+
24 “Kae kalofa eiloa i a koutou tino mau‵mea,+ me konā katoa eiloa a mea e maua ne koutou.+
25 “Kalofa eiloa i a koutou kolā e ma‵kona nei, me i a koutou ka fia‵kai.
“Kalofa eiloa i a koutou kolā e kata‵kata nei, i a koutou ka fanoa‵noa kae ‵tagi mautuutu.+
26 “Kalofa eiloa i a koutou māfai e tavaegina ne tino katoa,+ me tenei eiloa te mea ne fai ne olotou tupuga ki pelofeta ‵loi.
27 “Kae e fai atu au ki a koutou konei e fakalogo‵logo mai: Tumau i te a‵lofa ki otou fili, kae fai mea ‵lei ki a latou kolā e takalia‵lia ki a koutou,+
28 ke fakamanuia atu ki a latou kolā e fetū ne latou a koutou, kae ‵talo mō latou kolā e fakamasei ne latou a koutou.+
29 Kafai e ‵pa ne se tino tou kalafou e tasi, tuku atu foki te suā kalafou; kae kafai e ave ne se tino tou gatu i tua, tuku atu foki ki ei tou gatu ‵tao loto.+
30 Tuku atu ki tino katoa kolā e akai atu ki a koe,+ kae sa toe fai ke aumai au mea kolā ko oti ne puke ne se tino.
31 “E pelā foki mo mea kolā e ma‵nako koutou ke fai atu ne tino ki a koutou, ke fai foki ne koutou ki a latou.+
32 “Kafai e a‵lofa koutou ki tino kolā e a‵lofa atu ki a koutou, se a la tena aoga ki a koutou? Me i tino agasala e a‵lofa foki ki tino kolā e a‵lofa ki a latou.+
33 Kae kafai e fai ne koutou a mea ‵lei ki a latou kolā e fai a mea ‵lei ki a koutou, se a la tena aoga ki a koutou? E fai foki ne tino agasala a mea konā.
34 Kafai foki e fakakaitalafu au tupe ki tino kolā e fakamoemoe koe ke toe ‵togi mai, se a la tena aoga ki a koutou?+ E fakakaitalafu foki ne tino agasala olotou tupe ki tino agasala ko te mea ke toe maua mai olotou mea katoa.
35 I lō te fai penā, ke tumau koutou i te a‵lofa ki otou fili kae fai te mea ‵lei kae fakakaitalafu atu e aunoa mo te fakamoemoe ke toe maua mai ne mea;+ kae ka lasi ‵ki te otou taui, kae ka fai koutou mo fai a tama a te Atua Tafasili i te Maluga, me e atafai a ia ki tino sē loto fakafetai mo tino ma‵sei.+
36 Ke tumau i te alofa fakamagalo, e pelā eiloa mo te otou Tamana e alofa fakamagalo.+
37 “E se gata i ei, sa fakamasino atu kae ka se fakamasinogina koutou,+ sa fakamasei a nisi tino kae ka se fakamaseigina koutou. Tumau i te fakamagalo* atu kae ka fakamagalogina* koutou.+
38 Fakamasani o tuku atu ki nisi tino kae ka tuku atu ne tino ki a koutou.+ Ka ‵ligi atu ne latou ki otou gatu se fua ‵lei, e teke ke ī ki lalo, e lulugina, kae ma‵ligi foki ki tua. Me ko te fua telā e fua atu ne koutou, ka fua mai foki ne latou ki a koutou.”
39 Tenā ne fai atu foki ne ia se tala fakatusa ki a latou: “E mata, e mafai ne se tino ‵kivi o takitaki te suā tino ‵kivi? E mata, ka se ‵to tokolua atu lāua ki te lua?+
40 E se sili atu te tamaliki akoga i tena faiakoga, kae ko so se tino telā e akoakogina faka‵lei ka fai foki pelā mo tena faiakoga.
41 Kaia la e kilo ei koe ki te mouku i te mata o tou taina kae e se matea ne koe te potu lakau i tou mata?+
42 E mafai pefea o fai atu koe ki tou taina, ‘Taina, talia mai ke ‵seu kea‵tea ne au te mouku tenā i tou mata,’ kae e se lavea ne koe te potu lakau* i tou mata? Te tino loi! Tapale muamua te potu lakau i tou mata, ko matea faka‵lei ei ne koe te auala ke ‵seu ei kea‵tea te mouku i te mata o tou taina.
43 “Me e seai se lakau ‵lei e fua mai i ei a fuataga ma‵sei, e seai foki se lakau masei, e fua mai i ei a fuataga ‵lei.+
44 Me e iloa a lakau takitasi i olotou fua.+ E pelā mo tino e se tau ne latou a mati mai lakau makai‵kai, io me e tau ne latou a fuagavine mai lakau tala‵tala.
45 E aumai ne se tino ‵lei a mea ‵lei mai koloa ‵lei i tena loto, kae e aumai ne te tino masei a mea ma‵sei mai i ana koloa ma‵sei; me e faipati mai ne te gutu a mea kolā e ‵fonu i tena loto.+
46 “Kaia la e ka‵laga mai ei koutou ki a au ‘te Aliki! te Aliki!’ kae e se fai ne koutou a mea kolā e fai atu ne au?+
47 A tino katoa kolā e o‵mai ki a au kae e lagona ne latou aku muna kae fai ne latou, ka fakaasi atu ne au ki a koutou a te tino e ‵pau mo ia:+
48 A ia e pelā me se tagata telā e faite tena fale, ne keli ne ia ke ‵poko ki lalo kae fakatakato tena fakavae i luga i te kaupapa. Fakamuli ifo i te okomaiga o te lofiaga, ne ‵tafe atu te vaitafe ki luga i te fale tenā, kae seki lava tena malosi o fakagasue ne ia, me ne ‵lei eiloa tena faitega.+
49 I te suā feitu, so se tino e lagona ne ia kae e se fai ne ia se mea,+ e ‵pau mo se tagata e faite tena fale i luga i te laukele e aunoa mo se fakavae. Ne ‵tafe atu ki ei te vaitafe, kae ne siga fakavave ei kae ne lasi ‵ki te fakamaseiga ki te fale tenā.”
