Te Tusi a Luka 1:1-80

  • Te tusi ki a Teofilo (1-4)

  • Ko ‵valo mai ne Kapilielu te fanaumaiga o Ioane te Papatiso (5-25)

  • Ko ‵valo mai ne Kapilielu te fanaumaiga o Iesu (26-38)

  • Ko āsi atu Malia ki a Elisapeta (39-45)

  • Ko tavae ne Malia a Ieova (46-56)

  • Te fanauga mo te fakaigoaga o Ioane (57-66)

  • Te valoaga a Sakalia (67-80)

1  I te lavea atu me e tokouke a tino ne taumafai o tusi se tala o mea ‵tonu ne ‵tupu kolā e tali‵tonu katoatoa tatou ki ei,+  e pelā eiloa mo te tukumaiga o mea konei ki a tatou ne latou kolā ne molimau+ ki ei i te kamataga kae folafola atu ne latou te fekau,+  ne fakaiku aka ne au ke tusi atu ki a koe a mea konei i se fakasologa ‵lei, tou ‵malu sili, e Teofilo,+ ona ko te mea ko oti ne iloilo faka‵lei ne au a mea katoa mai te kamataga me e ‵tonu,  ko te mea ke iloa faka‵lei ne koe mo te mautinoa a mea kolā ko oti ne akoako atu ki a koe i pati.+  I aso o Helota,*+ te tupu o Iuta, ne isi se faitaulaga e igoa ki a Sakalia mai te potukau a Avia.+ A tena avaga se fafine mai te matakāiga o Alona, tena igoa ko Elisapeta.  A lāua ne tino amio‵tonu i mua o te Atua, ne sa‵sale eiloa lāua e ‵tusa mo fakatonuga mo tulafono katoa a Ieova.*  Kae e seai se lā tamaliki, ona ko Elisapeta e se afu, kae ko ma‵tua foki lāua.  I te okoga ki te taimi o te ‵tuga a tena potukau,+ ne tavini atu a ia e pelā me se faitaulaga i mua o te Atua,  kae e ‵tusa mo faifaiga masani fakafaitaulaga, ne oko atu ki tena taimi ke ofo atu a mea ma‵nogi+ māfai e ulu atu ki loto i te koga tapuaki o Ieova.*+ 10  Kae ko te vaitino kātoa ne ‵talo i tua i te itula ne ofo atu ei a mea ma‵nogi. 11  Ne fakasae atu ki a ia te agelu a Ieova,* e tu i te feitu fakaatamai o te fatafaitaulaga o mea ma‵nogi. 12  Kae ne manavase a Sakalia i te mea ne lavea ne ia, mataku ei tou tagata. 13  Kae ne fai atu te agelu ki a ia: “Sa mataku, e Sakalia, me ko oti ne lagona kae talia foki ne te Atua tau ‵talo, kae ko tau avaga ko Elisapeta ka fanau mai ne ia se tamaliki tagata ma koe, kae ka fakaigoa ne koe te tamaliki ki a Ioane.+ 14  Ka fiafia malosi koe ki ei, kae e tokouke foki a tino ka fia‵fia i te taimi e fanau mai ei a ia,+ 15  me ka fai a ia mo fai se tino sili i te kilokiloga a Ieova.*+ Kae e se ‵tau mo ia o inu ki uaina io me ko so se meainu malosi,+ kae ka ‵fonu a ia i te agaga tapu a koi tuai o fanau mai a ia,*+ 16  kae ka ‵fuli mai ne ia a fanau e tokouke a Isalaelu ki a Ieova* te lotou Atua.+ 17  Ka fanatu foki a ia i mua o te Atua mo te agaga mo te malosi o Elia,+ ke ‵fuli mai a loto o tamana ki olotou tama‵liki+ mo tino sē faka‵logo ki te poto o tino amio‵tonu,+ ko te mea ke fai ei a tino ke toka mō Ieova.”* 18  Ne fai atu a Sakalia ki te agelu: “E mafai pefea o talitonu au ki te mea tenei? Me i a au ko toeaina kae ko lomatua foki taku avaga.” 