Ki te kau Loma 9:1-33

  • Te mafatia o Paulo ona ko te Isalaelu faka-te-foitino (1-5)

  • Tama ‵tonu a Apelaamo (6-13)

  • E se mafai o fakafesiligina te filifiliga a te Atua (14-26)

    • Ipu o te kaitaua mo ipu o te alofa fakamagalo (22, 23)

  • Se ‵toega fua ka faka‵sao (27-29)

  • Ne ‵siga te kau Isalaelu (30-33)

9  Au e faipati ki te mea tonu i a Keliso; au e se loi, e pelā mo te mea e molimau ki ei toku loto lagona telā e takitaki ne te agaga tapu,  me e mafatia malosi toku loto kae e se gata te ‵mae.  Aku muna eiloa ke ‵vae kea‵tea au mai i te Keliso e pelā me se tino malaia ke sui ei oku taina, oku kāiga faka-te-foitino,  kolā ko tino Isalaelu. Ko latou kolā ne puke ne te Atua mo fai ana tama+ kae tuku atu ki a latou te ‵malu mo feagaiga+ kae ne tuku ki ei te Tulafono+ mo te taviniga tapu+ mo folafolaga katoa.+  Ne ‵tupu mai latou mai i olotou tupuga+ kolā ne vau foki i ei a Keliso i te feitu faka-te-foitino.+ Ke maua eiloa ne te Atua telā e pule i mea katoa a vikiga ki te se-gata-mai. Amene.  Kae e se ko tena uiga me ko takavale te muna a te Atua. Me e se ko tino katoa kolā ne o‵mai i te gafa o Isalaelu ne tino “Isalaelu” ‵tonu.+  E se fai foki a latou katoa mo fai a tama‵liki ona ko latou ko tama* a Apelaamo;+ kae, “A te tino telā ka taku ko tau tama* ka vau e auala i a Isaako.”+  Ko tena uiga, a tama‵liki faka-te-foitino e se ko tama‵liki ‵tonu a te Atua,+ kae ko tama‵liki e auala i te folafolaga+ ka fai mo fai te tama.*  Me konei la a pati o te folafolaga: “Au ka toe vau i te taimi eiloa penei, kae ko Sala ka maua ne ia se tamaliki tagata.”+ 10  E seki gata fua i konā, kae pelā foki mo te taimi ne faitama ei a Lepeka i se masaga mai i te tagata e tokotasi, ko Isaako te ‵tou tupuga;+ 11  me koi tuai o fa‵nau mai lāua io me e fai ne lāua ne mea ‵lei io me ne mea ma‵sei, ko te mea ke fakatumau te fuafuaga a te Atua kae ke se faka‵na tena filifiliga ki luga i te faiga o galuega, kae ki luga i te loto o te Atua telā ne kalagagina ne ia, 12  ne fai atu penei ki tou fafine: “A te tamaliki matua ka fai mo pologa a te tamaliki foliki.”+ 13  E pelā eiloa mo pati ne tusi mai penei: “Au ne alofa ki a Iakopo, kae ne takalialia au ki a Esau.”+ 14  Ne a la ‵tou pati e ‵tau o fai? E a, e fai mea sē tonu te Atua? Ikai!+ 15  Me ne fai atu a ia ki a Mose: “Ka fakaasi atu ne au te alofa fakamagalo ki so se tino e manako au o fakaasi ki ei te alofa fakamagalo, kae ka fakaasi ne au te alofa atafai ki so se tino e manako au o fakaasi ki ei te alofa atafai.”+ 16  Tela la, e faka‵na eiloa a te mea tenā, e se ki te mea e manako ki ei te tino io me ko ana taumafaiga, kae ki luga i te Atua telā e alofa fakamagalo.+ 17  Me ne fai atu a tusitusiga tapu ki te Falao: “Ko te pogai eiloa tenei ne talia ei ne au koe ke tumau i te ola: ke fakaasi atu toku ‵mana e auala i a koe kae ke folafola atu toku igoa i te lalolagi kātoa.”