Ki te kau Loma 8:1-39

  • Te ola mo te saolotoga e auala i te agaga (1-11)

  • Molimau atu te agaga me ko fai latou mo tama puke (12-17)

  • Ko faka‵tali a mea ne faite ki te saolotoga o tama a te Atua (18-25)

  • ‘E fakatagi atu te agaga mō tatou’ (26, 27)

  • Filifiliga ko leva ne fai ne te Atua (28-30)

  • Manumalo e auala i te alofa o te Atua (31-39)

8  Tela la, a latou kolā e ‵kau fakatasi mo Keliso Iesu ka se fakasala.  Me i te tulafono o te agaga telā e tuku mai ne ia te ola i te ‵kau fakatasi mo Keliso Iesu ko oti ne fakasaoloto ne ia koutou+ mai te tulafono o te agasala mo te mate.  A te mea telā ne seki mafai o fai ne te Tulafono+ ona ko te vāivāi+ o te foitino, ne fai ne te Atua i te ugamaiga o tena Tama+ i foliga o se tino agasala+ kae ona ko te agasala, e taku fakamasei ei te agasala telā i loto i te foitino,  ko te mea ke fakataunu a manakoga amio‵tonu o te Tulafono i a tatou+ kolā e sa‵sale i te agaga+ kae e se i te foitino.  Me i a latou kolā e ola e ‵tusa mo mea faka-te-foitino e tuku atu olotou mafaufau ki mea faka-te-foitino,+ kae ko latou kolā e ola e ‵tusa mo mea faka-te-agaga e ‵saga atu eiloa ki mea faka-te-agaga.+  Me i te mafaufau faeloa ki mea faka-te-foitino e fakauiga eiloa ki te mate,+ kae ko te mafaufau faeloa ki te agaga e maua mai i ei te ola mo te filemu;+  me i te mafaufau ki mea faka-te-foitino e fakauiga ki te fai fili mo te Atua,+ me e se fakalogo i ei ki te tulafono a te Atua, kae e se mafai eiloa o fai penā.  Tela la, a latou kolā e sa‵sale i te foitino e se mafai o fakafiafia ne latou te Atua.  E tiga te feitu tenā, a koutou e se sa‵sale i te foitino, kae i te agaga+ māfai e nofo tonu te agaga o te Atua i loto i a koutou. Kae kafai se tino e se maua i ei te agaga o Keliso, e se i o Keliso a te tino tenā. 10  Kae kafai e ‵kau fakatasi koutou mo Keliso,+ ko mate te foitino ona ko te agasala, kae e tuku atu ne te agaga a te ola ona ko te amiotonu. 11  Kae kafai la ko nofo i a koutou a te agaga o te tino telā ne fakatu aka ne ia a Iesu mai te mate, ka fai foki ne te tino telā ne fakatu aka ne ia a Keliso Iesu mai te mate+ ke ola otou foitino+ e auala i tena agaga telā e nofo i loto i a koutou. 12  Tela la, e oku taina, a tatou ko se ‵tau o ola e ‵tusa mo manakoga o te foitino;+ 13  me kafai e ola koutou e ‵tusa mo manakoga o te foitino ka ‵mate eiloa koutou; kae kafai e tamate ne koutou a faifaiga o te foitino+ e auala i te agaga, ka ola eiloa koutou.+ 14  Me i a latou katoa kolā e takitaki ne te agaga o te Atua, ko tama eiloa konā a te Atua.+ 15  Me ne seki maua ne koutou te agaga o te pologa ke toe ma‵taku koutou, kae ne maua ne koutou te agaga ke fai koutou mo tama puke. Ko te agaga eiloa tenā e ka‵laga atu ei tatou: “Apa,* te Tamana!”+ 16  Ko te agaga eiloa tenā e molimau mai ki ‵tou agaga+ i a tatou ko tama a te Atua.+ 17  Kafai la a tatou ko ana tama, ko fai foki tatou mo sui—ko sui eiloa o te Atua, kae ko sui+ kolā e ‵kau fakatasi mo Keliso—māfai e puapuaga fakatasi tatou+ mo ia ko te mea ke faka‵malugina foki tatou fakatasi mo ia.+ 18  Me i logo‵maega e maua ne tatou i te taimi nei e se mafai o fakatusa ki te ‵malu telā ka fakaasi mai e auala i a tatou.+ 19  Me i mea ne faite* e fakatali‵tali mo te olioli ki te taimi e fakaasi mai ei a tama a te Atua.