Te Tusi a Luka 14:1-35

  • Ne faka‵lei aka te tagata e maua ne te masaki fula‵fula i te Sapati (1-6)

  • Ke fai mo tino ‵kami loto maulalo (7-11)

  • ‵Kami mai a tino kolā e se mafai o toe taui atu ki a koe (12-14)

  • Tala fakatusa ki tino ‵kami kolā ne fulitua atu (15-24)

  • Mea faiga‵ta e maua ne soko (25-33)

  • Masima telā ko galo tena malosi (34, 35)

14  I te suā taimi ne fano ei a ia o kai i te fale o se takitaki e tokotasi o te kau Falesaio i te Sapati, kae ne lamalama ne latou a ia.  Kae kiloke! ne nofo atu i ana mua se tagata e maua ne te masaki fula‵fula.  Tenā ne fesili atu ei a Iesu ki a latou kolā e ‵poto i te Tulafono mo Falesaio: “E a, e saoloto i te tulafono ke faka‵lei a masaki i te Sapati me ikai?”+  Kae ne seki tali atu latou. Ne puke a ia ki te tagata tenā, faka‵lei ne ia kae uga atu ke fano.  Tenā ne fai atu ei a ia ki a latou: “Ko oi te tino i a koutou, kafai e tō sena tama io me sena pulumakau ki loto i te vaikeli+ i te Sapati e se ‵futi fakavave aka ne ia ki luga?”+  Kae ne seki mafai ne latou o tali te mea tenei.  Ne fai atu ne ia se tala fakatusa ki tāgata kolā ne ‵kami, i te laveaga ne ia me ko filifili ne latou a toe nofoga tāua mō latou.+ Ana muna ki a latou:  “Kafai e ‵kami koe ne se tino ki se ‵kaiga o se avaga, sa nofo i te ‵toe nofoga tāua.+ Kāti e isi se tino telā e lauiloa atu i a koe ko oti foki ne ‵kami ne ia.  Tenā ko vau ei a te tino telā ne ‵kami ne ia koulua kae fai atu ki a koe, ‘Tuku tou nofoga ki te tagata tenei.’ Ko fano ei koe mo te masiasi o nofo i te ‵toe nofoga sē taulia. 10  Kae kafai koe e ‵kami, fano o nofo i te ‵toe nofoga sē taulia, ko te mea kafai e vau te tino ne ‵kami ne ia koe ka fai atu ki a koe, ‘Toku taugasoa, fano o nofo i se nofoga tai maluga atu.’ Ko fakaaloalogina ei koe i mua o tino ‵kami katoa.+ 11  Me ko so se tino e fakamaluga ne ia a ia eiloa ka fakamalalogina, kae ko so se tino e fakamalalo ne ia a ia eiloa ka fakamalugagina.”+ 12  Ne fai atu foki a ia ki te tagata telā ne ‵kami ne ia a ia: “Kafai e fai sau ‵kaiga i te tutonu io me ko te afiafi, sa ‵kamigina ou taugasoa io me ko ou taina io me ko ou kāiga io me ko ou tuakoi mau‵mea. I te mea ma ‵kami foki ne latou koe i se taimi ke toe taui atu ki a koe. 13  Kae kafai e fai sau ‵kaiga, ‵kami mai a tino ma‵tiva, tino ‵pili, tino vae ma‵sei, mo tino ‵kivi;+ 14  kae ka fiafia eiloa koe, me e seai ne olotou mea ke toe taui atu ki a koe. Me ka toe taui atu eiloa ki a koe i te taimi e toe‵tu+ aka ei a tino amio‵tonu.” 15  I te lagonaga ne se tino ‵kami a mea konei, fai atu ei ki a Iesu: “E fiafia a te tino telā ka kai* i te Malo o te Atua.” 16  Ne fai atu a Iesu ki a ia: “Ne fai ne se tagata se ‵kaiga lasi i te afiafi,+ kae ne ‵kami ne ia a tino e tokouke. 17  Ne uga atu ne ia tena pologa i te itula o te ‵kaiga i te afiafi ke fai atu ki tino ‵kami, ‘O‵mai, me ko toka nei a mea katoa.’ 