Te Tusi a Luka 2:1-52
2 I aso konā, ne oko atu se fakatonuga mai i a Kaisala Aokuso ki tino katoa i te lalolagi ke fai se tusiga o igoa.
2 (A te tusiga o igoa muamua tenei ne fai kae ko Kulenio ko te kovana o Sulia.)
3 Kae ne olo atu a tino katoa o fakamau olotou igoa i olotou fakai.
4 Tenā ne fanatu foki a Iosefa+ mai te fakai ko Nasaleta i Kalilaia ki Iuta, ki te fakai o Tavita, telā e fakaigoa ki Peteleema,+ ona ko ia se tino mai te kāiga o Tavita.
5 Ne fano a ia ke fakamau lā igoa mo Malia, telā ko oti ne avaga lāua+ kae ko pili foki o fanau.+
6 Kae koi ‵nofo atu lāua i konā, ne oko atu ki te taimi ka fanau ei tou fafine.
7 Ne fanau mai ne ia se tamaliki tagata, ko tena toekimua,+ kae ne fakapulupulu ne ia ki potu laugatu kae fakamoe i se tali fagai manu+ me ko seai se avanoaga mō latou i te fale talimalo.
8 E isi foki ne tausi mamoe i te kogā koga tenā e ‵nofo i tua o leoleo olotou lafu mamoe i te po.
9 Ne tu fakapoi atu te agelu a Ieova* i olotou mua, kae ne maina atu te ‵malu o Ieova* ki luga i a latou, kae ne ma‵taku ‵ki eiloa latou.
10 Kae ne fai atu te agelu ki a latou: “Sa ma‵taku, me kiloke! ko folafola atu ne au ki a koutou te tala ‵lei kae fakafiafia telā ka maua ne tino katoa.
11 Me ko oti ne fanau mai ki a koutou i te aso tenei se fakaola,+ telā ko Keliso te Aliki,+ i te fakai o Tavita.+
12 Kae tenei la te fakailoga mō koutou: Ka maua atu ne koutou se pepe e fakapulupulu ki potu laugatu kae e moe i se tali fagai manu.”
13 Ne ‵tu fakavave atu i tafa o te agelu a kautau o te lagi e se lausia,+ o tavae atu ki te Atua kae fai atu:
14 “Ke vikia te Atua telā e nofo i koga ma‵luga, kae ko te filemu ke i luga i tino kolā e fiafia* a ia ki ei i te lalolagi.”
15 I te tiakinaga ne agelu a latou o ‵foki ki te lagi, ne fai‵pati ei a tausi mamoe i a latou eiloa: “‵Tou olo nei eiloa ki Peteleema ke lavea ne tatou te mea telā ko oti ne tupu, telā ne fakailoa mai ne Ieova* ki a tatou.”
16 Ne olo fakavave atu latou kae ne maua atu ne latou a Malia e pelā foki mo Iosefa, mo te tamaliki e takato i loto i te tali fagai manu.
17 I te laveaga ne latou te mea tenei, fakaasi atu ei ne latou a te fekau telā ne fai atu ki a latou e uiga ki te tamaliki tenei.
18 Kae ko latou katoa kolā ne lagona ne latou ne ofo i mea kolā ne fai atu ne tausi mamoe ki a latou,
19 kae ne tausi eiloa ne Malia a pati katoa konei, kae mafaufau faeloa ki ei i tena loto.+
20 Ne ‵foki a tausi mamoe, kae ‵viki kae tavae atu ki te Atua ona ko mea katoa kolā ne lagona kae lavea ne latou, e pelā eiloa mo mea ne fakailoa atu ki a latou.
21 I te valu o aso, ko te taimi ke pilitome ei a ia,+ ne fakaigoa eiloa a ia ki a Iesu, ko te igoa ne fai atu ne te agelu kae koi tuai o fakafua a ia.+
22 I te okoga foki ki te taimi e faka‵ma ei lāua e ‵tusa mo te Tulafono a Mose,+ avatu ei ne lāua a ia ki Ielusalema ke tuku atu ki mua o Ieova,*
23 e pelā eiloa mo te mea e tusi i te Tulafono a Ieova:* “A toekimua tāgata katoa e ‵tau o fakatapu mō Ieova.”*+
24 Ne ofo atu ne latou te taulaga e ‵tusa mo te mea telā e fai mai i te Tulafono a Ieova:* “se avā lupe io me ne punua lupe e lua.”+
25 Kae kiloke! e isi se tagata i Ielusalema e igoa ki a Simeona, kae ko te tagata tenei e amiotonu kae fakaaloalogina, e faka‵tali mō te fakamafanafanaga o Isalaelu,+ kae ne nofo i a ia te agaga tapu.
