Te Tusi a Luka 12:1-59

  • Mea faka‵fete a te kau Falesaio (1-3)

  • Mataku ki te Atua, kae e se ko tāgata (4-7)

  • Te tāua o te ‵kau fakatasi mo Keliso (8-12)

  • Te tala fakatusa ki te tagata maumea kae valea (13-21)

  • Ko lava te manava‵se (22-34)

    • Te lafu mamoe foliki (32)

  • Ke matapula‵pula (35-40)

  • Te situati fakamaoni mo te situati sē fakamaoni (41-48)

  • E se ko te filemu, kae ko mavae‵vaega (49-53)

  • E ‵tau o iloilo aka a mea ko ‵tupu i te taimi nei (54-56)

  • Faka‵leiga o va ma‵sei (57-59)

12  I te taimi tenā, ne mumu atu te fia afe o tino kae fakatauteke atu i konā, ne faipati muamua atu ei a ia ki ana soko: “Fakaeteete koutou i te mea faka‵fete a te kau Falesaio, telā ko te fia amiotonu.+  Me e seai se mea e ufi faka‵lei ka se fakaasi mai kae e seai foki se mea ‵funa ka se iloa.+  Tela la, so se mea e faipati ne koutou i te pouliga ka lagona eiloa i te mainaga, kae ko mea e musumusu i otou potu ka folafola atu eiloa mai luga i tuafale.  E se gata i ei, au e fai atu ki a koutou e oku taugasoa,+ sa ma‵taku ki a latou kolā e tamate ne latou te foitino kae oti aka ko se mafai ei ne latou o fai se isi mea.+  Kae ka fakaasi atu ne au ki a koutou te tino telā e ‵tau o ma‵taku ki ei: Ma‵taku ki te Atua telā e nofo mo te malosi ke ‵pei atu koutou ki loto i Kena,*+ māfai ko oti ne tamate ne ia koutou. E tonu, au e fai atu ki a koutou, ma‵taku ki te Atua tenei.+  E lima manu eva fo‵liki e mafai o ‵togi ki tupe fo‵liki e lua, i ne? Kae e se mafai o puli i te Atua se manu e tasi i a latou.+  Kae ke oko eiloa ki laulu i otou ulu ko oti katoa ne lau.+ Sa ma‵taku; e sili atu te tāua o koutou i lō manu eva fo‵liki e uke.+  “Au e fai atu ki a koutou, so se tino e taku atu ne ia i mua o tino me e iloa ne ia au,+ ka taku atu foki ne te Tama a te tagata me e iloa ne ia a ia i mua o agelu a te Atua.+  Kae ko so se tino e fakafiti ne ia au i mua o tino ka fakafiti foki ne au a ia i mua o agelu a te Atua.+ 10  Kae ko so se tino e fai sena pati sē ‵lei ki te Tama a te tagata ka fakamagalo a ia, kae ko so se tino e muna masei ki te agaga tapu ka se fakamagalogina.+ 11  Kafai e ave ne latou koutou ki mua o fono a te fenua,* ofisa o te malo mo pule, sa manava‵se ki te auala ka fai‵pati ei koutou mo otou pati ka fai e ‵pulu ei koutou,+ 12  me ka akoako atu ne te agaga tapu i te itula eiloa tenā a pati e ‵tau o fai ne koutou.”+ 13  Kae ne fai atu se tino i te vaitino ki a ia: “Te Faiakoga, fai aka ki toku taina ke ‵vae aka te mā tofi.” 14  Muna a Iesu ki a ia: “Toku tagata, ko oi ne ‵tofi ne ia au mo fai te famasino io me se tino ke ‵vae ne au a mea i te va o koulua?” 15  Tenā ne fai atu ei a Iesu ki a latou: “Ke matapula‵pula koutou kae fakaeteete i vaega katoa o te kaimanako,+ me faitalia te uke o mea a se tino kae e se maua mai i ei ne ia a te ola.”+ 16  Ne fai atu ne ia se tala fakatusa ki a latou, ana muna: “Ne fua ‵lei te manafa o te tagata maumea e tokotasi. 17  Ne mafaufau ifo tou tagata, ‘Ne a nei aku mea ka fai me ko seai se koga mo tuku aku fuagalakau?’ 18  Ne fai aka ei a ia, ‘Ka fai ne au te mea tenei:+ Ka lepe ne au ki lalo oku fale koloa kae ka faka‵tu ne au a fale e ‵lasi atu. Ka fakaputu ne au i ei aku fuagalakau mo aku mea ‵lei katoa, 19  kae ka fai ifo au ki a au eiloa: “Ko uke a mea ‵lei ne fakaputu aka ne koe mō tausaga e uke; faifai malie la au mea, kai, inu, kae fiafia.”’ 