Te Tusi a Luka 4:1-44
4 Ne tiaki ne Iesu te Iolitana, kae ko ‵fonu a ia i te agaga tapu. Ne takitaki a ia ne te agaga tapu i te koga lavaki+
2 i aso e 40 ko te mea ke tofotofo a ia ne te Tiapolo.+ Ne seki kai eiloa a ia ki se mea i aso konā, kae oti aka loa ne lagona ne ia te fiakai.
3 Ne fai atu te Tiapolo ki a ia: “Kafai koe ko te tama a te Atua, fai ki te fatu tenei ke liu falaoa.”
4 Kae ne tali atu a Iesu ki a ia: “E tusi i te tusi, ‘E se ko meakai fua e ola ei te tagata.’”+
5 Ne ave ne ia a Iesu ki luga kae fakaasi atu ki a ia a malo katoa o te lalolagi nofoaki i se taimi toetoe.+
6 Ne fai atu te Tiapolo ki a ia: “Ka avatu ne au ki a koe a te pule i luga i mea katoa konei mo olotou ‵malu, me ko oti ne tuku mai ki a au te pulega i luga i ei,+ kae e mafai o tuku atu ne au ki so se tino e manako au ki ei.
7 Tela la, kafai e tapuaki fakatasi mai fua koe ki a au, ka maua eiloa ne koe a mea katoa konei.”
8 Ne tali atu a Iesu ki a ia: “E tusi i te tusi, ‘E ‵tau mo koe o tapuaki ki a Ieova* tou Atua kae ko ia fua tokotasi e ‵tau o avatu ne koe ki ei te taviniga tapu.’”+
9 Tenā ne toe ave ei ne ia tou tagata ki Ielusalema kae fakatu ne ia i te ‵pui maluga* o te faletapu kae fai atu ki a ia: “Kafai koe ko te tama a te Atua, eva ki lalo mai konei,+
10 me e tusi i te tusi, ‘Ka tuku atu ne ia ki ana agelu se fakatonuga e uiga ki a koe, ke puipui ne latou a koe,’
11 kae ‘Ka sau aka ne latou a koe i olotou lima, ko te mea ke se pakia tou vae i se fatu.’”+
12 Ne tali atu a Iesu ki a ia: “Kae e fai mai penei, ‘E se ‵tau mo koe o tofotofo a Ieova* tou Atua.’”+
13 I te otiga o fakaosoosoga katoa konei, tiaki ei ne te Tiapolo a ia ke oko ki se isi taimi ‵lei.+
14 Ne foki atu a Iesu ki Kalilaia+ e auala i te malosi o te agaga tapu. Kae ne salalau atu a tala ‵gali e uiga ki a ia i fenua katoa i olotou tafa.
15 Ne kamata foki o akoako atu a ia i olotou sunako kae ne fakaaloalo a tino katoa ki a ia.
16 Ne foki atu a ia ki Nasaleta,+ ko te koga ne tupu aka ei a ia. Kae e ‵tusa mo tena masani i te Sapati, ne ulu atu a ia ki loto i te sunako,+ kae tu aka o faitau.
17 Ne tuku atu ki a ia te peluga tusi a te pelofeta ko Isaia, kae ne ‵tala ne ia te peluga tusi ki te koga telā e tusi ei a pati konei:
18 “Ko i luga i a au te agaga o Ieova,* me ne fakaeke ne ia au ke folafola atu te tala ‵lei ki tino ma‵tiva. Ne uga mai ne ia au o talai atu te fakasaolotoga ki tino ne ave fakapagota mo te faka‵pulaga o mata o tino ‵kivi, o fakasaoloto a tino loto mafatia,+
19 o talai atu te tausaga o te loto ‵lei o Ieova.”*+
20 Ne pelu ne ia te peluga tusi, tuku atu ki te tino tausi, kae sagasaga ki lalo; kae ne ‵kilo atu katoa a mata o tino i te sunako ki a ia.
21 Fai atu ei a ia ki a latou: “Ko fakataunu i te aso nei a mea i te tusi telā ne fatoa fakalogo‵logo koutou ki ei.”+
22 Kae ne kamata o avatu ne latou se molimau ‵lei e uiga ki a ia kae ne ofo latou i te ‵gali o pati kolā ne ‵to mai i tena gutu,+ kae fai aka ei olotou muna: “E se ko ia tenei te tama a Iosefa?”+
23 Fai atu ei a ia ki a latou: “E seai se fakalotolotolua me ka fakauiga ne koutou a pati konei ki a au: ‘Te tokita, ke faka‵lei ne koe a koe eiloa. A mea kolā ne ‵logo matou me ne fai i Kapanaumi+ ke fai foki ne koe i tou fakai tonu.’”
