Te Tusi a Luka 13:1-35

  • Salamō io me fakaseai atu (1-5)

  • Te tala fakatusa ki te mati sē fua (6-9)

  • Ne faka‵lei aka se fafine masaki i te Sapati (10-17)

  • Tala fakatusa ki te fuaga o te sinapi mo te mea faka‵fete (18-21)

  • E manakogina taumafaiga ke ulu atu i te mataloa mataliki (22-30)

  • Helota, “te alope tenā” (31-33)

  • Ko tagi fanoanoa Iesu ona ko Ielusalema (34, 35)

13  I te taimi tenā, ne fakailoa atu ne nisi tino kolā ne ‵nofo i konā ki a Iesu, e uiga ki tino Kalilaia kolā ne palu fakatasi ne Pilato olotou toto mo olotou taulaga.  Ne tali atu a ia ki a latou: “I te otou faka‵tau a tino Kalilaia konā e uke atu olotou agasala i lō nisi tino Kalilaia katoa me ne ‵tupu ki a latou a mea konei?  Ikai, au e fai atu ki a koutou; ka fakaseai atu foki penā a koutou katoa seiloga ke sala‵mo koutou.+  Io me mafau‵fau koutou me e sili atu te uke o agasala a te toko 18 kolā ne siga ki ei te taoa i Siloama, kae ‵mate, i lō nisi tino katoa kolā ne ‵nofo i Ielusalema?  Ikai, au e fai atu ki a koutou, ka fakaseai atu foki a koutou katoa e pelā mo latou, seiloga ke sala‵mo koutou.”  Ne fai atu ne ia te tala fakatusa tenei: “Ne ‵toki ne se tagata a te lakau ko te mati i tena togavine, fanatu ei o onoono me e isi ne fuaga i luga i ei, kae e seai ne ana mea ne maua.+  Tenā ne fai atu ei a ia ki te tino galue i te togavine, ‘Ko tolu nei tausaga ne vau ei au o onoono me e isi ne fuaga i luga i te mati tenei, kae e seai eiloa. ‵Kati ki lalo! Kaia e fakamāumāu ei ne ia te laukele?’  Ne tali atu ei a ia: ‘Te Matai, tuku penā i te tausaga tenei ke keli fakatamilo ne au se lua i ei kae ‵fao atu ki kaiao.  Kafai e fua mai i se taimi mai mua ko ‵lei ei; kae kafai e se fua mai, ko ‵kati ei ki lalo.’”+ 10  Ne akoako atu a ia i se sunako e tasi i te Sapati. 11  Kae kiloke! e isi se fafine i konā ne masaki i tausaga e 18 ona ko te agaga masei. Ko makau a ia kae ko se mafai o tu ‵tonu ki luga. 12  I te laveaga ne Iesu tou fafine, faipati atu ei ki a ia, ana muna: “Te fafine, ko fakasaoloto koe mai tou masaki.”+ 13  Ne tuku atu ana lima ki luga i a ia kae se mea vave eiloa o tu ‵tonu tou fafine, kamata ei o tavae atu ki te Atua. 14  Ne kaitaua te ofisa tausi o te sunako me ne fai ne Iesu te faka‵leiga tenā i te Sapati, fai atu ei a ia ki te vaitino: “E ono aso e ‵tau o fai i ei a galuega,+ tela la, o‵mai ke faka‵lei koutou i aso konā kae e se ko te Sapati.”+ 15  Kae ne tali atu te Aliki ki a ia: “A koutou ne tino ‵loi,+ e a, e se ‵tala ne tino taki tokotasi i a koutou tena pulumakau io me se asini kae ‵taki atu o fainu i te Sapati?+ 16  E a, e se ‵tau mo te fafine tenei, ko te tama fafine a Apelaamo, telā ne saisai ne Satani i tausaga e 18 o fakasaoloto mai te saisaiga tenei i te Sapati?” 17  I te faiatuga ne ia o pati konei, ne masiasi ei ana tino ‵teke katoa, kae ne kamata o fia‵fia te vaitino i mea fakaofoofogia kolā ne fai ne ia.