18  Kae ne kamata a latou katoa o fai olotou fakamasakoga.+ Ne fai atu te tino muamua ki a ia, ‘Ne ‵togi ne au se manafa kae e ‵tau o fano au o onoono ki ei; au e fakamolemole atu i a au ko se oko atu.’ 19  Kae ne fai atu te suā tino, ‘Ne ‵togi ne au a pulumakau e sefulu kae ka fano au o iloilo aka latou. Au e fakamolemole atu i a au ko se oko atu.’+ 20  Kae ne fai atu foki te suā tino, ‘Au ne fatoa avaga kae ona ko te pogai tenei ko se mafai ei ne au o fanatu.’ 21  Tenā ne fanatu ei te pologa kae fakaasi atu a mea katoa konei ki tena matai. Ne kaitaua te matai o te fale kae fai atu ki tena pologa. ‘Fano fakavave nei eiloa i loto i auala ‵lasi mo auala fo‵liki o te fakai kae aumai ki konei a tino ma‵tiva, mo tino ‵pili mo tino ‵kivi mo tino vae ma‵sei.’ 22  Fakamuli ifo, fai atu ei te pologa, ‘Te matai, ko oti ne fai te mea telā ne fakatonu mai ne koe, kae e seki ‵fonu te fale.’ 23  Ne fai atu te matai ki tena pologa, ‘Fano ki auala katoa mo tamā auala, kae fakamalosi atu latou ke o‵mai ki loto ko te mea ke ‵fonu toku fale.+ 24  Me e fai atu au ki a koutou, e seai eiloa se tino i a latou kolā ne ‵kami ka tami ki aku meakai i te afiafi tenei.’”+ 25  E tokouke ‵ki a tino ne faima‵laga fakatasi mo ia, kae ne mafuli aka tou tagata kae fai atu ki a latou: 26  “So se tino e vau ki a au kae e se takalialia ki tena tamana mo tena mātua mo tena avaga mo ana tama‵liki mo ana taina mo ana tuagane, ke oko foki eiloa ki tena ola,+ e se mafai o fai te tino tenā mo oku soko.+ 27  So se tino telā e se amo tena pou fakasaua* kae tautali mai i a au e se mafai o fai mo oku soko.+ 28  E pelā mo te mea tenei, ko oi te tino i a koutou e manako o fakatu se taoa kae e se nofo muamua ki lalo o galue tena ‵togi, ke iloa aka me e lava ana tupe ke fakaoti tena galuega? 29  Me kafai e se fai penā, ka fakatakato fua ne ia te fakavae kae ka se mafai ne ia o fakaoti, kae ka fakatauemu atu ki a ia a tino katoa, 30  olotou muna: ‘Ne kamata ne te tagata tenei tena galuega kae ko se mafai ne ia o fakaoti.’ 31  Io me ko oi te tupu e fanatu o taua ki se isi tupu e se sagasaga muamua ki lalo o mafaufau me e mafai ne ia mo tena kautau e toko 10,000 o fakafesagai ki te suā tupu telā e taua mai ki a ia mo tena kautau e toko 20,000? 32  Kae kafai e se mafai ne ia, e uga atu ne ia ana sui a koi tai ‵mao te tupu tenā kae fakamolemole atu ke maua se filemu. 33  I se auala tai ‵pau, e mafai o mautinoa i a koe, me e seai se tino i a koutou e se fakatofa atu ki* ana mea katoa e mafai o fai mo oku soko.+ 34  “E mautinoa eiloa me e ‵lei te masima. Kae kafai ko galo te malosi o te masima, se a la te mea e mafai o toe faka‵kona ki ei?+ 35  Ko se aoga ei ki te laukele io me ko kaiao. E ‵pei fua ne tino kea‵tea. A te tino telā e isi ne ana taliga, ke na fakalogo la ki ei.”+

Fakamatalaga mai lalo

Eleni, “kai ki falaoa.”
Onoono ki te FP.
Io me “tiaki.”