+ 20  Me i mea ne faite ne tuku mai lalo i se olaga sē aoga,+ e se i olotou loto eiloa, kae e auala i a ia telā ne tuku atu ne ia latou ke fai penā, kae e fakavae ki luga i te fakamoemoega, 21  me i mea ne faite ka fakasaoloto+ foki mai te nofo pologa ki te masei kae ka maua i ei a te saolotoga ‵malu o tama a te Atua. 22  Me e iloa ne tatou i mea katoa ne faite ne mā‵nava fi‵ta faeloa kae logo‵mae fakatasi ke oko mai ki te taimi nei. 23  E se gata fua i te mea tenā, kae e pelā foki mo tatou kolā ko maua ne tatou a fuataga muamua, telā ko te agaga, ao, e mā‵nava fi‵ta tatou i loto i a tatou eiloa+ kae koi fakatali‵tali tatou ke fai mo tama puke,+ ko te fakasaolotoga mai i ‵tou foitino e auala i te togiola. 24  Me ne faka‵sao tatou i te fakamoemoega tenei; kae ko te fakamoemoega telā e lavea atu e se ko te fakamoemoega tonu, me kafai e lavea ne se tino se mea, e mata, e fakamoemoe a ia ki ei? 25  Kae kafai e fakamoe‵moe+ tatou ki se mea telā e se lavea ne tatou,+ e ‵nofo fakatali‵tali faeloa tatou ki ei mo te kufaki.+ 26  E penā foki a te kau mai o te agaga ke fesoasoani mai ki ‵tou vāivāiga;+ me e se iloa ne tatou a te mea e ‵tau o ‵talo atu tatou e uiga ki ei, kae e fakatagi atu eiloa te agaga mō tatou i mea kolā e mā‵nava fi‵ta tatou i ei kae e se mafai o fakamatalagina. 27  Kae e iloa ne te tino telā e iloilo ne ia a loto+ o tino a galuega a te agaga, me ko ia telā e fakatagi atu ki te Atua mō tino tapu. 28  E iloa ne tatou me fai ne te Atua ana galuega katoa ke ga‵lue fakatasi mō te ‵lei o latou kolā e a‵lofa ki te Atua, ko latou kolā ne kalagagina e ‵tusa mo tena fuafuaga;+ 29  me i a latou kolā ne talia muamua ne ia ko leva foki ne filifili ne ia ke fakaakoako ki tena Tama,+ ko te mea ke fai a ia mo fai te toekimua+ o taina e tokouke.+ 30  E se gata i ei, a tino kolā ko leva ne filifili+ ne ia ko tino foki kolā ne kalagagina+ ne ia; kae ko latou kolā ne kalagagina ne ia ko latou foki kolā ne taku amiotonugina+ ne ia. Kae ko tino kolā ne taku amiotonugina ne ia ko latou foki kolā ne faka‵malu+ ne ia. 31  Ne a la ‵tou pati e ‵tau o fai atu e uiga ki mea konei? Kafai a te Atua e kau mai ki a tatou, ko oi la ka ‵teke mai ki a tatou?+ 32  Ona ko te mea ne seki taofi ne ia tena Tama kae ne tuku mai a ia mō tatou katoa,+ e a, ka se tuku mai foki ne ia fakatasi mo tena Tama a nisi mea katoa konei ki a tatou mo te atafai? 33  Ko oi te tino ka fai sena tagi ki tino filifilia a te Atua?+ A te Atua ko te Tino telā e taku amiotonugina ne ia latou.+ 34  Ko oi ka taku fakamasei ne ia latou? A Keliso Iesu ko te tino telā ne mate, ao, e sili atu i ei ko te tino telā ne toe fakatu aka, telā e nofo i te feitu fakaatamai o te Atua+ kae telā e fakamolemole atu foki mō tatou.+ 35  Ko oi ka ‵vae kea‵tea ne ia tatou mai te alofa o Keliso?+ E mata, ko puapuaga io me ko te loto mafatia io me ko fakasauaga io me ko te fiakai io me ko te nofo fuafua io me ko mea fakama‵taku io me ko te pelu?+ 36  E pelā eiloa mo muna i te tusi: “Ona ko koe ko ave ei matou o tamate i te aso kātoa; a matou ko fai pelā me ne mamoe ko ave o tamate.”+ 37  E ‵kese mai i ei, ko o‵mai eiloa tatou mo te manumalo katoatoa+ i mea katoa konei e auala i a ia telā ne alofa mai ki a tatou. 38  E talitonu au me e se mafai ne te mate io me ko te ola io me ko agelu io me ko malo io me ko mea i te taimi nei io me ko mea ka oko mai io me ko malosi pule+ 39  io me ko mea i luga io me ko mea i lalo io me ko so se mea ne faite ka mafai o ‵vae ne ia tatou kea‵tea mai te alofa o te Atua e auala i a Keliso Iesu te ‵tou Aliki.

Fakamatalaga mai lalo

Se pati i te ‵gana Epelu mo te ‵gana Alamaika telā e fakauiga ki “Te Tamana!”
E fakasino atu eiloa ki tino.