26 E se gata i ei, ko oti ne fakaasi atu ne te Atua ki a ia e auala i te agaga tapu me e se mafai o mate a ia seiloga ke lavea muamua ne ia a te Keliso a Ieova.*
27 Mai lalo i te takitakiga a te agaga tapu ne fanatu a ia ki loto i te faletapu, kae i te avatuga o Iesu ne ana mātua ki loto ke fai ki ei a faifaiga masani o te Tulafono,+
28 ne puke aka ne ia te tamaliki ki ana lima kae tavae atu ki te Atua, ana muna:
29 “Nei la, te Aliki Sili, ko fakasaoloto ne koe tau pologa ke fano mo te filemu+ e ‵tusa eiloa mo tau folafolaga,
30 me ko oti ne lavea ki oku mata a te tino telā ka aumai ne ia te fakaolataga+
31 telā ne fakatoka ne koe i mua o tino katoa,+
32 se mainaga+ ke tapale ei kea‵tea a te veli o te pouliga mai atufenua+ kae se ‵malu tenā ki ou tino Isalaelu.”
33 Kae ne mafau‵fau faeloa te tamana mo te mātua o te tamaliki ki mea kolā ne faipatigina e uiga ki te tamaliki.
34 Ne fakamanuia atu foki ne Simeona lāua, kae fai atu ki a Malia te mātua o te tamaliki: “Kiloke! A te tamaliki tenei ko te pogai e ‵siga+ kae toe ‵tu aka ei a tino e tokouke i Isalaelu,+ kae se fakailoga ke ‵teke atu ki ei+
35 (e tonu, ka ‵suki a tou loto ki se pelu loa ‵ki),+ ko te mea ke fakaasi faka‵lei mai a mea i loto o tino e tokouke.”
36 Ne nofo i konā te pelofeta fafine ko Ana, te tama fafine a Fanuelu, mai te matakāiga o Asela. Ko matua ‵ki te fafine tenei kae ne ‵nofo fakatasi mo tena avaga i loto i se fitu tausaga mai tua o te lā fakaipoipoga,
37 kae ko mate tena avaga kae i te taimi nei ko 84 ana tausaga. E se mafai eiloa o galo a ia mai te faletapu, o tuku atu te taviniga tapu i te po mo te ao mai te fakalikiliki mo te faiga o ‵talo.
38 I te itula eiloa tenā ne fanatu a ia kae kamata o siki tena fakafetai ki te Atua kae faipati atu e uiga ki te tamaliki ki tino katoa kolā e fakatali‵tali ki te fakasaolotoga o Ielusalema.+
39 Tela la, i te otiga ne fai ne lāua a mea katoa e ‵tusa mo te Tulafono a Ieova,*+ toe ‵foki ei latou ki Kalilaia ki te lotou fakai, ko Nasaleta.+
40 Kae ne tupu aka faeloa te tamaliki kae gasolo o malosi, ne ‵fonu a ia i te poto kae ne tumau eiloa i luga i a ia te alofa o te Atua.+
41 Ne olo sāle ana mātua i tausaga takitasi ki Ielusalema ki te ‵kaiga fiafia o te Paseka.+
42 Kae i te taimi ko 12 ei ana tausaga, ne olo atu latou ki Ielusalema e ‵tusa loa mo faifaiga masani o te fakamanatuga.+
43 I te otiga o aso fakamanatu, ‵foki ei latou, kae ko Iesu ne nofo eiloa i Ielusalema kae e se iloa ne ana mātua.
44 Ne faima‵laga atu latou i te aso e tasi mo te manatu me kāti e ‵milo fakatasi a ia mo te lotou kau malaga kae ne kamata ei o ‵sala atu ki a ia i olotou kāiga mo taugasoa.
45 Kae ne seki maua eiloa a ia, toe ‵foki ei lāua ki Ielusalema, o ‵sala faka‵lei a ia.
46 Mai tua o aso e tolu kae maua atu ne lāua a ia i te faletapu, e sagasaga i te kogaloto o faiakoga o fakalogologo kae fesilisili atu ki a latou.
47 Kae ne ofo eiloa a latou katoa kolā ne fakalogo‵logo ki a ia i te lasi o tena malamalama mo ana tali.+
48 Ne ‵poi ana mātua i te laveaga ne lāua a ia, kae ne fai atu tena mātua ki a ia: “Taku tama, kaia ne fai ei ne koe te mea tenei ki a māua? A māua mo tou tamana ne salasala ki a koe mo te manavase.”
49 Kae ne fai atu a ia ki a lāua: “Kaia ne ‵sala ei koulua ki a au? E se iloa ne koulua me e ‵tau au o nofo i te fale o toku Tamana?”+
50 Kae ne seki malamalama lāua i ana pati ne fai atu ki a lāua.
51 Tenā ne toe ‵foki ei latou ki Nasaleta, kae ne tumau a ia i te fakalogo ki a lāua.+ Ne tausi faka‵lei foki ne tena mātua a pati katoa konei i tena loto.+
52 Ne gasolo aka faeloa a Iesu o poto kae malosi kae alofa ki ei te Atua, e pelā foki loa mo tino.
Fakamatalaga mai lalo
^ Io me “tino kolā e talia ne ia.”
