Te Tusi a Luka 20:1-47

  • Te ‵tekeatuga ki te pulega a Iesu (1-8)

  • Tala fakatusa ki tino fai fatoaga tatino (9-19)

  • Te Atua mo Kaisala (20-26)

  • Fesili e uiga ki te toetuga (27-40)

  • E mata, a te Keliso ko te tama a Tavita? (41-44)

  • Fakaeteete i failautusi (45-47)

20  I te aso e tasi kae koi akoako atu ne ia a tino i te faletapu kae folafola atu te tala ‵lei, ne olo atu a faitaulaga pule mo failautusi mo toeaina  kae fai atu ki a ia: “Fai mai ki a matou, i o oi te malosi e fai ei ne koe a mea konei? Io me ko oi ne tuku atu ne ia te malosi tenei ki a koe?”+  Ne tali atu a ia ki a latou: “Ka ‵sili atu foki ne au se fesili ki a koutou, kae ke tali mai koutou ki a au:  E mata, a te papatisoga a Ioane ne māfua mai i te lagi io me mai i tāgata?”*  Tenā ne fai ei olotou fakaikuga i a latou eiloa, olotou muna: “Kafai e fai atu tatou, ‘Mai te lagi,’ ka fai mai a ia, ‘Kaia la ne seki tali‵tonu ei koutou ki a ia?’  Kae kafai e fai atu tatou, ‘Mai i tāgata,’ ka peipei eiloa tatou ne tino katoa ki fatu, me ne tali‵tonu eiloa latou i a Ioane se pelofeta.”+  Tenā ne tali atu ei latou me e se iloa ne latou me ne māfua mai i fea.  Ne fai atu a Iesu ki a latou: “E se fakaasi atu foki ne au me i o oi te malosi e fai ei ne au a mea konei.”  Tenā ne kamata ei o fai atu ne ia te tala fakatusa tenei ki tino: “E isi se tagata ne ‵toki tena togavine+ kae liisi atu ki tino fai fatoaga, fano ei a ia ki se isi fenua i se taimi leva ‵ki.+ 10  I te okoga ki te ‵tau e tau ei a fuagavine, uga atu ei ne ia tena pologa ki tino fai fatoaga ke tuku atu ne latou ki a ia ne fuagavine mai te togavine. Kae i te otiga ne ta ne tino fai fatoaga, uga atu ei ne latou ke fano e aunoa mo se mea.+ 11  Kae ne toe uga atu ne ia te suā pologa. Ne ta foki ne latou te pologa tenā, fakamasiasi* kae uga ke fano e aunoa mo se mea. 12  Ne toe uga atu foki ne ia te tokotolu; ne ta foki ne latou te tino tenei ke pakia kae ‵pei ki tua. 13  Fai aka ei te tino i o ia te togavine, ‘Se a taku mea ka fai? Ka uga atu ne au taku tama, telā e pele i a au.+ Kāti ka āva eiloa latou ki a ia.’ 14  I te laveaga ne tino fai fatoaga a ia, ne fakatau tītī olotou manatu, kae fai aka, ‘Tenei eiloa tena sui. Ke na tamate ne tatou a ia ko te mea ke puke ma tatou tena tofi.’ 15  Tenā ne ‵pei ei ne latou a ia ki tua mo te togavine kae tamate a ia.+ Se a la te mea ka fai ne te tino i o ia te togavine ki a latou? 16  Ka vau eiloa a ia o tamate a tino fai fatoaga konei kae tuku atu te togavine ki nisi tino.” I te lagonaga ne latou te mea tenei fai aka ei olotou muna: “Ke mo a eiloa ma tupu te mea tenā!” 17  Kae ne kilo atu a ia ki a latou kae fai atu: “Se a la te uiga o te mea telā ne tusi: ‘A te fatu telā ne tiakina ne tufuga fai fale ko fai nei mo fatu tulimanu tafasili i te aoga’?*+ 18  So se tino telā e siga ki luga i te fatu tenei ka fatifati valevale tena foitino.+ Kae ko so se tino telā e siga ki ei te fatu tenei ka palapala valevale tena foitino.” 19  Ne salasala a failautusi mo faitaulaga pule ki ne auala ke puke ei olotou lima ki tou tagata i te itula eiloa tenā, kae ne ma‵taku latou i tino, me e iloa ne latou me ne fai ne ia te tala fakatusa tenei e uiga ki a latou.+ 20  I te otiga ne iloilo faka‵lei ne latou a ia, ne uga ne latou ne tāgata kolā ne ‵togi ‵funa ne latou ke fai pelā i a latou ne tino amio‵tonu ko te mea ke mafai o ‵po ne latou a ia i ana pati,+ ko ave ei a ia ki te malo mo te kovana. 