Te Tusi a Luka 16:1-31

  • Tala fakatusa ki te situati sē amiotonu (1-13)

    • ‘Tino telā e fakamaoni i mea fo‵liki e fakamaoni i mea e uke’ (10)

  • Te Tulafono mo te Malo o te Atua (14-18)

  • Tala fakatusa e uiga ki te tagata maumea mo Lasalo (19-31)

16  Tenā ne fai atu ei a Iesu ki te kau soko: “E isi se tagata maumea telā e isi sena situati,* kae ne ‵losi atu ki ei me ne fakamāumāu ne ia a mea a tena matai.  Ne ‵kami mai ne ia te situati tenā kae fai atu ki ei, ‘Se a te mea tenei ko logo au i ei e uiga ki a koe? A koe ko fakatea mai tau galuega e pelā me se situati me ko se mafai ne koe o tausi faka‵lei te fale.’  Tenā ne fai ifo ei te situati ki a ia eiloa, ‘Se a nei taku mea ka fai me ko oti au ne fakatea ne toku matai? E se lava toku malosi o keli a lua, kae e mā foki au ma akai atu ke maua ne aku mea.  A! Ko iloa ne au taku mea ka fai ko te mea kafai e fakatea au mai te galuega fakasituati, ka talia au ne tino ki loto i olotou fale.’  Ne kalaga atu a ia ki tino katoa kolā ne kaitalafu i tena matai kae fai atu ki te tino muamua, ‘E fia tau kaitalafu i toku matai?’  Ne tali atu a ia, ‘E 600 kalone* o sinu olive.’ Fai atu ei te situati ki a ia, ‘Toe puke mai tau feagaiga, nofo ki lalo kae tusi fakavave te aofaki e 300.’  Ne fai atu foki a ia ki te suā tino, ‘Kae ko koe, e fia tau kaitalafu?’ Ana muna, ‘E selau tulamu* saito.’ Fai atu ei ki a ia, ‘Toe puke mai tau feagaiga kae tusi ki lalo te aofaki e 80.’  Ne fakamālō atu te matai ki te situati me ne gasuesue a ia mo te poto faitalia eiloa tena sē amiotonu; me i tama o te olaga tenei e ‵poto i te fakafesagai atu ki te lotou kautama eiloa i lō tama o te mainaga.+  “E se gata i ei, au e fai atu ki a koutou: Ke fai ne otou taugasoa i koloa sē amio‵tonu+ me kafai ko se aoga a mea konā ka mafai ne latou o faka‵lafi koutou ki loto i fale se-gata-mai.+ 10  A te tino telā e fakamaoni i te ‵toe mea foliki eiloa e fakamaoni foki i mea e uke, kae ko te tino telā e se amiotonu i te ‵toe mea foliki e se amiotonu foki i mea e uke. 11  Tela la, kafai e se fakamaoni koutou e uiga ki koloa sē amio‵tonu, ko oi la ka fia tuku atu ne ia ki a koutou a tinā mea ‵tonu? 12  Kae kafai e se fakamaoni koutou ki mea a te suā tino, ko oi la ka tuku atu ne ia ne mea ki a koutou?+ 13  E seai se tavini e mafai o pologa ki matai e tokolua, me ka takalialia a ia ki te tino e tokotasi kae alofa ki te suā tino, io me ka ‵piki a ia ki te tino e tokotasi kae e se fiafia ki te suā tino. E se mafai o tavini koutou ki te Atua fakatasi mo Koloa.”+ 14  Ne fakalogo‵logo a Falesaio, kolā ne tino matatupe, ki mea katoa konei, kae ne kamata o fakatauemu atu latou ki a ia.+ 15  Tenā ne fai atu ei a ia ki a latou: “A koutou ko tino kolā e fia amio‵tonu i mua o tino,+ kae e iloa ne te Atua a mea i otou loto.+ Me i te mea telā e fakatāua malosi ne tino se mea fakatakalialia i te kilokiloga a te Atua.