24 Kae ne fai atu a ia: “Au e fai ‵tonu atu ki a koutou me e seai se pelofeta e talia i tena fenua tonu.+
25 E fai ‵tonu atu au ki a koutou: E tokouke a fāfine ko ‵mate olotou avaga i Isalaelu i aso o Elia, i te taimi ne ‵pono ei te lagi i tausaga e tolu mo te ono masina, kae ne oko atu ei te oge lasi ki te fenua kātoa.+
26 Kae ne seki uga atu a Elia ki se fafine e tokotasi i a latou konā kae ne uga atu fua ki se fafine ko mate tena avaga i Salefata i te fenua ko Saitonu.+
27 E tokouke foki a lepela i Isalaelu i taimi o te pelofeta ko Elisaia; kae e seai se tino i a latou ne faka‵magina, kae na ko Namanu fua mai Sulia.”+
28 Kae ko tino katoa kolā ne ‵nofo i te sunako ne kaitāua i te lagonaga ne latou a mea konā,+
29 ne ‵tu aka ou tāgata ki luga kae ave fakavave ne latou a ia ki tua o te fakai, kae ‵taki atu ki te feitu o te mauga telā e tu ei te lotou fakai, ko te mea ke ‵pei ne latou a ia ki lalo.
30 Kae ne ulu atu a ia i va o latou, fano ei kea‵tea.+
31 Ne fanatu a ia ki Kapanaumi, se fakai i Kalilaia, kae akoako atu ki a latou i te Sapati,+
32 kae ne ofo latou i te auala ne fai ei ana akoakoga,+ me ne faipati a ia e pelā me se tino e isi sena malosi pule.
33 Kae e isi se tagata i te sunako e nofo i a ia se agaga, se temoni masei, kae ne pakalaga a ia i se leo lasi:+
34 “Aa! Ne a omotou mea ne fai atu ki a koe, e Iesu, te Nasaleta?+ E a, a koe ne vau o fakaseai matou? E iloa faka‵lei ne au a koe, ko te Tino Tapu a te Atua.”+
35 Kae ne ‵liko atu a Iesu, ana muna: “Filemu, kae fano nei ki tua mai i a ia.” Kae i te otiga ne ‵pei ne te temoni a te tagata tenā ki lalo, fano ei ki tua te temoni mai i a ia e aunoa mo te fakalogo‵mae atu ki ei.
36 Tenā ne ofo ei a latou katoa i te mea tenei, kae fai atu te suā tino ki te suā tino: “Ne a vaegā pati konei? E maua ne ia te pule mo te malosi ke fakatonu ne ia a agaga ma‵sei, kae ne olo eiloa latou ki tua!”
37 Ne salalau atu a tala e uiga ki a ia ki fenua katoa i olotou tafa.
38 I te tiakinaga ne ia te sunako, ulu atu ei a ia ki loto i te fale o Simona. A te mātua o te avaga a Simona e maluga tena fiva, kae ne fakamolemole atu latou ki a Iesu ke fesoasoani atu ki tou fafine.+
39 Ne tu atu a ia i ana mua kae faka‵lei ne ia tena fiva, ko te mea eiloa ko ‵lei. Ne tu fakavave aka tou fafine ki luga kae kamata o tavini atu ki a latou.
40 Kae i te ‵toga o te la, avatu ei ne tino katoa ki a ia a tino kolā e ma‵saki i masaki kese‵kese. Mai te fakaekeatuga o ana lima ki luga i a latou taki tokotasi, faka‵lei ei ne ia latou.+
41 Ne olo kea‵tea foki a temoni mai i tino e tokouke, kae ka‵laga atu, olotou muna: “A koe ko te Tama a te Atua.”+ Kae ne ‵liko atu a ia ki a latou kae seki talia ne ia a temoni konā ke fai‵pati,+ me ne iloa ne latou i a ia ko te Keliso.+
42 I te tafataeao ‵malu ne fano a ia ki tua ki se koga sē logoa.+ Kae ne kamata o ‵sala atu te vaitino ki a ia kae olo atu ki te koga telā e nofo a ia i ei. Ne taumafai latou o taofi a ia ke mo a ma fano kea‵tea mai i a latou.
43 Kae ne fai atu a ia ki a latou: “E ‵tau foki mo au o folafola atu te tala ‵lei o te Malo o te Atua ki nisi fakai, me tenei eiloa te mea ne uga mai ei au.”+
44 Tenā ne fano ei a ia o talai i sunako i Iuta.
Fakamatalaga mai lalo
^ Io me “te ‵toe koga maluga.”