+ 18  Tela la, ne fai aka ei ana muna penei: “Ka fai pefea a te Malo o te Atua, kae se a te mea e mafai o fakatusa ne au ki ei? 19  E fai pelā me se fuaga o te sinapi telā ne puke ne se tagata kae ‵toki i tena fatoaga, ne ola aka ke fai mo fai se lakau lasi, kae ne fai a ofaga o manu eva o te lagi i luga i ana kaula.”+ 20  Ne toe fai aka a ia penei: “Se a te mea e mafai o fakatusa ne au ki ei a te Malo o te Atua? 21  E pelā mo te mea faka‵fete telā ne puke ne se fafine kae palu fakatasi mo palugā* falaoa ‵lasi e tolu ke oko ki te taimi ne ‵fete ei te paluga kātoa.”+ 22  Kae ne faimalaga atu a ia mai i fakai ‵lasi ki fakai ‵lasi mo fakai fo‵liki ki fakai fo‵liki, kae akoako atu i tena auala ki Ielusalema. 23  Ne fai atu se tagata ki a ia: “Te Aliki, e a, e mu‵tana fua a tino ka ‵sao?” Ne fai atu a ia ki a latou: 24  “Fakapalele otou mafi ke ulu atu koutou i te mataloa mataliki.+ Au e fai atu ki a koutou me e tokouke a tino ka taumafai o ulu ki loto i ei kae e se mafai. 25  Kafai e tu aka te tino i o ia te fale o ‵loka te mataloa, a koutou ka ‵tu i tua o tukituki i te mataloa kae fai atu, ‘Te Aliki, ‵tala mai aka ki a matou.’+ Kae ka tali atu a ia ki a koutou: ‘E se iloa ne au te koga ne o‵mai ei koutou.’ 26  Tenā ka fai aka ei koutou, ‘A matou ne ‵kai kae inu i ou mua, kae ko koe ne akoako atu i omotou auala.’+ 27  Kae ka fai atu a ia ki a koutou, ‘E se iloa ne au te koga ne o‵mai ei koutou. Olo kea‵tea mai i a au, koutou tino sē amio‵tonu!’ 28  Kafai ko lavea ne koutou a Apelaamo, Isaako, Iakopo mo pelofeta katoa i te Malo o te Atua, kae ko ‵pei koutou ki tua, tenā eiloa te koga ka ‵tagi mautuutu kae ū otou nifo i ei.+ 29  E se gata i ei, ka o‵mai a tino mai saegala mo togala mo mātū mo saute kae ka saga‵saga i te taipola i te Malo o te Atua. 30  Kae kiloke! a latou kolā ne fakamuli ka ‵mua, kae ko latou kolā ne ‵mua ka fakamuli.”+ 31  Ko te itula eiloa tenā, ne olo atu ei a nisi Falesaio ki a ia, kae fai atu: “Fano kea‵tea mai konei, me i a Helota e manako o tamate koe.” 32  Kae ne fai atu a ia ki a latou: “Olo o fai ki te alope tenā, ‘Kiloke! E afuli ne au a temoni kae faka‵lei a tino i te aso nei mo te aso taeao, kae i te tolu o aso ko oti ei au.’ 33  E tiga te feitu tenā, au ka fano eiloa kea‵tea i te aso nei, te aso taeao, mo te aso mai tua ifo i ei me e seai se pelofeta e talia ke tamate i tua o Ielusalema.+ 34  Ielusalema, Ielusalema, ne tamate ne koe a pelofeta kae peipei ki fatu a tino kolā ne uga atu ki a koe.+ Ko oko eiloa i te uke o taimi ne manako ei au o fakamaopoopo mai au tama‵liki e pelā me se moa fafine e fakamaopoopo mai ne ia ana punua moa ki lalo i ana kapakau! Kae ne seki ma‵nako koutou ki ei.+ 35  Kiloke! A te otou fale ka tuku tiaki atu ki a koutou.+ Au e fai atu ki a koutou, ka se toe mafai o lavea ne koutou au ke oko ki te taimi e fai aka ei koutou penei: ‘Ke manuia a te tino telā e vau i te igoa o Ieova!’”*+

Fakamatalaga mai lalo

Eleni, “sea.” A te sea e ‵pau mo te 7.33 L. Onoono ki te MF E14.
Onoono ki te MF A5.