20  Kae ne fai atu te Atua ki a ia, ‘Te tagata valea, ko te po eiloa tenei ka ave kea‵tea ei ne latou tou ola mai i a koe. Ko oi la ka puke ma ia a mea kolā ne fakaputu ne koe?’+ 21  Tenā eiloa te mea ka tupu ki te tino telā e fakaputu koloa mō ia eiloa kae e se maumea i mua o te Atua.”+ 22  Ne fai atu a ia ki ana soko: “Tenā te pogai e fai atu ei au ki a koutou, ko lava te manava‵se ki otou ola ki mea ka ‵kai ei koutou io me ki otou foitino ki gatu ka ‵pei ei koutou.+ 23  Me e tāua fakafia atu te ola i lō meakai mo te foitino i lō gatu. 24  Ke mafaufau ki leveni: E se ‵toki fuaga io me e tau fuaga, e seai foki ne olotou fale koloa; kae e fagai eiloa latou ne te Atua.+ E a, e se sili atu la te tāua o koutou i lō manu eva?+ 25  Ko oi i a koutou konā, e mafai o fakaopoopo ne ia se kupita* ki tena ola ona ko te manavase? 26  Tela la, kafai e se mafai ne koutou o fai se mea foliki penei, kaia la e manava‵se ei koutou ki te ‵toega o mea?+ 27  Ke mafaufau ki te auala e ola ei a lili o te vao: E se ga‵lue io me e ‵laga gatu; kae e fai atu au ki a koutou ke oko foki eiloa ki a Solomona i tena ‵malu katoatoa ne seki pei eiloa ki se gatu gali e penei mo se pulalakau e tasi i pulalakau konei.+ 28  Tela la, kafai tenei te auala e fakalavalava ei ne te Atua a lakau o te vao kolā e ola mai i te aso nei kae taeao ko ‵pei ki loto i se ogaumu, e sili atu la te fakalavalava o koutou ne ia, koutou kolā e fo‵liki te otou fakatuanaki! 29  Tela la, ko lava te ‵sala ki mea ka ‵kai ei koutou mo mea ka inu ei koutou, kae ko lava te sona manava‵se;+ 30  me i mea katoa konei ko mea e ‵sala malosi ki ei a fenua o te lalolagi, kae e iloa ne te otou Tamana me ma‵nako koutou ki mea konei.+ 31  Tela la, ke tumau i te ‵sala ki tena Malo, kae ka fakaopoopo atu a mea konei ki a koutou.+ 32  “Sa ma‵taku, e taku lafu mamoe foliki,+ me ko oti ne talia ne te otou Tamana ke tuku atu ki a koutou a te Malo.+ 33  Fakatau atu otou mea kae tuku atu e pelā me ne meaalofa.*+ Fai ne otou taga tupe kolā e se mafai o ma‵sei, ko te koloa tāua o te lagi telā e se mafai o pala,+ e se oko atu ki ei se tino kaisoa kae se katia foki ne manu. 34  Me ko te koga e tuku i ei otou koloa, e tuku foki i ei otou loto. 35  “‵Pei otou gatu kae ke toka+ koutou kae ke ‵ka otou moli,+ 36  kae ke fai koutou e pelā mo tino e fakatali‵tali ki te foki mai o te lotou matai+ mai i te fakaipoipoga+ me kafai ko oko mai kae tukituki mai e ‵tala fakavave atu ne latou te mataloa ki a ia. 37  Ka fia‵fia eiloa a tavini konā māfai e maua atu latou ne te lotou pule e ala faeloa i te taimi e vau ei a ia! Au e fai ‵tonu atu ki a koutou, ka pei ana gatu* mō te taviniga kae fakasaga‵saga ne ia latou i te taipola kae ka vau i olotou feitu o tavini atu ki a latou. 38  Ka fia‵fia eiloa latou māfai e vau a ia i te lua o ‵tuga,* io me ko te tolu o ‵tuga,* kae maua atu ne ia a latou e toka. 39  Ke iloa ne koutou a te mea tenei, moi fai e iloa ne te tino i te fale a te itula e vau ei te tino kaisoa, ka se talia ne ia ke ulu mai te tino kaisoa ki loto i tena fale.+ 40  E ‵tau foki mo koutou o toka faeloa, me i te Tama a te tagata e vau i te itula telā ne seki mafau‵fau koutou ki ei.”+ 41  Tenā ne fai atu ei a Petelu ki a ia: “Te Aliki, a tau tala fakatusa tenā e fai mai fua ki a matou io me e fai atu foki ki tino katoa?” 42  Kae ne fai atu te Aliki: “Ko oi eiloa te situati* fakamaoni, ko te tino poto telā ka fakasopo ne tena Matai ke pule i luga i tena kau tavini ke tuku atu faeloa ne ia ki a latou olotou meakai i te taimi tonu?