+ 16  “Ne fakagalue eiloa te Tulafono mo tusitusiga a Pelofeta ke oko ki a Ioane. Mai te taimi tenā o fano ki mua ne folafola atu i ei a te tala ‵lei o te Malo o te Atua, kae ne kausaki malosi ki ei a tino kese‵kese katoa.+ 17  E tonu, e faigofie ke ‵galo atu te lagi mo te lalolagi i lō te galo atu o se mataimanu e tasi o te Tulafono kae seki fakataunu.+ 18  “So se tagata telā e ‵tala tena avaga kae e avaga ki se isi fafine e mulilua a ia, kae ko so se tagata e avaga ki se fafine telā ne ‵tala tena avaga ko mulilua foki a ia.+ 19  “E isi se tagata maumea ne pei sāle ki gatu violeta mo gatu lino, kae ne fiafia tou tagata i aso takitasi i se olaga gali. 20  E isi foki se tagata akai mea e igoa ki a Lasalo ne avatu sāle o tuku i te mataloa o te ‵pui o tena fale, kae ko ‵fonu eiloa i mea ‵pala 21  kae e manako o kai ki mea e ma‵tutu ifo mai te taipola a te tagata maumea. E tonu, ne olo atu foki a kuli o aleale ana mea ‵pala. 22  Fakamuli ifo, ne mate a te tagata akai mea kae ne ave ne agelu ki te feitu o Apelaamo.* “Ne mate foki te tagata maumea kae ne tanu a ia. 23  Kae ne kilo aka ana mata mai te Tanuga,* kae ko oko eiloa i te puapuaga, kae ne lavea ne ia Apelaamo i se koga ‵mao mo Lasalo i tena feitu.* 24  Ne kalaga atu a ia kae fai atu, ‘Toku tamana ko Apelaamo, alofa mai ki a au, kae uga mai a Lasalo ke ufi te mata o tena matikao lima ki te vai ke faka‵moko aka toku alelo, i a au ko tigaina i te ‵vela o te afi tenei.’ 25  Kae ne fai atu Apelaamo, ‘Taku tama, ke masaua me ne maua ne koe a mea ‵lei katoa i tou olaga kātoa, kae ne maua ne Lasalo a mea ma‵sei. Kae nei la, ko maua ne ia se olaga fakamafanafana i konei kae ko koe ko tigaina. 26  Kae i tafa o mea katoa konei, ko oti ne fakatu se vanu lasi i te va o māua mo koutou, ko te mea ke se mafai o olo atu a tino kolā e fia olo atu mai konei ki a koutou, kae e se mafai foki o ‵mai a tino mai konā ki a māua.’ 27  Ne fai atu a te tagata maumea, ‘I te feitu tenā, e fakamolemole atu au, e te tamana, ke uga atu a Lasalo ki te fale o toku tamana, 28  me e tokolima oku taina i ei, ko te mea ke tuku atu ne ia se molimau maea ki a latou ke se ‵to mai foki latou ki te koga o puapuaga tenei.’ 29  Kae ne fai atu Apelaamo, ‘A latou e ‵nofo mo Mose mo te kau Pelofeta; e ‵tau mo latou o faka‵logo ki ei.’+ 30  Kae ne fai atu a ia, ‘Ikai, e te tamana ko Apelaamo, kafai e uga atu se tino mai i tino ‵mate ki a latou, ko sala‵mo ei latou.’ 31  Kae ne fai atu Apelaamo ki a ia, ‘Kafai e se faka‵logo latou ki a Mose+ mo te kau Pelofeta, ka se tali‵tonu foki latou māfai e fakatu aka se tino mai te mate.’”

Fakamatalaga mai lalo

Io me “pule o tavini.”
Eleni, “e 100 paita.” A te paita e tasi e nofo pelā ki se 6 kalone. Onoono ki te MF E14.
Io me “Se selau koli.” A te koli e tasi e ‵pau mo te 220 L. Onoono ki te MF E14.
Eleni, “ki fatafata o Apelaamo.”
Io me “Heitisi,” telā ko te tanuga masani o tino. Onoono ki te FP.
Eleni, “i ana fatafata.”