19  Ne tali atu a te agelu ki a ia: “Au ko Kapilielu,+ telā e tu pili i mua o te Atua,+ kae ko au ne uga mai ke faipati atu ki a koe kae ke folafola atu a te tala ‵lei tenei ki a koe. 20  Kae kiloke! A koe ka gūgū kae se mafai o faipati ke oko eiloa ki te aso e taunu ei a mea konei, ona ko koe e seki talitonu ki aku pati, kolā ka fakataunu eiloa i te taimi tonu.” 21  Ne faka‵tali faeloa a tino ki a Sakalia i te taimi tenā, kae ne manava‵se latou ona ko tena fui sae mai ki tua mo te koga tapuaki. 22  I tena ulumaiga ki tua, ne seki mafai ne ia o faipati atu ki a latou, iloa ei ne latou me ne lavea ne ia se mea fakaofoofogia* i loto i te koga tapuaki. Ne fai atu faeloa ne ia a tāga ki a latou me i a ia ko gūgū. 23  I te taimi ne oti ei tena taviniga ‵malu i te faletapu, foki ei a ia ki tena fale. 24  I nai aso fakamuli ifo, ne faitama tena avaga ko Elisapeta, kae ne seki tiaki eiloa ne ia tena fale mō se lima masina, ana muna: 25  “Tenei eiloa te auala ne saga mai ei a Ieova* ki a au i aso konei. Ko oti ne saga mai a ia ki a au o ave kea‵tea toku tulaga fakalumalumagina i mua o tāgata.”+ 26  I te taimi ko ono ei ana masina, ne uga mai ne te Atua a te agelu ko Kapilielu+ ki se fakai o Kalilaia e igoa ki a Nasaleta, 27  ki se tamafine ‵ma+ telā ko oti ne ‵sai feagaiga ke avaga mo se tagata e igoa ki a Iosefa mai te kāiga o Tavita, kae ko te igoa o te tamafine ‵ma tenā ko Malia.+ 28  I tena vauga ne fai atu te agelu ki tou fafine: “Talofa, a koe te tino tafasili i te taulia, e fakatasi atu eiloa a Ieova* ki a koe.” 29  Kae ne manavase malosi tou fafine i ana pati, kae taumafai ke malamalama a ia i te uiga o pati fakatalofa konei. 30  Fai atu ei te agelu ki a ia: “Sa mataku, e Malia, me ko oti koe ne talia ne te Atua. 31  Kae kiloke! a koe ka faitama kae ka fanau ne koe se tamaliki tagata,+ kae ke fakaigoa ne koe a ia ki a Iesu.+ 32  A ia tenei ka fai mo fai se tino sili+ kae ka taku a ia ko te Tama a te Atua Tafasili i te Maluga,+ kae ka tuku atu ne Ieova* te Atua ki a ia te nofogaaliki o Tavita, tena tamana,+ 33  kae ka pule a ia e pelā me se Tupu i te kāiga o Iakopo ki te se-gata-mai, kae ka seai se gataga o tena Malo.”+ 34  Kae ne fai atu a Malia ki te agelu: “E mafai pefea o tupu te mea tenei, me i a au e seki ‵moe fakatauavaga aka eiloa mo se tagata?”+ 35  Ne tali atu te agelu ki a ia: “Ka oko atu te agaga tapu ki luga i a koe,+ kae ka pulou a koe ne te ‵mana o te Atua Tafasili i te Maluga. Kae tenā eiloa te pogai ka taku ei te tamaliki telā ka fanau mai me e tapu,+ ko te Tama a te Atua.+ 36  Kae kiloke! A tou kāiga ko Elisapeta ko faitama foki kae ko lomatua eiloa a ia, kae ko ono nei ana masina, ko te fafine telā ne fai pelā me e se afu; 37  me e seai se folafolaga e se mafai ne te Atua o fai.”