21  Kae ne fesili atu latou ki a ia, olotou muna: “Te Faiakoga, e iloa ne matou me e faipati kae akoako ne koe te mea tonu kae e se fakailoga tino foki koe, kae e akoako ne koe a auala o te Atua e ‵tusa mo te munatonu: 22  E mata, e saoloto i te tulafono* ke ‵togi atu ne tatou a lafoga foitino ki a Kaisala io me ikai?” 23  Ne iloa ne Iesu te lotou togafiti kae fai atu ki a latou: 24  “Fakaasi mai ki a au se tenali.* I o oi te ata mo te igoa tenei?” Ne fai atu latou: “I o Kaisala.” 25  Fai atu ei a ia ki a latou: “Tela la, toe ‵togi atu a mea a Kaisala ki a Kaisala+ kae ko mea a te Atua ki te Atua.”+ 26  Ne seki mafai ne latou o ‵po aka a ia i ana pati konei i mua o tino, kae ne seki ai ne olotou pati ne fai ona ko te lotou ofo i tena tali. 27  Kae ko nisi Satukaio, kolā e fai mai me e seai se toetu,+ ne olo atu kae fesili atu ki a ia:+ 28  “Te Faiakoga, ne tusi mai a Mose ki a matou, ‘Kafai e mate se tagata avaga kae e seai ne ana tama‵liki, e ‵tau o avaga tena taina mo tena avaga ko te mea ke maua ne tama‵liki ma tena taina.’+ 29  E isi ne tautaina e tokofitu. Ne avaga te toekimua kae ne mate kae seai sena tamaliki. 30  A te tokolua 31  mo te tokotolu ne avaga foki mo ia. E penā katoa eiloa te tokofitu; ne ‵mate kae ne seai ne olotou tama‵liki. 32  Fakamuli ifo, ne mate foki te fafine. 33  Tela la, i te taimi o te toetu, ko oi ka fai mo fai te avaga a tou fafine? Me ne a‵vaga katoa a te tokofitu konā mo ia.” 34  Ne tali atu a Iesu ki a latou: “E a‵vaga a tama‵liki o te olaga masani tenei kae tuku atu foki ke a‵vaga, 35  kae ko tino kolā e ‵tau o maua ne latou te olaga i aso mai mua mo te toetuga mai te mate e se a‵vaga io me e se tuku atu ke a‵vaga.+ 36  E tonu, ka se toe ‵mate foki latou, me ka fai latou e pelā mo agelu, kae ko latou ko tama a te Atua me ne toe faka‵tu mai latou.* 37  Kae ne fakaasi mai eiloa ne Mose me ka toe faka‵tu mai a tino ‵mate, i te tala e uiga ki te lakau ‵ka, kae taku ne ia a Ieova* ko ‘te Atua o Apelaamo, ko te Atua o Isaako, ko te Atua foki o Iakopo.’+ 38  A ia e se ko te Atua o tino ‵mate, kae ko te Atua o tino ola, me i a latou e ola katoa i tena kilokiloga.”+ 39  Ne fai atu a nisi failautusi: “Te Faiakoga, ko oko eiloa i te ‵lei o au pati.” 40  Me ne seki maua ne latou te loto toa ke toe ‵sili atu se isi fesili ki a ia. 41  Tenā ne fesili atu ei a ia ki a latou: “Kaia e fai mai ei latou me i te Keliso ko te tama a Tavita?+ 42  Me ne fai mai a Tavita i te tusi ko Salamo, ‘Ne fai atu a Ieova* ki toku Aliki: “Sagasaga i toku feitu fakaatamai 43  ke oko ki te taimi e tuku ei ne au ou fili mo fai te mea e tuku ei ou vae.”’+ 44  Ne taku ne Tavita a ia ki te Aliki; kae e fai la pefea a ia mo fai tena tama?” 45  Kae koi fakalogo‵logo atu a tino katoa kae ne fai atu a ia ki ana soko: 46  “Ke fakaeteete koutou i failautusi kolā e ma‵nako o oloolo sāle mo olotou gatu ‵loa kae ma‵nako ke fakatalofa atu a tino ki a latou i maketi kae ke ‵nofo latou i nofoga tafa ki mua i sunako mo toe koga ma‵luga i ‵kaiga i afiafi,+ 47  kae ko latou kolā e ‵faomālō ne latou a fale o fāfine ko ‵mate olotou avaga kae ma‵nako ke onoono atu a tino ki olotou ‵talo ‵loa. Ka maua eiloa ne latou konei se fakasalaga telā e ‵mafa atu.”

Fakamatalaga mai lalo

Io me “māfua mai i tino?”
Io me “fakamasei.”
Eleni, “te ulu o te tulimanu.”
Io me “‵lei.”
Onoono ki te MF E14.
Eleni, “me i a latou ko fanau o te toetu.”
Onoono ki te MF A5.
Onoono ki te MF A5.