+ 43  Ka fiafia eiloa te tavini tenā māfai e vau tena matai kae e maua atu me e fai eiloa ne ia te mea tenā. 44  Au e fai ‵tonu atu ki a koutou, ka fakasopo eiloa ne ia a te tavini tenā ke pule i ana mea katoa. 45  Kae kafai e fai ifo te tavini tenā i tena loto, ‘Ko tuai mai toku matai,’ kae kamata o ‵ta ne ia a tavini tāgata mo tavini fāfine; kae kai, kae inu kae konā,+ 46  ka vau eiloa te matai o te tavini tenā i te aso telā e seki fakatalitali a ia ki ei mo te itula telā e se iloa ne ia, kae ka fakasala ne ia ki te ‵toe sala ‵mafa eiloa kae tuku atu foki tena vaega fakatasi mo tino sē fakamaoni. 47  Kae ko te tavini telā ne malamalama i te loto o tena matai kae ne seki fakatoka, io me fai te mea ne fakamolemole atu ke fai ne ia, ka ‵kini ki ‵kini e uke.+ 48  Kae ko te tino telā ne seki malamalama kae ne fai ne ia a mea kolā e ‵tau o ‵kini a ia i ei ka mu‵tana ana ‵kini. E tonu, so se tino telā ne tuku atu ki ei a mea e uke, e manakogina foki a mea e uke mai i a ia. Kae ko te tino e tuku atu ke pule i mea e uke, ka uke foki a mea e manakogina mai i a ia.+ 49  “Au ne vau o faka‵ka te afi i te lalolagi, kae ne a la nisi mea e manako au ki ei māfai ko oti ne faka‵ka te afi? 50  E tonu, e isi se papatisoga telā ka papatiso au ki ei, kae ko oko eiloa i toku mafatia ke oko ki te taimi e oti ei!+ 51  E mata, ne mafau‵fau koutou i a au ne vau o aumai te filemu ki te lalolagi? Ikai, au e fai atu ki a koutou, au ne vau o aumai a mavae‵vaega.+ 52  Me e kamata i te taimi nei o fano ki mua ka ‵nofo mavae‵vae a tino e tokolima kolā e ‵nofo i te fale e tasi. E ‵teke atu te tokotolu ki te tokolua kae ko te tokolua ki te tokotolu. 53  Ka mavae‵vae eiloa latou, ko te tamana e ‵teke atu ki tena tama tagata kae ko te tama tagata e ‵teke atu ki tena tamana, ko te mātua e ‵teke atu ki tena tama fafine kae ko te tama fafine e ‵teke atu ki tena mātua, te mātua e ‵teke atu ki te avaga a tena tama tagata kae ko te avaga a tena tama tagata e ‵teke atu ki te mātua o tena avaga.”+ 54  Ne toe fai atu foki a ia ki te vaitino: “Kafai e lavea ne koutou se kaumana e fanaka i te feitu ki togala, se mea vave eiloa o fai mai koutou, ‘Ka poko te kaumatagi,’ kae e fai eiloa penā. 55  Kae kafai e lavea ne koutou me ko agi te matagi mai saute, e fai mai koutou, ‘Ka ‵vela te aso,’ kae ka taunu eiloa. 56  A koutou ne tino ‵loi, e iloa ne koutou o fakamatala a foliga o te lalolagi mo te lagi, kae kaia e se iloa ei ne koutou te uiga o mea kolā ko ‵tupu i te taimi fakapito tenei?+ 57  Kaia foki la e se fakamasino ifo ei a koutou ki a koutou eiloa me se a te mea tonu? 58  E pelā mo te mea tenei, kafai e olo koulua ki se tino pule mo te tino telā ne fai tena tagi ki a koe, ke na galue o faka‵lei te kinauga a koulua a koi olo atu koulua i te auala, ko te mea ke se ave ne ia koe ki mua o te famasino kae ko te famasino ki te ofisa o te fono, kae ko te ofisa o te fono ka ‵pei ne ia koe ki te falepuipui.+ 59  Au e fai atu ki a koe, ka se mafai lele eiloa o ‵tala koe ki tua seiloga ke oti ne ‵togi atu ne koe au tupe katoa.”

Fakamatalaga mai lalo

Onoono ki te FP.
Io me “ki sunako.”
Onoono ki te MF E14.
Io me “meaalofa ki tino ma‵tiva.” Onoono ki te FP.
Eleni, “e ‵sai ana kona.”
Kāti mai te 9:00 i te po ke oko ki te valuapo.
Mai te valuapo ke oko ki te 3:00 i te vaveao.
Io me “pule o te fale.”