+ 38  Tenā ne fai atu ei a Malia: “Kiloke! Au ko te tamafine pologa a Ieova!* Ke oko mai eiloa te mea tenei ki a au e ‵tusa mo au pati.” Fano ei kea‵tea te agelu mai i a ia. 39  Tenā ne fakatoka ei a Malia i aso konā kae faimalaga fakavave atu ki te fenua maugā, ki se fakai o Iuta. 40  Ne ulu atu a ia ki te fale o Sakalia kae fakatalofa atu ki a Elisapeta. 41  I te taimi eiloa ne lagona ei ne Elisapeta te fakatalofa a Malia, kae gasue te pepe i loto i tena moegatama, kae ne ‵fonu a Elisapeta i te agaga tapu. 42  Ne kalaga atu a ia i se leo lasi: “Ke manuia koe i fāfine katoa, kae ke manuia foki a te tamaliki telā ka fanau mai ne koe! 43  Ne maua pefea ne au te tauliaga tenei, ke asiasi mai ki a au te mātua o toku Aliki? 44  Kae kiloke! I te lagonaga eiloa ne au tau fakatalofa, ko te mea eiloa ko gasue te pepe i toku moegatama mo te fiafia lasi. 45  Ka fiafia foki a te fafine telā e talitonu, me ka fakataunu katoatoa eiloa a mea kolā ne faipati atu ki a ia mai i a Ieova.”* 46  Kae ne fai atu a Malia: “E tavae ne au a Ieova,*+ 47  kae e se mafai o taofi ne au toku loto fiafia ki te Atua toku Fakaola,+ 48  me ko oti ne kilo ifo a ia ki te tulaga malalo o tena tamafine pologa.+ Kae kiloke! mai te taimi tenei o fano ki mua ka folafola atu ne kautama katoa i a au e fiafia,+ 49  me ko oti ne fai ne te Atua malosi katoatoa a mea fakaofoofogia mō au, kae ko tena igoa e ‵malu,+ 50  kae ke i luga i tino kolā e ma‵taku ki a ia tena alofa fakamagalo mai te kautama e tasi ki te suā kautama.+ 51  Ko oti ne fai ne ia a galuega ‵mana ki ana lima; kae fakasalalau valevale ne ia a latou kolā e loto fakamaua‵luga.+ 52  Ko oti ne tuku ifo ne ia ki lalo a tāgata takutakua mai i nofogaaliki+ kae fakama‵luga aka a tino ma‵lalo;+ 53  ko oti ne fagai ne ia a tino fia‵kai ke ma‵kona i mea ‵lei+ kae afuli kea‵tea ne ia a tino mau‵mea e aunoa mo ne mea. 54  Ko oti ne vau a ia o fesoasoani ki tena tavini, ko Isalaelu, ke masaua ne latou tena alofa fakamagalo+ 55  ki te se-gata-mai e pelā eiloa mo ana pati ki ‵tou tupuga, ki a Apelaamo mo tena tama.”+ 56  Ne ‵nofo lāua mo Malia kāti i masina e tolu, toe foki ei tou fafine ki tena fale. 57  Ne oko atu ki te taimi ko fanau ei a Elisapeta, kae ne fanau ne ia se tamaliki tagata. 58  Ne ‵logo a tuakoi mo ana kāiga me ko oti ne fakaasi atu ne Ieova* te lasi o tena alofa fakamagalo ki tou fafine, kae ne fia‵fia fakatasi latou mo ia.+ 59  I te valu o aso ne olo atu ei latou ke pilitome te tamaliki,+ kae ke fakaigoa ne latou te tamaliki ki te igoa o tena tamana ko Sakalia. 60  Kae ne tali atu tena mātua: “Ikai! ka fakaigoa a ia ki a Ioane.” 