+ 18  Tela la, e alofa fakamagalo a ia ki so se tino e manako a ia ki ei, kae e fai ne ia ke loto makeke so se tino e manako a ia ki ei.+ 19  Kae ka fai mai koe ki a au: “Kaia la e onoono ei a ia ki mea ‵se e fai ne tino? Ko oi e mafai o ‵teke atu ki tena loto?” 20  Kae ko oi la koe, e te tagata, ke talitali atu koe ki te Atua?+ E mata, e fai atu a te mea ne faite ki te tino ne faite ne ia a ia: “Kaia ne faite ei au ne koe penei?”+ 21  Se a? E a, e se pule te tino faite mea ki kele i te kele,+ ko te mea ke faite ne ia mai i se fakaputuga kele e tasi se ipu mō se mea aoga, kae ko te suā ipu mō se mea sē aoga? 22  E a māfai e loto te Atua ke fakaasi mai tena kaitaua mo tena malosi sē fuafuagina, kae ne talia ne ia mo te lasi o te kufaki a ipu o te kaitaua kolā e ‵tau o fakaseai? 23  Kae kafai ne fai a te mea tenei ke fakailoa mai i ei a te maumea o tena ‵malu ki luga i ipu o te alofa fakamagalo,+ kolā ko leva ne fakatoka ne ia ke maua te tulaga ‵malu 24  ne tatou, kolā ne kalagagina ne ia e se mai i tino Iutaia fua kae mai i tino foki o fenua fakaa‵tea,+ e isi la se mea e masei i ei? 25  Ka fai eiloa e pelā mo ana pati ne fai mai i te Hosea: “A tino kolā e se ko oku tino+ ka taku ne au ko ‘oku tino,’ kae ko te fafine telā ne seki alofagina ka ‘alofagina’;+ 26  kae i te koga telā ne fai atu ei ki a latou a pati konei, ‘A koutou e se ko oku tino,’ tenā te koga ka taku ei latou ki ‘tama a te Atua ola.’”+ 27  E se gata i ei, ne fai mai a Isaia e uiga ki tino Isalaelu: “E tiga eiloa ka tokouke a fanau a Isalaelu e pelā mo one i te tai, se ‵toega fua ka faka‵sao.+ 28  Me ka fai te fakamasinoga a Ieova* i te lalolagi, ka fakaoti ne ia kae fakatoetoe a te mea tenā.”*+ 29  E se gata i ei, e pelā eiloa mo te valoaga a Isaia: “Moi ne seki faka‵toe mai ne Ieova* o kautau se tama* mō tatou, e penei ko ‵tau o fai tatou e pelā mo Sotoma, kae ko ‵tau foki o ‵pau tatou mo Komolo.”+ 30  Ne a la ‵tou pati ka fai atu? Me e tiga eiloa ne seki ‵sala atu a tino o fenua fakaa‵tea ki te amiotonu, ne maua ne latou te amiotonu,+ ko te amiotonu telā ne iku mai i te fakatuanaki;+ 31  kae e tiga eiloa ne ‵sala atu a Isalaelu ki te tulafono amiotonu, ne seki maua ne latou te tulafono tenā. 32  Se a te pogai? Me ne seki ‵sala atu latou ki ei e auala i te fakatuanaki kae e auala i galuega. Ne ‵siga atu latou ki luga i te “fatu faka‵siga tino”;+ 33  e pelā mo pati ne tusi: “Kiloke! ko fakatakato ne au i Siona se fatu+ faka‵siga tino mo se kaupapa e ‵lave ei olotou vae, kae ko te tino telā e fakatuanaki ki ei ka se fanoanoa.”+

Fakamatalaga mai lalo

Eleni, “fanau.”
Eleni, “fanau.”
Eleni, “fanau.”
Onoono ki te MF A5.
Io me “fakaseai fakavave.”
Onoono ki te MF A5.
Eleni, “fanau.”