61  Ne fai atu latou ki tou fafine: “E seai se tino i ou kāiga e fakaigoa ki te igoa tenā.” 62  Ne olo atu latou o fesili ki tena tamana i te faiga o tāga me ko oi te igoa e manako a ia ki ei. 63  Ne fakamolemole atu a ia ke tuku mai se potu laupapa kae tusi atu i ei: “A tena igoa ko Ioane.”+ Ne ofo a latou katoa i te mea tenei. 64  I konā eiloa ne fakamaga tena gutu kae matala tena alelo, kamata ei o faipati+ kae tavae atu ki te Atua. 65  Kae ne ma‵taku a latou katoa kolā ne ‵nofo ‵pili atu ki a lāua, kae ne ‵pa atu eiloa te tala o mea katoa konei i kogā koga maugā o Iuta kātoa. 66  Kae ko tino kolā ne ‵logo i te mea tenei ne fakamau katoa ne latou a mea konei i olotou loto, kae fai atu: “Se a te tulaga ka oko ki ei te tamaliki tenei?” Me e manino ‵lei i a Ieova* e fakatasi atu ki a ia. 67  Ne ‵fonu tena tamana ko Sakalia i te agaga tapu, kae ne ‵valo mai tou tagata, ana muna: 68  “Ke vikia a Ieova,* te Atua o Isalaelu,+ me ko oti ne saga atu a ia ki ana tino o faka‵sao latou.+ 69  Kae ko oti ne fakatu aka ne ia se sau o te fakaolataga*+ mō tatou mai i te kāiga o Tavita tena tavini,+ 70  e pelā eiloa mo ana pati ne fai e auala i gutu o ana pelofeta ‵malu i aso ko ‵teka,+ 71  e uiga ki te faka‵saoga o tatou mai i ‵tou fili e pelā foki mo lima o tino katoa kolā e takalia‵lia ki a tatou;+ 72  ke fakaasi atu te alofa fakamagalo e uiga ki ‵tou tupuga kae ke masaua tena feagaiga tapu,+ 73  ko te feagaiga telā ne tauto ei a ia ki a Apelaamo te ‵tou tupuga,+ 74  ke tuku mai ki a tatou te tauliaga ke avatu ne tatou te taviniga tapu ki a ia e aunoa mo te ma‵taku, māfai ko oti ne faka‵sao tatou mai lima o ‵tou fili, 75  fakatasi mo te fakamaoni mo te amiotonu i ana mua i ‵tou aso katoa. 76  Kae e pelā mo koe, e te tamaliki foliki, a koe ka fakaigoa ki te pelofeta a te Atua Tafasili i te Maluga, me ka mua atu koe i a Ieova* o fakatoka tena auala,+ 77  ke fakailoa atu ki ana tino te fekau o te fakaolataga e auala i te fakamagaloga o olotou agasala,+ 78  ona ko te alofa atafai o te ‵tou Atua. Kae mai te alofa atafai tenei ka lavea ei ne tatou se mainaga mai te lagi e pelā mo te ata o te vaveao, 79  e maina atu ki a latou kolā e ‵nofo i te pouliga mo te ata o te mate+ kae ke takitaki ei ‵tou vae mo te manuia i te auala o te filemu.” 80  Ne tupu aka faeloa te tamaliki tenā kae ne malosi ‵ki tena loto. Ne nofo faeloa a ia i te koga lavaki ke oko ki te aso ne fakaasi atu ei a ia ki tino Isalaelu.

Fakamatalaga mai lalo

Onoono ki te FP.
Onoono ki te MF A5.
Onoono ki te MF A5.
Onoono ki te MF A5.
Onoono ki te MF A5.
Io me “mai te moegatama eiloa o tena mātua.”
Onoono ki te MF A5.
Onoono ki te MF A5.
Io me “se fakaasiga.”
Onoono ki te MF A5.
Onoono ki te MF A5.
Onoono ki te MF A5.
Onoono ki te MF A5.
Onoono ki te MF A5.
Onoono ki te MF A5.
Onoono ki te MF A5.
Onoono ki te MF A5.
Onoono ki te MF A5.
Io me “se fakaola malosi.” Onoono ki te FP, “Sau.”
Onoono ki te MF A5.